ରାଜ୍ୟର ୩୬ଟି ସ୍ଥାନରେ ଗୋ-ମାଫିଆଙ୍କ ଘରେ ଚଢ଼ାଉ
ବିପୁଳ ପରିମାଣର ଅସ୍ତ୍ରଶସ୍ତ୍ର ସହ ୨୦ ଲକ୍ଷ ଟଙ୍କା ଓ ସୁନା ଗହଣା ଜବତ
ଭଦ୍ରକ/ବାଲେଶ୍ଵର/ମୟୂରଭଞ୍ଜ, ୦୭/୦୪: ରାଜ୍ୟର ୩ ଜିଲ୍ଲାରେ ଗୋ-ମାଫିଆଙ୍କ ଘରେ ଚାଲିଛି ଘନଘନ ଚଢ଼ାଉ। ବାଲେଶ୍ବର, ଭଦ୍ରକ ଓ ମୟୂରଭଞ୍ଜ ଜିଲ୍ଲାର ବିଭିନ୍ନ ସ୍ଥାନରେ ଗୋ-ମାଫିଆଙ୍କ ଘରେ ରେଡ୍ ଚାଲିଛି। ପ୍ରାୟ ୩୬ଟି ସ୍ଥାନରେ ଚଢ଼ାଉ କରୁଛି ପୋଲିସ। ପୂର୍ବାଞ୍ଚଳ DIG ପିନାକ ମିଶ୍ରଙ୍କ ନେତୃତ୍ୱରେ ଚାଲିଛି ରେଡ୍। ବାଲେଶ୍ୱରର ୧୧, ଭଦ୍ରକର ୮, ମୟୂରଭଞ୍ଜର ୧୫ଟି ସ୍ଥାନରେ ରେଡ୍ ଚାଲିଛି।
ବେଆଇନ ଗୋଚାଲାଣକୁ ନେଇ ବାଲେଶ୍ବର ସହର ସମେତ ସୋର, ବାହାନଗା, ଜଳେଶ୍ବର ସମେତ ୧୦ଟି ସ୍ଥାନରେ ଚଢ଼ାଉ ଚାଲିଛି। ବିଭିନ୍ନ ସ୍ଥାନରେ ଟଙ୍କା, ସୁନାଗହଣା ଜବତ ହୋଇଛି।
ଭଦ୍ରକରେ ୮ ଗୋରୁ ମାଫିଆଙ୍କ ଘରେ ଗତ କାଲି ବିଳମ୍ବିତ ରାତିରୁ ରେଡ୍ ଚାଲିଛି। ୫ ଜଣ ଗୋ ମାଫିଆ ଅଟକ ଥିବା ବେଳେ ଏପର୍ଯ୍ୟନ୍ତ ନଗଦ ୨୦ ଲକ୍ଷ ଟଙ୍କା ଜବତ ହୋଇଛି। ବନ୍ଧୁକ ଓ ବିପୁଳ ମାରଣାସ୍ତ୍ର ମଧ୍ୟ ଠାବ ହୋଇଛି। ଏହି ଚଢ଼ାଉରେ ୬ ପ୍ଲାଟୁନ୍ ଫୋର୍ସ ସହ ୨ ଡିଏସପି ଓ ୧୦ ଇନସ୍ପେକ୍ଟର ନିୟୋଜିତ ହୋଇଛନ୍ତି।
ସେହିପରି ମୟୁରଭଞ୍ଜରେ ଆଜି ସକାଳୁ ପୋଲିସର ସ୍ବତନ୍ତ୍ର ଟିମ୍ ଏକ ସଙ୍ଗେ ୧୫ ଟି ସ୍ଥାନରେ ରେଡ୍ କରୁଛନ୍ତି। ରେଡ ବେଳେ ଲକ୍ଷାଧିକ ଟଙ୍କା, ସୁନା ଗହଣା, ଚାରି ଚକିଆ ଯାନ ସହ ବାଇକ୍ ମଧ୍ୟ ଜବତ୍ ହେଇଥିବା ସୁଚନା ମିଳିଛି।