ଭୁବନେଶ୍ୱର, ୧୭/୦୭: ଗତ ୨୪ ଘଣ୍ଟା ମଧ୍ୟରେ ସମଗ୍ର ଓଡ଼ିଶାରେ, ବିଶେଷ କରି ପଶ୍ଚିମ ଏବଂ ଉପକୂଳବର୍ତ୍ତୀ ଜିଲ୍ଲାଗୁଡ଼ିକରେ ପ୍ରବଳରୁ ଅତି ପ୍ରବଳ ବର୍ଷା ହୋଇଛି। ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର, ଭୁବନେଶ୍ୱର ପକ୍ଷରୁ ମିଳିଥିବା ସୂଚନା ଅନୁଯାୟୀ, ଆଜି ସକାଳ ୮:୩୦ ସୁଦ୍ଧା ରାଜ୍ୟର ଅନେକ ସ୍ଥାନରେ ରେକର୍ଡ ବର୍ଷା ହୋଇଛି। ତେବେ କେନ୍ଦୁଝର ଜିଲ୍ଲାର ହାଟଡିହିଠାରେ ସର୍ବାଧିକ ୨୧୦.୦ ମିଲିମିଟର ବର୍ଷା ରେକର୍ଡ କରାଯାଇଛି, ଯାହାକୁ ପାଣିପାଗ ବିଭାଗ ‘ପ୍ରବଳରୁ ଅତି ପ୍ରବଳ ବର୍ଷା’ ଶ୍ରେଣୀଭୁକ୍ତ କରିଛି।
ପାଣିପାଗ କେନ୍ଦ୍ରର ରିପୋର୍ଟ ଅନୁଯାୟୀ, ଏହି ସମୟ ମଧ୍ୟରେ ରାଜ୍ୟର ୯ଟି ସ୍ଥାନରେ ‘ଅତି ପ୍ରବଳ’ ଏବଂ ୪୮ଟି ସ୍ଥାନରେ ‘ପ୍ରବଳ’ ବର୍ଷା ରେକର୍ଡ କରାଯାଇଛି।
ଚଳିତ ବର୍ଷାର ସବୁଠାରୁ ଅଧିକ ପ୍ରଭାବ ପଶ୍ଚିମ ଓଡ଼ିଶାର ଜିଲ୍ଲାଗୁଡ଼ିକରେ ଦେଖିବାକୁ ମିଳିଛି। ବରଗଡ଼ ଜିଲ୍ଲାର ଅତାବିରାଠାରେ ୧୬୦.୪ ମିଲିମିଟର ବର୍ଷା ହୋଇଥିବା ବେଳେ ସମ୍ବଲପୁରର ବୁର୍ଲାଠାରେ ୧୪୫.୧ ମିଲିମିଟର ଏବଂ ହୀରାକୁଦରେ ୧୪୦.୦ ମିଲିମିଟର ବର୍ଷା ରେକର୍ଡ ହୋଇଛି। ସେହିପରି ବରଗଡ଼ର ପଦ୍ମପୁରରେ ମଧ୍ୟ ୧୪୦.୦ ମିଲିମିଟର ବର୍ଷା ହୋଇଛି। ସମ୍ବଲପୁର ସହରରେ ୧୩୮.୮ ମିଲିମିଟର, ବଲାଙ୍ଗୀର (ବଙ୍ଗୋମୁଣ୍ଡା)ରେ ୧୩୨.୦ ମିଲିମିଟର, ଝାରସୁଗୁଡ଼ା (ଲାଇକେରା)ରେ ୧୩୧.୧ ମିଲିମିଟର, ଧନକଉଡ଼ା (ସମ୍ବଲପୁର)ରେ ୧୨୮.୮ ମିଲିମିଟର ବର୍ଷା ରେକର୍ଡ ହୋଇଛି।
ବଲାଙ୍ଗୀର ଜିଲ୍ଲାର ଦେଓଗାଁଠାରେ ୧୧୫.୦ ମିଲିମିଟର ଏବଂ ତୁରେଇକେଲାରେ ୧୦୨ ମିଲିମିଟରରୁ ଅଧିକ ବର୍ଷା ହୋଇଛି। ସେହିପରି ବୌଦ୍ଧ ଜିଲ୍ଲାର ଖଇରମାଲଠାରେ ୧୦୨.୬ ମିଲିମିଟର ଏବଂ ସୋନପୁର ସହରରେ ମଧ୍ୟ ୧୦୨ ମିଲିମିଟରରୁ ଅଧିକ ବର୍ଷା ହୋଇଥିବା ସୂଚନା ମିଳିଛି। କେନ୍ଦୁଝରର ଘଷିପୁରା ଠାରେ ୧୦୦.୩ ମିଲିମିଟର ବର୍ଷା ରେକର୍ଡ କରାଯାଇଛି।
ଉପକୂଳ ଓଡ଼ିଶାର ଅନେକ ସ୍ଥାନରେ ମଧ୍ୟ ଭଲ ବର୍ଷା ହୋଇଛି। ଭଦ୍ରକର ବନ୍ତ ଠାରେ ୯୮.୦ ମିଲିମିଟର, କଟକର ବାଙ୍କୀଠାରେ ୯୭.୦ ମିଲିମିଟର ଏବଂ ଆଠଗଡ଼ରେ ୯୬.୦ ମିଲିମିଟର ବର୍ଷା ହୋଇଛି। କଳାହାଣ୍ଡିର ଥୁଆମୂଳ ରାମପୁରରେ ୯୫.୦ ମିଲିମିଟର ବର୍ଷା ହୋଇଥିବା ବେଳେ ଖାପ୍ରାଖୋଲ, ଜମନକିରା, ବାମରା, ବରପାଲି, ଗୁରୁଣ୍ଡିଆ ଏବଂ ଟିଟିଲାଗଡ଼ ଭଳି ଅଞ୍ଚଳରେ ୮୫ ମିଲିମିଟରରୁ ୯୨ ମିଲିମିଟର ମଧ୍ୟରେ ବର୍ଷା ରେକର୍ଡ କରାଯାଇଛି।
ସୋନପୁର, ବଲାଙ୍ଗୀର, କଟକ, କଳାହାଣ୍ଡି, ବୌଦ୍ଧ, କନ୍ଧମାଳ, ବରଗଡ଼ ଏବଂ ସମ୍ବଲପୁର ଭଳି ପ୍ରାୟ ୮ଟି ଜିଲ୍ଲାର ଏକାଧିକ ପାଣିପାଗ କେନ୍ଦ୍ରରେ ୭୦ ମିଲିମିଟରରୁ ଅଧିକ ବର୍ଷା ହୋଇଛି।