କଙ୍ଗୋ, ୦୩/୦୯: ଡେମୋକ୍ରାଟିକ୍ ରିପବ୍ଲିକ୍ ଅଫ୍ କଙ୍ଗୋରେ ବ୍ୟାପିଥିବା ଇବୋଲା ମହାମାରୀରେ ମୃତ୍ୟୁସଂଖ୍ୟା ୩,୦୦୦ ଡେଇଁଥିବା ବେଳେ ମିଳିତ ଜାତିସଂଘ ଏହାକୁ ନେଇ ଗମ୍ଭୀର ଚେତାବନୀ ଦେଇଛି। ସଂକ୍ରମଣ ଯେଉଁ ହାରରେ ବୃଦ୍ଧି ପାଉଛି, ସେହି ତୁଳନାରେ ପ୍ରତିରୋଧକ ବ୍ୟବସ୍ଥା ଓ ମହାମାରୀ ନିୟନ୍ତ୍ରଣ ପଦକ୍ଷେପ ବହୁତ ପଛରେ ପଡ଼ିଯାଇଛି।
କଙ୍ଗୋ ସରକାରଙ୍କ ସରକାରୀ ରିପୋର୍ଟ ଅନୁଯାୟୀ, ମୋଟ ସଂକ୍ରମିତଙ୍କ ସଂଖ୍ୟା ୬,୧୮୬ରେ ପହଞ୍ଚିଥିବା ବେଳେ ମୃତ୍ୟୁସଂଖ୍ୟା ୩,୦୦୭କୁ ବୃଦ୍ଧି ପାଇଛି। ଏପର୍ଯ୍ୟନ୍ତ ୧,୪୦୯ ଜଣ ଆକ୍ରାନ୍ତ ସୁସ୍ଥ ହୋଇସାରିଛନ୍ତି ଏବଂ ୮୩୦ ଜଣ ରୋଗୀ ଆଇସୋଲେସନ୍ କିମ୍ବା ଚିକିତ୍ସା କେନ୍ଦ୍ରରେ ଅଛନ୍ତି।
କଙ୍ଗୋର ୬ଟି ପ୍ରଦେଶ ଯଥା ଇତୁରୀ, ଉତ୍ତର କିଭୁ, ହୌଟ-ଉଏଲେ, ତ୍ସୋପୋ, ଦକ୍ଷିଣ କିଭୁ ଓ ବାସ୍-ଉଏଲେର ପ୍ରାୟ ୬୦ଟି ସ୍ୱାସ୍ଥ୍ୟ ଅଞ୍ଚଳ ଏହି ଭୂତାଣୁ ଦ୍ୱାରା ପ୍ରଭାବିତ ହୋଇଛି। ଇତୁରୀ ପ୍ରଦେଶ ଏହାର ମୁଖ୍ୟ କେନ୍ଦ୍ରବିନ୍ଦୁ ପାଲଟିଛି, ଯେଉଁଠାରେ ମୋଟ ୮୧.୯% ଆକ୍ରାନ୍ତ ଚିହ୍ନଟ ହୋଇଛନ୍ତି।
ମିଳିତ ଜାତିସଂଘର ମାନବୀୟ ବ୍ୟାପାର ଓ ଜରୁରୀକାଳୀନ ସହାୟତା ସଂଯୋଜକ ଟମ୍ ଫ୍ଲେଚର ସୂଚନା ଦେଇଛନ୍ତି ଯେ ଭୂତାଣୁ ସଂକ୍ରମଣ ତୁଳନାରେ ସହାୟତା ପଦକ୍ଷେପ ବହୁତ ଧୀମା ଅଛି। ତୁରନ୍ତ ଏବଂ ବ୍ୟାପକ ସ୍ତରରେ ପ୍ରତିରୋଧକ ବ୍ୟବସ୍ଥା ନ କଲେ ଅଧିକ ଲୋକଙ୍କ ଜୀବନ ଯିବାର ଆଶଙ୍କା ରହିଛି।
ଦେଶର ପୂର୍ବ ପ୍ରଦେଶଗୁଡ଼ିକରେ ଚାଲିଥିବା ସଶସ୍ତ୍ର ସଂଘର୍ଷ, ସ୍ୱାସ୍ଥ୍ୟକର୍ମୀଙ୍କ ଉପରେ ଆକ୍ରମଣ ଏବଂ ଚିକିତ୍ସା କେନ୍ଦ୍ର ଓ ଆମ୍ବୁଲାନ୍ସ ଭଙ୍ଗାରୁଜା ଯୋଗୁଁ ସହାୟତା କାର୍ଯ୍ୟ ବାଧାପ୍ରାପ୍ତ ହେଉଛି। ଏହି ମହାମାରୀରେ ୪୦ରୁ ଅଧିକ ସ୍ୱାସ୍ଥ୍ୟକର୍ମୀଙ୍କ ମୃତ୍ୟୁ ଘଟିସାରିଛି।
କଙ୍ଗୋରେ ପ୍ରାୟ ୧୧ ନିୟୁତ ଲୋକ ପୂର୍ବରୁ ମାନବୀୟ ସହାୟତା ଉପରେ ନିର୍ଭରଶୀଳ। ଏହା ସହିତ ଖାଦ୍ୟ ଅଭାବ, କୁପୋଷଣ ଓ ଲୋକଙ୍କ ବାସଚ୍ୟୁତି ଏହି ସ୍ୱାସ୍ଥ୍ୟ ସଙ୍କଟକୁ ଆହୁରି ଜଟିଳ କରିଦେଇଛି।
ଡିଆରସି ସରକାର ପ୍ରଥମ ଧାଡ଼ିର ସ୍ୱାସ୍ଥ୍ୟକର୍ମୀଙ୍କ ପାଇଁ ଏର୍ଭେବୋ ଟିକାକରଣ ଅଭିଯାନ ଆରମ୍ଭ କରିଛନ୍ତି। ଅନ୍ତର୍ଜାତୀୟ ଟିକା ସଂଗଠନ ୭୦,୦୦୦ ଡୋଜ୍ ଟିକା ମଞ୍ଜୁର କରିଛି। ତେବେ ‘ହୁ’ ସ୍ପଷ୍ଟ କରିଛି ଯେ କେବଳ ଟିକାକରଣ ଯଥେଷ୍ଟ ନୁହେଁ, ଏହା ସହିତ ରୋଗୀ ପୃଥକୀକରଣ, ରୋଗ ଚିହ୍ନଟ, ସମ୍ପର୍କୀୟଙ୍କ ଅନୁସନ୍ଧାନ ଏବଂ ସୁରକ୍ଷିତ ଶବ ସତ୍କାର ବ୍ୟବସ୍ଥାକୁ କଡ଼ାକଡ଼ି କରିବା ଆବଶ୍ୟକ।