ଭୁବନେଶ୍ୱର, ୦୮/୦୯: ଦୁଗ୍ଧ ଚାଷୀଙ୍କ ଆୟ ବୃଦ୍ଧି ଓ କ୍ଷୀର ଉତ୍ପାଦନକୁ ଅଧିକ ପ୍ରୋତ୍ସାହନ ଦେବା ଲକ୍ଷ୍ୟରେ ଓମ୍ଫେଡ୍ ପକ୍ଷରୁ ଗୁରୁତ୍ବପୂର୍ଣ୍ଣ ପଦକ୍ଷେପ ନିଆଯାଇଛି। ଦୁଗ୍ଧ ଚାଷୀଙ୍କୁ ମିଳୁଥିବା କ୍ଷୀରର କ୍ରୟ ମୂଲ୍ୟରେ ଲିଟର ପିଛା ୨ ଟଙ୍କା ବୃଦ୍ଧି କରାଯିବ। ଆସନ୍ତା ସେପ୍ଟେମ୍ବର ୧୧ ତାରିଖରୁ ଏହି ବର୍ଦ୍ଧିତ ଦର ଲାଗୁ ହେବ।
ଏହି ନିଷ୍ପତ୍ତି ଫଳରେ ରାଜ୍ୟର ୩ ଲକ୍ଷରୁ ଅଧିକ ଦୁଗ୍ଧ ଚାଷୀ ସିଧାସଳଖ ଭାବେ ଉପକୃତ ହେବେ। ଗୋଖାଦ୍ୟ, ଚାରା, ପଶୁ ଚିକିତ୍ସା ଓ ଅନ୍ୟାନ୍ୟ ଖର୍ଚ୍ଚ ବୃଦ୍ଧି ପାଉଥିବା ସମୟରେ ଏହି ନିଷ୍ପତ୍ତି ଚାଷୀଙ୍କ ପାଇଁ ବଡ଼ ଆର୍ଥିକ ସହାୟକ ହେବ।
ଓମ୍ଫେଡ୍ ରାଜ୍ୟର ଦୁଗ୍ଧ ଚାଷୀଙ୍କଠାରୁ କ୍ଷୀର ସଂଗ୍ରହ କରି ଏହାକୁ ପ୍ରକ୍ରିୟାକରଣ କରି ବଜାରକୁ ଯୋଗାଇଥାଏ। ସଂସ୍ଥାର ଆନୁଷ୍ଠାନିକ ତଥ୍ୟ ଅନୁସାରେ, ଏହା ପ୍ରତିଦିନ ୬ ଲକ୍ଷ ଲିଟରରୁ ଅଧିକ କ୍ଷୀର ପ୍ରକ୍ରିୟାକରଣ କରୁଛି ଏବଂ ୨.୫ ଲକ୍ଷରୁ ଅଧିକ ଚାଷୀଙ୍କ ସହ ଏହା ଜଡ଼ିତ ଅଛି। ଉଲ୍ଲେଖଯୋଗ୍ୟ, ଚଳିତ ବର୍ଷ ମେ’ ମାସରେ ମଧ୍ୟ ଓମ୍ଫେଡ୍ କ୍ଷୀର ସଂଗ୍ରହ ଦରରେ ବୃଦ୍ଧି କରିଥିଲା।