ନୂଆଦିଲ୍ଲୀ, ୧୭/୧୧: ଏସିଆନ ସମ୍ମିଳନୀରେ ମୋଦି-ଟ୍ରମ୍ପଙ୍କ ସାକ୍ଷାତ। ଫିଲିପାଇନ୍ସର ରାଜଧାନୀ ମାନିଲାରେ ଦୁଇ ନେତାଙ୍କ ମଧ୍ୟରେ ହୋଇଥିବା ଭେଟଘାଟ ସମୟରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ, ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ନିଜର ବନ୍ଧୁ ଏବଂ ଜଣେ ବଡ଼ ନେତା ବୋଲି ସମ୍ବୋଧନ କରିଛନ୍ତି।
ଟ୍ରମ୍ପ କହିଛନ୍ତି, ମୋଦି ଜଣେ ଦୃଢ଼ ନେତା। ସେ ମୋର ବନ୍ଧୁ। ଜଣେ ମହାନ ନେତା ଭାବେ ସାରା ବିଶ୍ୱରେ ତାଙ୍କୁ ସମ୍ମାନ କରାଯାଏ। ମୋଦିଙ୍କ ସହ ଆମେରିକାର ସମ୍ପର୍କ ମଧ୍ୟ ବେଶ୍ ଭଲ ରହିଛି ବୋଲି ଟ୍ରମ୍ପ କହିଛନ୍ତି।
ମାନିଲାରେ ଅନୁଷ୍ଠିତ ଏହି କ୍ୱାଡ୍ (QUAD) ବୈଠକରେ ଆମେରିକା, ଭାରତ, ଜାପାନ ଓ ଅଷ୍ଟ୍ରେଲିଆର ରାଷ୍ଟ୍ରନେତାମାନେ ଏକାଠି ହୋଇଥିଲେ। ଏଥିରେ ଆମେରିକା ରାଷ୍ଟ୍ରପତି ଟ୍ରମ୍ପ, ଭାରତର ପ୍ରଧାନମନ୍ତ୍ରୀ ମୋଦି, ଜାପାନର ପ୍ରଧାନମନ୍ତ୍ରୀ ସାନାଏ ତାକାଇଚି ଏବଂ ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ଆନ୍ଥୋନି ଆଲବାନିଜ୍ ଯୋଗ ଦେଇଥିଲେ। ଟ୍ରମ୍ପଙ୍କ ଦ୍ୱିତୀୟ କାର୍ଯ୍ୟକାଳ ଆରମ୍ଭ ପରେ ଏହା ପ୍ରଥମ ନେତୃସ୍ତରୀୟ କ୍ୱାଡ୍ ବୈଠକ। ସେପ୍ଟେମ୍ବର ୨୦୨୪ ପରଠାରୁ ମଧ୍ୟ ଏହା ପ୍ରଥମ କ୍ୱାଡ୍ ନେତାସ୍ତରୀୟ ବୈଠକ ଥିଲା।
ବୈଠକ ଅବସରରେ ଚାରି ରାଷ୍ଟ୍ରନେତା ମିଳିତ ଫଟୋ ଉଠାଇବା ସମୟରେ ଟ୍ରମ୍ପ ମୋଦିଙ୍କୁ ଜଣେ ‘ଟଫ୍ ମ୍ୟାନ୍’ ଅର୍ଥାତ ଦୃଢ଼ ବ୍ୟକ୍ତିତ୍ୱର ନେତା ବୋଲି କହିଥିଲେ। ଏହା ସହ ଜାପାନ ପ୍ରଧାନମନ୍ତ୍ରୀ ତାକାଇଚିଙ୍କୁ ମଧ୍ୟ ଦୃଢ଼ ନେତା ବୋଲି ସମ୍ବୋଧନ କରିଥିଲେ। ମୋଦିଙ୍କୁ ନିଜର ବନ୍ଧୁ ବୋଲି କହିବା ସହ ତିନି ଦେଶର ନେତାଙ୍କ ସହ ଆମେରିକାର ଦୀର୍ଘଦିନର ଭଲ ସମ୍ପର୍କ ରହିଥିବା ଟ୍ରମ୍ପ କହିଥିଲେ।
ଅନ୍ୟପକ୍ଷରେ କ୍ୱାଡ୍ ବୈଠକରେ ମୋଦି ଏହି ସଂଗଠନକୁ ଭାରତ ପାଇଁ ଏକ ଗଠନମୂଳକ ଓ ବିଶ୍ୱସନୀୟ ସହଭାଗିତା ବୋଲି ବର୍ଣ୍ଣନା କରିଥିଲେ। ସାମୁଦ୍ରିକ ସୁରକ୍ଷା, ବିଶ୍ୱସନୀୟ ଯୋଗାଣ ଶୃଙ୍ଖଳ, ନୂତନ ପ୍ରଯୁକ୍ତିବିଦ୍ୟା ଓ ବିପର୍ଯ୍ୟୟ ପରିଚାଳନା ଭଳି କ୍ଷେତ୍ରରେ କ୍ୱାଡ୍ ଦେଶଗୁଡ଼ିକ ମିଳିତ ଭାବେ କାମ କରୁଥିବା ସେ କହିଥିଲେ। ଏହି ସହଯୋଗକୁ ଆହୁରି ମଜଭୁତ କରିବା ସହ ଆଗାମୀ ଦିନ ପାଇଁ ନିର୍ଦ୍ଦିଷ୍ଟ ଲକ୍ଷ୍ୟ ଧାର୍ଯ୍ୟ କରିବା ଉପରେ ମୋଦି ଗୁରୁତ୍ୱ ଦେଇଥିଲେ।
ଉଲ୍ଲେଖଯୋଗ୍ୟ, କ୍ୱାଡ୍ ହେଉଛି ଭାରତ, ଆମେରିକା, ଜାପାନ ଓ ଅଷ୍ଟ୍ରେଲିଆକୁ ନେଇ ଗଠିତ ଏକ ରଣନୈତିକ ସହଯୋଗୀ ଗୋଷ୍ଠୀ। ଇଣ୍ଡୋ-ପାସିଫିକ୍ ଅଞ୍ଚଳରେ ଶାନ୍ତି, ସୁରକ୍ଷା, ସ୍ଥିରତା ଓ ସମୃଦ୍ଧି ବଜାୟ ରଖିବା ଏହାର ପ୍ରମୁଖ ଉଦ୍ଦେଶ୍ୟ।