ନବୋଦୟ ସାହିତ୍ୟ-ସଂସ୍କୃତି ସମିତି, ଭୁବନେଶ୍ୱର ପକ୍ଷରୁ ଶିଶୁ ଦିବସ ପାଳନ

ସାହିତ୍ୟିକ ଆଲୋଚନାଚକ୍ର ଓ କବିତା ପାଠ କାର୍ଯ୍ୟକ୍ରମ ଆୟୋଜିତ

ଭୁବନେଶ୍ୱର, ୧୭/୧୧: ନବୋଦୟ ସାହିତ୍ୟ-ସଂସ୍କୃତି ସମିତି ପକ୍ଷରୁ ଶିଶୁ ଦିବସ ଅବସରରେ ଗତ ୧୪ ନଭେମ୍ବର ୨୦୨୬ ତାରିଖ ଦିନ ସନ୍ଧ୍ୟା ୭ଟା ୪୫ ମିନିଟ୍‌ରୁ ରାତି ୧୦ଟା ପର୍ଯ୍ୟନ୍ତ ଆଭାସୀ ମଞ୍ଚରେ ଏକ ସାହିତ୍ୟିକ ଆଲୋଚନାଚକ୍ର ଓ କବିତା ପାଠ କାର୍ଯ୍ୟକ୍ରମ ଆୟୋଜିତ ହୋଇଥିଲା।

କାର୍ଯ୍ୟକ୍ରମର ପ୍ରାରମ୍ଭରେ ସମିତିର ସଭାପତି ଡ. ଅବଦୁଲ ଉସମାନ ସ୍ୱାଗତ ଅଭିଭାଷଣ ପ୍ରଦାନ କରିବା ସହିତ ଏଭଳି ସାହିତ୍ୟିକ କାର୍ଯ୍ୟକ୍ରମର ଆବଶ୍ୟକତା ଓ ପ୍ରାସଙ୍ଗିକତା ସମ୍ପର୍କରେ ନିଜର ମତାମତ ରଖିଥିଲେ।

ମୁଖ୍ୟ ଅତିଥି ଭାବେ ଯୋଗଦେଇ ଓଡ଼ିଶା ମୁକ୍ତ ବିଶ୍ୱବିଦ୍ୟାଳୟର ପ୍ରଥମ କୁଳସଚିବ ଶ୍ରୀ ଜୟନ୍ତ କରଶର୍ମା ଶ୍ରୀଲଙ୍କାରେ ହିନ୍ଦୀ ଭାଷାର ବର୍ତ୍ତମାନର ସ୍ଥିତି ସମ୍ପର୍କରେ ବିସ୍ତୃତ ଆଲୋକପାତ କରିଥିଲେ। ସେହିପରି ଶ୍ରୀ ବିଜୟପୁରମ୍‌, ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜସ୍ଥିତ ଜବାହରଲାଲ ନେହେରୁ ସରକାରୀ ମହାବିଦ୍ୟାଳୟର ହିନ୍ଦୀ ବିଭାଗର ସହକାରୀ ଅଧ୍ୟାପିକା ଡ. ଦୀକ୍ଷା ଗୁପ୍ତା ହିନ୍ଦୀ ଭାଷାର ସ୍ଥିତି ଉପରେ ନିଜର ମତ ରଖିବା ସହିତ ହିନ୍ଦୀ ଭାଷାକୁ ଅଧିକ ବ୍ୟାପକତା ଓ ମର୍ଯ୍ୟାଦା ପ୍ରଦାନ କରିବା ନିମନ୍ତେ ନିରନ୍ତର ଏଭଳି ସାହିତ୍ୟିକ ଆଲୋଚନାଚକ୍ର ଆୟୋଜନ କରିବାର ଆବଶ୍ୟକତା ରହିଛି ବୋଲି ମତବ୍ୟକ୍ତ କରିଥିଲେ। ସମିତିର ସହସଚିବ ଶ୍ରୀ ମହେଶ୍ୱର ସାହୁ ମଧ୍ୟ ନିଜର ମତାମତ ରଖିଥିଲେ।

ଏହି ଅବସରରେ ଆସାନସୋଲର ହିନ୍ଦୀ ସାହିତ୍ୟିକ ତଥା କବି ଶ୍ରୀ ବେଚନ ପ୍ରସାଦ ବିଶ୍ୱର ସମସାମୟିକ ପରିସ୍ଥିତିକୁ ନେଇ ରଚିତ ନିଜସ୍ୱ କବିତା ପାଠ କରିଥିଲେ। ଅଧ୍ୟାପିକା ସୁଭଶ୍ରୀ ‘ମନୁଷ୍ୟ’ ଶୀର୍ଷକ କବିତା ପାଠ କରିଥିବାବେଳେ ଡ. ଚିତ୍ତରଞ୍ଜନ ନାହାକ ମାନବିକତାର ବାର୍ତ୍ତା ଉପରେ ଆଧାରିତ ନିଜସ୍ୱ କବିତା ‘ଜାଗୋ ଫିର୍ ଏକ ବାର୍’ ଆବୃତ୍ତି କରିଥିଲେ।

ଆଲୋଚନାଚକ୍ରର ବିଚାରଧାରାକୁ ଆଗକୁ ବଢ଼ାଇବା ଏବଂ ସାହିତ୍ୟିକ ଆଲୋଚନାକୁ ଏକ ନୂତନ ଦିଗଦର୍ଶନ ପ୍ରଦାନ କରିବା ଉଦ୍ଦେଶ୍ୟରେ କାର୍ଯ୍ୟକ୍ରମର ଶେଷ ପର୍ଯ୍ୟାୟରେ ହାୱଡ଼ା ହିନ୍ଦୀ ବିଶ୍ୱବିଦ୍ୟାଳୟର ପୂର୍ବତନ କୁଳପତି ପ୍ରଫେସର ଦାମୋଦର ମିଶ୍ର ସମସ୍ତ ବକ୍ତାଙ୍କ ମତାମତର ସମନ୍ୱିତ ବିଶ୍ଳେଷଣ ଉପସ୍ଥାପନ କରିଥିଲେ। ଆଭାସୀ ମଞ୍ଚରେ ଆୟୋଜିତ ଏହି ଆଲୋଚନାଚକ୍ରରେ ସମିତିର ୧୫ ଜଣ ସଦସ୍ୟ ଯୋଗଦେଇଥିଲେ।

କାର୍ଯ୍ୟକ୍ରମକୁ ସମିତିର ସମ୍ପାଦିକା ଶ୍ରୀମତୀ ପ୍ରତିମା ନଳିନୀ ପତି ସୁଚାରୁରୂପେ ପରିଚାଳନା କରିଥିଲେ। ଶେଷରେ ସମିତିର ଉପସଭାପତି ଡ. ଚିତ୍ତରଞ୍ଜନ ନାହାକ ଧନ୍ୟବାଦ ଅର୍ପଣ କରିବା ସହିତ କାର୍ଯ୍ୟକ୍ରମର ସମାପନ ହୋଇଥିଲା।