୧୯ ପ୍ରକଳ୍ପକୁ ରାଜ୍ୟ ସରକାରଙ୍କ ମୋହର

ଭୁବନେଶ୍ବର, ୦୭/୧୨/୨୩: ଓଡ଼ିଶାର ରାଜ୍ୟସ୍ତରୀୟ ସିଙ୍ଗଲ୍ ୱିଣ୍ଡୋ କ୍ଲିୟରାନ୍ସ ଅଥରିଟି (ଏସ୍ଏଲ୍ଏସଡବ୍ଲ୍ୟୁସିଏ) ଗୁରୁବାର ୪,୮୦୪.୩୫ କୋଟି ଟଙ୍କାର ୧୯ଟି ପ୍ରକଳ୍ପକୁ ଅନୁମୋଦନ କରିଛି।

ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନାଙ୍କ ତତ୍ତ୍ୱାବଧାନରେ ଏସ୍ଏଲ୍ଏସଡବ୍ଲ୍ୟୁସିଏର ୧୨୫ତମ ବୈଠକ ଅନୁଷ୍ଠିତ ହୋଇଥିଲା। ପ୍ରସ୍ତାବିତ ପ୍ରକଳ୍ପଗୁଡ଼ିକରେ ୧୭,୫୫୩ ନିଯୁକ୍ତି ସୁଯୋଗ ସୃଷ୍ଟି କରିବାର ସମ୍ଭାବନା ରହିଛି।

ପୋଷାକ ଓ ବୟନଶିଳ୍ପ, ଇସ୍ପାତ ଡାଉନଷ୍ଟ୍ରିମ୍, ପେଣ୍ଟ୍ (ରାସାୟନିକ), ପ୍ଲାଷ୍ଟିକ୍, ପ୍ୟାକେଜିଂ/ମେଟାଲ୍ ଡାଉନଷ୍ଟ୍ରିମ୍, କେମିକାଲ୍, ଖାଦ୍ୟ, ପାନୀୟ ଓ ଆନୁଷଙ୍ଗିକ କ୍ଷେତ୍ର, ଇସ୍ପାତ (ଫେରୋଆଲୋୟସ୍), ଆଇଟି ଭିତ୍ତିଭୂମି, କୃଷି ପ୍ରକ୍ରିୟାକରଣ, ଅକ୍ଷୟ ଶକ୍ତି/ସର୍କୁଲାର ଅର୍ଥନୀତି ଏବଂ ଭିତ୍ତିଭୂମି ଭଳି ପ୍ରମୁଖ କ୍ଷେତ୍ରରେ ଏହି ଗୁରୁତ୍ୱପୂର୍ଣ୍ଣ ପୁଞ୍ଜିନିବେଶ ହୋଇଛି।

କେନ୍ଦ୍ରାପଡ଼ାରେ ଟେକ୍ସଟାଇଲ୍ ଶିଳ୍ପ ପ୍ରତିଷ୍ଠା ସହ ଏହି ଶିଳ୍ପ କ୍ଷେତ୍ରରେ ୨୦୦୦ ନିଯୁକ୍ତି ସୁଯୋଗ ସୃଷ୍ଟି କରିବା ସହ ୱେଲସପନ୍ ଲିଭିଂ ଲିମିଟେଡ୍ ୨୦୦.୦୦ କୋଟି ଟଙ୍କା ବିନିଯୋଗ କରିବ।

ଟାଟା ଷ୍ଟିଲ୍ ଡାଉନଷ୍ଟ୍ରିମ୍ ପ୍ରଡକ୍ଟସ୍ ଲିମିଟେଡ୍ ପକ୍ଷରୁ ଯାଜପୁରର କଳିଙ୍ଗ ନଗରରେ ୧୦ ଲକ୍ଷ ମେଟ୍ରିକ୍ ଟନ୍ ଇସ୍ପାତ ଶିଳ୍ପ କେନ୍ଦ୍ର ପ୍ରତିଷ୍ଠା କରାଯିବ। ୭୩୫ କୋଟି ଟଙ୍କାର ପୁଞ୍ଜିନିବେଶ ସହ ଏହା ୩୩୫ ସମ୍ଭାବ୍ୟ ନିଯୁକ୍ତି ପ୍ରତିଶ୍ରୁତି ଦେଇଛି।

ଇସ୍ପାତ କ୍ଷେତ୍ରରେ ଇଣ୍ଡିଆନ୍ ମେଟାଲ୍ସ ଆଣ୍ଡ ଫେରୋ ଆଲଏଜ୍ ଲିମିଟେଡ୍ ଯାଜପୁରରେ ୯୭୭.୪୩ କୋଟି ଟଙ୍କା ବିନିଯୋଗ କରି ୨,୨୦,୦୦୦ ମେଟ୍ରିକ୍ ଟନ୍ ଫେରୋ କ୍ରୋମ୍ ଏବଂ ୨୦ ମେଗାୱାଟ୍ ଡବ୍ଲ୍ୟୁଏଚ୍ଆରବି ପାୱାର ଉତ୍ପାଦନ କରି ୧,୧୯୦ ନିଯୁକ୍ତି ସୃଷ୍ଟି କରିବ।

ଜିନ୍ଦଲ ଷ୍ଟେନଲେସ୍ ଲିମିଟେଡ୍ ପକ୍ଷରୁ ଯାଜପୁରର ଜେଏସ୍ଏଲ୍ ଷ୍ଟେନଲେସ୍ ଷ୍ଟିଲ୍ ପାର୍କରେ ୧୫୦ କୋଟି ଟଙ୍କା ବିନିଯୋଗ ରେ ଏକ ଷ୍ଟେନଲେସ୍ ଷ୍ଟିଲ୍ ସର୍ଭିସ୍ ସେଣ୍ଟର ୟୁନିଟ୍ ପ୍ରତିଷ୍ଠା କରାଯିବ ଯେଉଁଥିରେ ୩୧୫ ନିଯୁକ୍ତି ସୃଷ୍ଟି କରିବ।

କେନ୍ଦୁଝର ବଡବିଲରେ ଆନୁଷଙ୍ଗିକ ସୁବିଧା ଥିବା ୫୨,୮୦୦ ମେଟ୍ରିକ୍ ଟନ୍ ଇସ୍ପାତ କାଷ୍ଟିଂ ମିଲ୍ ଓ ରୋଲିଂ ମିଲ୍ ପ୍ରତିଷ୍ଠା ପାଇଁ କ୍ରାକର ଇଣ୍ଡିଆ ଆଲଏଜ୍ ଲିମିଟେଡ୍ ୧୦୧.୫୦ କୋଟି ଟଙ୍କା ବିନିଯୋଗ କରିବ ଯାହା ଦ୍ୱାରା ୨୪୦ ନିଯୁକ୍ତି ସୃଷ୍ଟି କରିବ।

ସୁନ୍ଦରଗଡ଼ରେ ଏନଭାଇରୋକେୟାର ଇନଫ୍ରାସଲ୍ୟୁସନ ପ୍ରାଇଭେଟ୍ ଲିମିଟେଡର ୧୦୦ କୋଟି ଟଙ୍କା ବିନିଯୋଗରେ ୨,୮୮,୦୦୦ ଟିପିଏ କ୍ଷମତା ବିଶିଷ୍ଟ ଏକ ହାଲୁକା ଷ୍ଟିଲ୍ ଷ୍ଟ୍ରିପ୍ ଏବଂ ପାଇପ୍ ଉତ୍ପାଦନ ୟୁନିଟ୍ ପ୍ରତିଷ୍ଠା କରାଯାଇଛି, ଯେଉଁଥିରେ ୨୯୫ଟି ସମ୍ଭାବ୍ୟ ନିଯୁକ୍ତି ପ୍ରଦାନ କରୁଛି।

ରୁଙ୍ଗଟା ପେଣ୍ଟସ୍ ପ୍ରାଇଭେଟ୍ ଲିମିଟେଡ୍ ଢେଙ୍କାନାଳରେ ପେଣ୍ଟସ୍, ଆଲାଇଡ୍ ପ୍ରଡକ୍ଟସ୍ ଏବଂ ଇଣ୍ଟରମିଡିଏଟର ଏକ ଉତ୍ପାଦନ ୟୁନିଟ୍ ପ୍ରତିଷ୍ଠା କରିବ ଯେଉଁଥିରେ ୯୯୧ କୋଟି ଟଙ୍କାର ନିବେଶ କରିବା ସହ ୭୦୦ ନିଯୁକ୍ତି ସୃଷ୍ଟି କରିବ।

ବାଲେଶ୍ୱରର ବାଲିଆପାଳ ଶିଳ୍ପାଞ୍ଚଳରେ ମଡ୍ୟୁଲସ୍ ଓଲିଓକେମ୍ ଆଣ୍ଡ ସର୍ଫେକଟାଣ୍ଟସ୍ ପ୍ରାଇଭେଟ୍ ଲିମିଟେଡର ରାସାୟନିକ ଉତ୍ପାଦନ ୟୁନିଟ୍ ପ୍ରତିଷ୍ଠା ହେବ। ଏହା ୩୧୩.୫୧ କୋଟି ଟଙ୍କାର ପୁଞ୍ଜିନିବେଶ ଯାହା କେମିକାଲ୍ କ୍ଷେତ୍ରକୁ ପ୍ରୋତ୍ସାହିତ କରିବ ଏବଂ ୩୦୦ ଜଣଙ୍କୁ ନିଯୁକ୍ତି ପ୍ରଦାନ କରିବ।

ଟ୍ରାନ୍ସନୋଭା ଏକ୍ସପ୍ରେସ୍ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ ଖୋର୍ଦ୍ଧାର ଏକ କେମିକାଲ୍ ହବ୍ରେ ୧୨୦.୩୯ କୋଟି ଟଙ୍କା ନିବେଶ କରି ବଲ୍କ ଇଣ୍ଡଷ୍ଟ୍ରିଆଲ୍ କେମିକାଲ ଷ୍ଟୋରେଜ୍, ରି-ପ୍ୟାକିଂ ଏବଂ ହ୍ୟାଣ୍ଡଲିଂ ସୁବିଧା ସ୍ଥାପନ କରି ୨୫୮ଟି ଚାକିରି ପ୍ରଦାନ କରିବ।

ଗ୍ରୋ ମ୍ୟାକ୍ସ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ ଖୋର୍ଦ୍ଧାରେ ପ୍ଲାଷ୍ଟିକ୍, ବୋତଲ ଓ ଡ୍ରମ୍ ଉତ୍ପାଦନ ୟୁନିଟରେ ୫୪.୫୫ କୋଟି ଟଙ୍କା ନିବେଶ କରି ପ୍ଲାଷ୍ଟିକ୍ କ୍ଷେତ୍ରରେ ୧୫୨ ଜଣଙ୍କୁ ନିଯୁକ୍ତି ସୁଯୋଗ ପ୍ରଦାନ କରିବ।

ଅନୁପମ ପ୍ରଡକ୍ଟସ୍ ଲିମିଟେଡ୍, ଖୋର୍ଦ୍ଧାରେ ଖାଲି ମେଟାଲ ଟିନ୍ କଣ୍ଟେନର ପାଇଁ ୫୧ କୋଟି ଟଙ୍କାର ଉତ୍ପାଦନ ୟୁନିଟ୍ ସ୍ଥାପନ କରି ପ୍ୟାକେଜିଂ/ମେଟାଲ ଡାଉନଷ୍ଟ୍ରିମ୍ କ୍ଷେତ୍ରରେ ଦକ୍ଷତା ବୃଦ୍ଧି କରିବା ସହ ୨୩୦ ନିଯୁକ୍ତି ସୁଯୋଗ ସୃଷ୍ଟି କରିଛି।

ରାଜଶ୍ରୀ ପଲିପ୍ୟାକ୍ ଲିମିଟେଡ୍ ଏବଂ କେଶବ ପ୍ଲାଷ୍ଟଟେକ୍ (ପି) ଲିମିଟେଡ୍ ଯଥାକ୍ରମେ ଖୋର୍ଦ୍ଧା ଓ ସମ୍ବଲପୁରର ରେଙ୍ଗାଲି ଶିଳ୍ପାଞ୍ଚଳରେ ଉତ୍ପାଦନ ୟୁନିଟ୍ ସହିତ ପ୍ଲାଷ୍ଟିକ୍ ଶିଳ୍ପରେ ଯୋଗଦାନ ରଖିଛନ୍ତି। ମିଳିତ ଭାବେ ୧୦୨.୨୫ କୋଟି ଟଙ୍କା ବିନିଯୋଗରେ ଏହି ଦୁଇଟି ପ୍ରକଳ୍ପରେ ୫୫୪ ନିଯୁକ୍ତି ସୃଷ୍ଟି ହେବ ବୋଲି ଆଶା କରାଯାଉଛି।

୧୯୦ କୋଟି ଟଙ୍କା ବିନିଯୋଗ ଏବଂ ଭିତ୍ତିଭୂମିକ୍ଷେତ୍ରରେ ୧୬୦ ନିଯୁକ୍ତି ସୃଷ୍ଟି କରିବାର ସମ୍ଭାବନା ଥିବା ସୁନ୍ଦରଗଡ଼ରେ ପ୍ରଧାନମନ୍ତ୍ରୀ ଗତି ଶକ୍ତି ମଲ୍ଟି ମୋଡାଲ ଟର୍ମିନାଲ ଯୋଜନା ଅଧୀନରେ ଧନସର ଗ୍ରୁପ୍ ଏକ ଘରୋଇ ମାଲ ପରିବହନ ଟର୍ମିନାଲ (ପିଏଫ୍ଟି) ଆରମ୍ଭ କରିଛି।

କୈବଲ୍ୟ ଲଜିଷ୍ଟିକ୍ ପ୍ରାଇଭେଟ୍ ଲିମିଟେଡ୍ କେନ୍ଦ୍ରାପଡ଼ା ଜିଲ୍ଲା ମହାକାଳପଡ଼ା ବ୍ଲକରେ ଥିବା ଏକ ମଲ୍ଟି ମୋଡାଲ ଆଭ୍ୟନ୍ତରୀଣ କଣ୍ଟେନର ଡିପୋ (ଆଇସିଡି)ରେ ୧୧୦ କୋଟି ଟଙ୍କା ବିନିଯୋଗ କରି ୪୮୦ ଟି ସମ୍ଭାବ୍ୟ ନିଯୁକ୍ତି ସହିତ ଖାଦ୍ୟ ଉତ୍ପାଦ, ରପ୍ତାନି ପ୍ରକ୍ରିୟାକରଣ ପାଇଁ ଭିତ୍ତିଭୂମି ପ୍ରଦାନ କରିବ।

ଆଶୀର୍ବାଦ ଫୁଡ୍ ପ୍ରୋସେସିଂ ପ୍ରାଇଭେଟ୍ ଲିମିଟେଡ୍ ଯାଜପୁରରେ ୫୬.୩୫ କୋଟି ଟଙ୍କା ବିନିଯୋଗରେ ଏକ ସମ୍ପୂର୍ଣ୍ଣ ସ୍ୱୟଂଚାଳିତ ଅଟା କଳ ସ୍ଥାପନ କରିବ, ଯାହା ଖାଦ୍ୟ, ପାନୀୟ ଏବଂ ଆନୁଷଙ୍ଗିକ କ୍ଷେତ୍ରରେ ଯୋଗଦାନ ଦେଇ ୧୧୮ଟି ସମ୍ଭାବ୍ୟ ନିଯୁକ୍ତି ପ୍ରଦାନ କରୁଛି।

ସୁମ୍ମା ରିଅଲ ମିଡିଆ ପ୍ରାଇଭେଟ୍ ଲିମିଟେଡ୍ ଖୋର୍ଦ୍ଧାରେ ୨୨୬.୫୭ କୋଟି ଟଙ୍କା ବ୍ୟୟରେ ଏକ ଆଇଟି ଭିତ୍ତିଭୂମି କମ୍ପ୍ଲେକ୍ସ ଆରମ୍ଭ ହେବ, ଯେଉଁଠି ୧୦,୦୦୦ ଆଇଟି ପ୍ରଫେସନାଲ ରହିବେ।

ଭବାନୀ ଷ୍ଟିଲ୍ ପ୍ରାଇଭେଟ୍ ଲିମିଟେଡ୍ ନୂଆପଡ଼ାରେ ଏକ ୫ ମେଗାୱାଟର କୋ-ଜେନ୍ ପାୱାର ପ୍ଲାଣ୍ଟ ସହିତ ୨୦୦ କେଏଲପିଡି ଶସ୍ୟ ଭିତ୍ତିକ ଇଥାନଲ୍ ପ୍ଲାଣ୍ଟ ସ୍ଥାପନ କରିବାକୁ ଯାଉଛି, ଯାହା କି ବିଜୁ ଅର୍ଥନୈତିକ କରିଡରରେ ୨୩୭.୮୦ କୋଟି ଟଙ୍କା ବିନିଯୋଗ ରେ କୃଷି ପ୍ରକ୍ରିୟାକରଣରେ ଉଲ୍ଲେଖନୀୟ ଯୋଗଦାନ ଦେବ ଏବଂ ୧୫୦ ନିଯୁକ୍ତି ସୃଷ୍ଟି କରିବ।

ଜିଏଆଇଏ ନିଓ ଏନର୍ଜି ପ୍ରାଇଭେଟ୍ ଲିମିଟେଡ୍ ୮୭.୦୦ କୋଟି ଟଙ୍କା ବିନିଯୋଗ କରି କଟକ ଦାମପଡ଼ାରେ କମ୍ପ୍ରେସ୍ଡ୍ ବାୟୋଗ୍ୟାସ୍ ପ୍ଲାଣ୍ଟ ସ୍ଥାପନ କରୁଛି। ବାର୍ଷିକ ୩,୬୦୦ ମେଟ୍ରିକ୍ ଟନ୍ କ୍ଷମତା ବିଶିଷ୍ଟ ଏହି ପଦକ୍ଷେପ ଅକ୍ଷୟ ଶକ୍ତି/ସର୍କୁଲାର ଅର୍ଥନୀତି କ୍ଷେତ୍ରରେ ୭୬ଟି ନିଯୁକ୍ତି ସୁଯୋଗ ସୃଷ୍ଟି କରିବ।