ଆୟକର ଚଢଉକୁ ନେଇ ବିଜେପିର ବକ୍ତବ୍ୟ ହାସ୍ୟାସ୍ପଦ: ବିଜେଡି

ଭୁବନେଶ୍ୱର, ୦୮/୧୨/୨୦୨୩: ଆୟକର ବିଭାଗର ଚଢାଉ ନେଇ ରାଜ୍ୟ ବିଜେପି ନେତା ସାମ୍ବାଦିକ ସମ୍ମିଳନୀ
କରିବା ଆଗରୁ ଟିକିଏ ରାଷ୍ଟ୍ରୀୟ ବିଜେପି ନେତା ଓ ଝାଡଖଣ୍ଡ ବିଜେପି ନେତା କ’ଣ କହୁଛନ୍ତି, ସେ ସଂକ୍ରାନ୍ତରେ ଅବଗତ
ହୋଇଥିଲେ ଭଲ ହୋଇଥାନ୍ତା ବୋଲି କହିଛନ୍ତି ବିଜେଡି ମୁଖପାତ୍ର ଶ୍ରୀମତୀ ଇପ୍ସିତା ସାହୁ ।

ବିଜେଡି ମୁଖପାତ୍ର ଶ୍ରୀମତୀ ସାହୁ ଏଠାରେ ଗଣମାଧ୍ୟମକୁ କହିଛନ୍ତି ଯେ ଆମେ ଯାହା ଦେଖୁଛୁ, ଝାଡଖଣ୍ଡର ବିଜେପି
ନେତାମାନେ କହୁଛନ୍ତି ମିଳିଥିବା ଟଙ୍କା କଂଗ୍ରେସର । ଅନ୍ୟ ପକ୍ଷରେ କଂଗ୍ରେସ ନେତାମାନେ କହୁଛନ୍ତି ଜବତ ହେଉଥିବା ଟଙ୍କା ବିଜେପି ନେତାଙ୍କର । ଉଭୟ ପରସ୍ପରକୁ ଦୋଷ ଦେଉଛନ୍ତି । ଲାଗୁଛି ବୋଧହୁଏ ଉଭୟ ବିଜେପି ଓ କଂଗ୍ରେସ ଦଳର ନେତା ନିଜ ନିଜର ଟଙ୍କାକୁ ବ୍ୟବସାୟୀଙ୍କ ଜରିଆରେ ଠୁଳ କରି ରଖୁଥିଲେ।

ବିଜୁ ଜନତା ଦଳ ସର୍ବଦା ଆଇନ୍‍କୁ ସମ୍ମାନ ଦେଇଥାଏ । ଆୟକର ବିଭାଗ ପକ୍ଷରୁ କରାଯାଇଥିବା ଚଢାଉକୁ ଆମେ
ସ୍ୱାଗତ କରୁଛୁ । ମିଳିଥିବା ଟଙ୍କା ଏବଂ ବ୍ୟବସାୟୀଙ୍କ ସହ ବୋଧହୁଏ ପଶ୍ଚିମ ଓଡିଶାର କିଛି ବିଜେପି ନେତାଙ୍କ ସମ୍ପର୍କ
ରହିଛି । ତେଣୁ ତଥ୍ୟ ସାମ୍ନାକୁ ଆସିବା ଆଗରୁ ଛାନିଆ ହୋଇ ସାମ୍ବାଦିକ ସମ୍ମିଳନୀ କରାଯାଇଛି । ଅପେକ୍ଷା କରନ୍ତୁ, କାହାର
କାହା ସହ କି ପ୍ରକାର ସମ୍ପର୍କ ରହିଛି ସବୁକିଛି ତଦନ୍ତରୁ ସାମ୍ନାକୁ ଆସିଯିବ ବୋଲି ଶ୍ରୀମତୀ ସାହୁ କହିଛନ୍ତି ।