ଓଡ଼ିଶାରେ ଆୟକର ଟିକସ ଚଢ଼ାଉ: ବିଜେଡି-ମଦ ବେପାରୀଙ୍କ ମଧ୍ୟରେ ବୁଝାମଣା!

ଭୁବନେଶ୍ୱର,୦୮/୧୨/୨୩: ଓଡ଼ିଶାରେ ଚାଲିଥିବା ଆୟକର ଚଢ଼ାଉକୁ ନେଇ ବିରୋଧୀ ଦଳ ବିଜେଡିକୁ କଡ଼ା ସମାଲୋଚନା ଜାରି ରଖିଥିବା ବେଳେ ଅଭିଯୁକ୍ତ ମଦ ବେପାରୀଙ୍କ ସହ ଶାସକ ଦଳର ଅନେକ ନେତାଙ୍କ ସଂପୃକ୍ତି ଥିବା ଅଭିଯୋଗ କରି ଘଟଣାର ସିବିଆଇ ତଦନ୍ତ ଦାବି କରିଛି ବିଜେପି।

ବାର୍ଷିକ କାରବାର ମାତ୍ର ୧୨୦ କୋଟି ଟଙ୍କା ଥିବା ବେଳେ ଏକ ଡିଷ୍ଟିଲରି ଗ୍ରୁପ୍ କିପରି ୫୦୦ କୋଟି ଟଙ୍କା ଗଚ୍ଛିତ ରଖିପାରିବ? ନିର୍ବାଚନ ସମ୍ବନ୍ଧୀୟ ଖର୍ଚ୍ଚ ପାଇଁ ବିଜେଡି କଂପାନି ପାଖରେ କୋଟି କୋଟି ଟଙ୍କା ରଖିଥିଲା କି? ବୌଦ୍ଧ, ସୋନପୁର, ଟିଟିଲାଗଡ଼, ରାୟଗଡ଼ା ଓ ବରଗଡ଼ର ମନ୍ତ୍ରୀ ଓ ବିଜେଡିର ନେତାଙ୍କ ସହ ସାହୁ ଭାଇଙ୍କ ସମ୍ପର୍କ ଥିବା ନେଇ ଆମ ପାଖରେ ସୂଚନା ରହିଛି ବୋଲି ବିଜେପି ମୁଖପାତ୍ର ମନୋଜ ମହାପାତ୍ର ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି।

ମଦ ବ୍ୟବସାୟୀ ଓ ବିଜେଡି ମଧ୍ୟରେ ମେଣ୍ଟ ଥିବା ଖବର ସମ୍ପର୍କରେ ସୂଚନା ଦେଇ ସେ ପରିବହନ ମନ୍ତ୍ରୀ ଟୁକୁନି ସାହୁ ଓ ଅନ୍ୟ ମନ୍ତ୍ରୀ ଓ ପୂର୍ବତନ ବିଧାୟକଙ୍କ ଫଟୋ ମଧ୍ୟ ଅଭିଯୁକ୍ତଙ୍କ ସହ ମଞ୍ଚ ରେ ବସିଥିବାର ଫଟୋ ମଧ୍ୟ ସାମ୍ବାଦିକ ସମ୍ମିଳନୀରେ ଦେଖାଇଥିଲେ। ଅଣଓଡ଼ିଆ ବ୍ୟବସାୟୀମାନେ ରାଜ୍ୟକୁ ଲୁଟ୍ କରୁଛନ୍ତି ବୋଲି ସେ ଅଭିଯୋଗ କରିଛନ୍ତି।

ସୁନ୍ଦରଗଡ଼ର ବିଜେପି ବିଧାୟକ କୁସୁମ ଟେଟେ ଅଭିଯୋଗ କରିଛନ୍ତି ଯେ ଚଢ଼ାଉ କରାଯାଉଥିବା କମ୍ପାନୀ ଗୁଡ଼ିକ ସହ ବିଜେଡି ନେତା ଯୋଗେଶ ସିଂହଙ୍କ ଲିଙ୍କ୍ ରହିଛି। ସୁନ୍ଦରଗଡ଼ରେ ମଦ ଉତ୍ପାଦନ ୟୁନିଟ୍ ପ୍ରତିଷ୍ଠା ହେବା ପରେ ସୂଚନା ମିଳିଥିଲା ଯେ ଏହି ୟୁନିଟ୍ ଶ୍ରୀ ସିଂହଙ୍କ ମା’ଙ୍କ ନାମରେ ରହିଛି। ସେହି ୟୁନିଟ୍ ସହ ତାଙ୍କର ସମ୍ପର୍କ ଥିଲା ଏବଂ ସେଠାରୁ ନିୟମିତ ଭାବେ ଟଙ୍କା ଆସୁଥିଲା ବୋଲି ସେ ଅଭିଯୋଗ କରିଛନ୍ତି। ତେବେ ଡିଷ୍ଟିଲରି ମାଲିକଙ୍କ ସହ ତାଙ୍କର କେବଳ ପାରିବାରିକ ସମ୍ପର୍କ ଥିଲା ବୋଲି ଶ୍ରୀ ସିଂହ କହିଛନ୍ତି।

ଶ୍ରୀ ସାହୁଙ୍କ ସହ ସଂପୃକ୍ତ ଏକ ବ୍ୟବସାୟୀ ଗୋଷ୍ଠୀର ବିଭିନ୍ନ ସ୍ଥାନରୁ ନଗଦ ୨୦୦ କୋଟି ଟଙ୍କା ଜବତ ହେବା ଘଟଣାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କଂଗ୍ରେସକୁ ସମାଲୋଚନା କରିଛନ୍ତି।