ଦୁଇଟି ଗୋରୁ ବୋଝେଇ ପିକଅପ୍ ଭ୍ୟାନ ଜବତ କଲା ଚମ୍ପୁଆ ପୋଲିସ

ଚମ୍ପୁଆ (ଦର୍ଶନ ନିୟୁଜ) ୦୯/୦୨: ଚମ୍ପୁଆ ଥାନା ଅନ୍ତର୍ଗତ ରିମୁଳି ଫାଣ୍ଡି ନିକଟରେ ଆଜି ଭୋର ସକାଳୁ ଗୋରୁ ବୋଝେଇ ଗାଡି ଦୁଇଟିକୁ ପୋଲିସ୍ ଜବତ କରିଥିବା ଜଣାପଡିଛି। ଗାଡି ଦୁଇଟିରେ ବୋଝେଇ ହୋଇଥିବା ୧୧ଟି ଗୋରୁଙ୍କୁ ଉଦ୍ଧାର କରାଯିବା ସହ ଏହି ଘଟଣା ରେ ପୋଲିସ ତିନି ଜଣଙ୍କୁ ଗିରଫ କରିଛି। ମିଳିଥିବା ସୂଚନା ଅନୁସାରେ ଆଜି ଭୋର୍ ସକାଳୁ ସୁନ୍ଦରଗଡ଼ରୁ ଦୁଇଟି ପିକଅପ୍ ଗାଡ଼ି ( ନଂ ଓଡ଼ି ୧୪ ଏଏଚ ୩୦୮୭ , ଓଡି ୧୪ ଏଏ ୩୧୯୧ )ରେ ଗୋରୁ ଚାଲାଣ ହେଉଥିବା ଖବର ପାଇ ପୋଲିସ ଗାଡି ଦୁଇଟିକୁ ବିଲେଇପଦା ନିକଟରେ ଅଟକାଇବାକୁ ଚେଷ୍ଟା କରିଥିଲା। ତେବେ ଗାଡି ଦୁଇଟି ଦ୍ରୁତ ଗତିରେ ରିମୁଳି ଆଡକୁ ପଳାଇଥିଲେ। ଏ ସମ୍ପର୍କରେ ଯୋଡା ପୋଲିସ ଚମ୍ପୁଆ ପୋଲିସକୁ ସୂଚନା ଦେବା ସହ ଗାଡି ଗୁଡିକୁ ପିଛା କରିଥିଲେ। ଗାଡି ଦୁଇଟି ଖସିଯିବା ପାଇଁ ଚେଷ୍ଟା କରିଥିଲେ ହେଁ ସ୍ଥାନୀୟ ଲୋକ ଓ ପୋଲିସ ର ମିଳିତ ଉଦ୍ୟମରେ ରିମୁଳି ଛକ ନିକଟରେ ଗୋଟେ ଗାଡିକୁ ଅଟକ ରଖାଯାଇଥିଲା। ଅନ୍ୟ ଗାଡିଟି କେନ୍ଦୁଝର ଆଡ଼କୁ ଦ୍ରୁତ ଗତିରେ ପଳାଇ ଯାଉଥିବା ବେଳେ ସିଜୁକଳା ନିକଟରେ ଗାଡ଼ିଟିକୁ ଜବତ କରାଯାଇ ରିମୁଳି ଫାଣ୍ଡିକୁ ଅଣାଯାଇଥିଲା। ଗାଡି ଦୁଇଟିରେ ବୋଝେଇ ହୋଇଥିବା ୧୧ଟି ବଳଦଙ୍କୁ ଉଦ୍ଧାର କରାଯାଇଛି। ଘଟଣାରେ ସମ୍ପୃକ୍ତ ତିନି ଜଣ ଅଭିଯୁକ୍ତ ସୁନ୍ଦରଗଡ ଜିଲ୍ଲା ଅନ୍ତର୍ଗତ ବିଶ୍ରା ଥାନାର ଏମଡି ଅଜିଜ ଆଲାମ (୧୮), ଏମଡି ମୋହିଦ ଅନସାରୀ (୨୪), ଏମଡି ସୁଲେମାନ (୨୫)ଙ୍କୁ ଚମ୍ପୁଆ ପୋଲିସ ଗିରଫ କରିଛି। ଅନ୍ୟ ଜଣେ ଅଭିଯୁକ୍ତ ଘଟଣା ସ୍ଥଳରୁ ଫେରାର ହୋଇଯାଇଥିବା ଜଣାପଡ଼ିଛି। ତେବେ ଗାଡି ଦୁଇଟିରେ ଗୋରୁମାନଙ୍କୁ ଅତ୍ୟନ୍ତ ନିର୍ମମ ଭାବେ ଖୁନ୍ଦାଖୁନ୍ଦି କରି ବୋଝେ଼ଇ କରାହୋଇଥିବା ଦେଖି ଘଟଣା ସ୍ଥଳରେ ଉତ୍ତେଜନା ପ୍ରକାଶ ପାଇଥିଲା। ଗୋ ଚାଲାଣକାରୀଙ୍କ ଉପରେ ପୋଲିସ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଲୋକେ ଦାବି କରିଥିଲେ। ପୋଲିସ ଓ ଜନତାଙ୍କ ମଧ୍ୟରେ ଘଟଣା ସ୍ଥଳରେ ଏ ନେଇ ଯୁକ୍ତିତର୍କ ହୋଇଥିବା ଦେଖିବାକୁ ମିଳିଥିଲା। ଦୀର୍ଘ ସମୟ ଧରି ଘଟଣା ସ୍ଥଳରେ ଉତ୍ତେଜନା ଲାଗି ରହିଥିଲା। ଉଦ୍ଧାର ବଳଦଗୁଡିକୁ ବଡବିଲସ୍ଥିତ ଗୋଶାଳାକୁ ପଠାଇ ଦିଆଯାଇଛି। ଘଟଣା ପରେ ବେଆଇନ ଗୋରୁ ଚାଲାଣକୁ ବନ୍ଦ ପାଇଁ ଜନସାଧାରଣ ଦୃଢ଼ ଦାବି କରିଛନ୍ତି।