ନୀତିନ ଧରିବେ ବିଜେପି କମାଣ

ନୂଆଦିଲ୍ଲୀ, ୧୪/୧୨: ନୂଆ ରାଷ୍ଟ୍ରୀୟ କାର୍ଯ୍ୟକାରୀ ସଭାପତିଙ୍କ ନାଁ ଘୋଷଣା କଲା ବିଜେପି। ନୀତିନ ନବୀନ ହେଲେ ବିଜେପି ନୂଆ ରାଷ୍ଟ୍ରୀୟ କାର୍ଯ୍ୟକାରୀ ସଭାପତି। ବିଜେପି ସଂସଦୀୟ ବୋର୍ଡରେ ନୀତିନ ନବୀନଙ୍କ ନାଁରେ ମୋହର ଲାଗିଛି। ବିହାର ସରକାରରେ ବର୍ତ୍ତମାନ ମନ୍ତ୍ରୀ ଅଛନ୍ତି ନୀତିନ ନବୀନ।

ବିଜେପି ରାଷ୍ଟ୍ରୀୟ କାର୍ଯ୍ୟକାରୀ ସଭାପତି ହେବା ପରେ ନୀତିନ ଙ୍କୁ ଶୁଭେଚ୍ଛା ଜଣାଇବା ସହ ପ୍ରଶଂସା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। “ନୀତିନ ନବୀନ ଜଣେ ଯୁବ ନେତା ଓ ପରିଶ୍ରମୀ କାର୍ଯ୍ୟକର୍ତ୍ତା। ବିଧାୟକ ଓ ମନ୍ତ୍ରୀ ଭାବେ ତାଙ୍କ ରେକର୍ଡ ପ୍ରଶଂସନୀୟ। ତାଙ୍କ ନିଷ୍ଠା ସଂଗଠନକୁ ଦୃଢ଼ କରିବ।”

୨୩ ମଇ ୧୯୮୦ ମସିହାରେ ଝାଡ଼ଖଣ୍ଡର ରାଞ୍ଚିରେ ଜନ୍ମଗ୍ରହଣ କରିଥିବା ନୀତିନ ନବୀନ ୫ ଥର ବିଧାୟକ ଭାବେ ନିର୍ବାଚିତ ହୋଇଛନ୍ତି। ବିହାର ପାଟନାର ବାଙ୍କିପୁର ବିଧାନସଭା ନିର୍ବାଚନମଣ୍ଡଳୀରୁ ପାଞ୍ଚ ଥର ବିଧାୟକ ଥିବା ନବୀନ ପ୍ରଥମେ ୨୦୦୬ ମସିହାରେ ଏକ ଉପନିର୍ବାଚନ ମାଧ୍ୟମରେ ବିହାର ବିଧାନସଭାକୁ ପ୍ରବେଶ କରିଥିଲେ ଏବଂ ୨୦୧୦, ୨୦୧୫, ୨୦୨୦ ଏବଂ ୨୦୨୫ ମସିହାରେ ପ୍ରତ୍ୟେକ ପରବର୍ତ୍ତୀ ନିର୍ବାଚନରେ ଏହି ଆସନକୁ ବଜାୟ ରଖିଛନ୍ତି। ୨୦୨୫ ବିହାର ବିଧାନସଭା ନିର୍ବାଚନରେ, ସେ ବାଙ୍କିପୁରରୁ ଆଉ ଏକ ନିର୍ଣ୍ଣାୟକ ବିଜୟ ହାସଲ କରିଥିଲେ। ୫୨,୦୦୦ ରୁ ଅଧିକ ଭୋଟ ବ୍ୟବଧାନରେ ଜିତିଥିଲେ।