ଏଥର ରାଜ୍ୟରେ ଶୀତର ପ୍ରକୋପ କମ୍ ହୋଇପାରେ

ଏଥର ରାଜ୍ୟରେ ଶୀତର ପ୍ରକୋପ କମ୍ ହୋଇପାରେ । ଶୀତର ଆଗମନ ନେଇ ଆକଳନ କରିଛନ୍ତି ପାଣିପାଗ ବିଶେଷଜ୍ଞ । ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ସୂଚନା ଅନୁସାରେ, ନଭେମ୍ବର ଓ ଡିସେମ୍ବରରେ ବର୍ଷାର ପରିମାଣ ସ୍ୱାଭାବିକ ଠାରୁ ଅଧିକ ହେବାର ସମ୍ଭାବନା ରହିଛି । ଏହାର ପ୍ରଭାବରେ ରାଜ୍ୟରେ ଶୀତ କମ୍ ରହିବ ବୋଲି ଆକଳନ କରିଛନ୍ତି ପାଣିପାଗ ବିଶେଷଜ୍ଞ । ଓଡ଼ିଶା ସମେତ ପୂର୍ବ ଭାରତର ରାଜ୍ୟ ଗୁଡ଼ିକରେ ମଧ୍ୟ ଶୀତ କମ୍ ରହିବ ବୋଲି ସୂଚନା ଦେଇଛନ୍ତି ।

ପାଣିପାଗ ବିଶେଷଜ୍ଞଙ୍କ କହିବା ଅନୁସାରେ, ଶୀତ ଋତୁରେ ବିଶ୍ୱ ତାପମାତ୍ରା ସ୍ୱାଭାବିକ ଠାରୁ ଅଧିକ ରହିବ । ଫେବୃଆରୀ ମାସ ଯାଏଁ ତାପମାତ୍ରା ଅଧିକ ରହିବାର ସମ୍ଭାବନା ରହିଛି । ନଭେମ୍ବରରେ ସାରା ରାଜ୍ୟରେ, ଡିସେମ୍ବରରେ ଉପକୂଳ ସମେତ ଦକ୍ଷିଣ ଓଡ଼ିଶା ଓ ଜାନୁଆରୀ ତଥା ଫେବୃଆରୀରେ ସମଗ୍ର ଉପକୂଳରେ ତାପମାତ୍ରା ସ୍ୱାଭାବିକ ଠାରୁ ଅଧିକ ରହିବ । ଫଳରେ ଶୀତ କମ୍ ରହିବ ବୋଲି ପାଣିପାଗ ବିଶେଷଜ୍ଞ ଆକଳନ କରିଛନ୍ତି ।