କର୍ପୋରେଟ୍ ନେତୃତ୍ୱ ଉପରେ ଦୁଇ ଦିନିଆ ସେମିନାର ଉଦ୍ଘାଟନ କଲେ ଡଃ ତପନ ଚାନ୍ଦ
‘ସ୍ୱାବଲମ୍ବୀ ଯୁବା, ସମୃଦ୍ଧ ଓଡ଼ିଶା ଗଠନ ପାଇଁ ଯୁବପିଢ଼ିଙ୍କୁ ଉଦ୍ୟୋଗୀ ଭାବେ ଗଢ଼ି ତୋଳନ୍ତୁ’
ଭୁବନେଶ୍ୱର, ୨୬/୦୬: ଇନଷ୍ଟିଟ୍ୟୁଟ୍ ଅଫ୍ କଷ୍ଟ ଆକାଉଣ୍ଟାଣ୍ଟସ୍ ଅଫ୍ ଇଣ୍ଡିଆ, ଅନୁଗୁଳ ଚାପ୍ଟର ପକ୍ଷରୁ “ଆର୍ଥିକ ନେତୃତ୍ୱରୁ କର୍ପୋରେଟ୍ ନେତୃତ୍ୱ” ବିଷୟବସ୍ତୁ ଉପରେ ଦୁଇ ଦିନିଆ ସେମିନାର ଆୟୋଜିତ ହୋଇଛି। ବର୍ତ୍ତମାନର ବ୍ୟବସାୟିକ ପରିବେଶରେ ଆର୍ଥିକ କାର୍ଯ୍ୟନିର୍ବାହୀମାନଙ୍କର ପରିବର୍ତ୍ତିତ ଭୂମିକାକୁ ଦୃଷ୍ଟିରେ ରଖି ଏହି ସେମିନାରର ଆୟୋଜନ କରାଯାଇଛି।
ଉଦ୍ଘାଟନୀ ଅଧିବେଶନରେ ମୁଖ୍ୟ ଅତିଥି ଭାବେ ନାଲକୋର ପୂର୍ବତନ ସିଏମ୍ଡି ଡଃ ତପନ ଚାନ୍ଦ ଯୋଗଦେଇ ଇନଷ୍ଟିଟ୍ୟୁଟ୍ର ଏହି ସମୟୋପଯୋଗୀ ପଦକ୍ଷେପକୁ ଭୂୟସୀ ପ୍ରଶଂସା କରିଥିଲେ। ସେ କହିଥିଲେ ଯେ, ଦେଶ ‘ବିକଶିତ ଭାରତ–୨୦୪୭’ ଏବଂ ରାଜ୍ୟ ‘ବିକଶିତ ଓଡ଼ିଶା–୨୦୩୬’ ଲକ୍ଷ୍ୟ ଦିଗରେ ଅଗ୍ରସର ହେଉଥିବା ସମୟରେ ମନୋଭାବରେ ପରିବର୍ତ୍ତନ ଆଣିବା ଅତ୍ୟନ୍ତ ଆବଶ୍ୟକ।
ସେ କହିଥିଲେ ଯେ, ଓଡ଼ିଶା ୫୦୦ ବିଲିୟନ୍ ଆମେରିକୀୟ ଡଲାରର ରାଜ୍ୟ ଜିଡିପି ହାସଲ କରିବାର ଲକ୍ଷ୍ୟ ଧାର୍ଯ୍ୟ କରିଛି ଏବଂ ୨୦୪୭ ସୁଦ୍ଧା ଏହାକୁ ୧୫୦୦ ବିଲିୟନ୍ ଆମେରିକୀୟ ଡଲାରରେ ପହଞ୍ଚାଇବାର ଲକ୍ଷ୍ୟ ରଖିଛି। ଏହା ଓଡ଼ିଶାବାସୀଙ୍କର ଏକ ବୃହତ୍ ସ୍ୱପ୍ନ। ଉପଯୁକ୍ତ ମନୋଭାବ ଓ ସଠିକ୍ ପ୍ରୟାସ ଦ୍ୱାରା ଏହି ଲକ୍ଷ୍ୟ ନିଶ୍ଚିତ ଭାବେ ହାସଲ କରାଯାଇପାରିବ।
ଡଃ ଚାନ୍ଦ କହିଥିଲେ ଯେ, ଆର୍ଥିକ ପରିଚାଳନା କ୍ଷେତ୍ରରେ “ଭେରିଏନ୍ସରୁ ଭିଜନ୍, ଏଣ୍ଟିଟିରୁ ଏଣ୍ଟରପ୍ରାଇଜ୍ ଏବଂ କଣ୍ଟ୍ରୋଲ୍ରୁ କଲାବୋରେସନ୍” ଦିଗକୁ ଏକ ମୌଳିକ ପରିବର୍ତ୍ତନ ଆବଶ୍ୟକ। ସେ କହିଥିଲେ ଯେ, ଆର୍ଥିକ କ୍ଷେତ୍ରର ବୃତ୍ତିଜୀବୀମାନଙ୍କ ପ୍ରତି ତାଙ୍କର ବିଶେଷ ଆକର୍ଷଣ ରହିଛି, କାରଣ ସେମାନେ ତଥ୍ୟ ଆଧାରରେ ଯୁକ୍ତି ଉପସ୍ଥାପନ କରନ୍ତି।
ବିକଶିତ ଭାରତ ଗଠନରେ ଆର୍ଥିକ କାର୍ଯ୍ୟନିର୍ବାହୀମାନଙ୍କ ଭୂମିକା ଅଧିକ ବ୍ୟାପକ ହେବା ଆବଶ୍ୟକ। ସେମାନେ କେବଳ ହିସାବରକ୍ଷଣରେ ସୀମିତ ନରହି ତଥ୍ୟକୁ ବ୍ୟବହାର କରି ବିକାଶ ଓ ଅଭିବୃଦ୍ଧିର ପଥ ପ୍ରସ୍ତୁତ କରିବା ଉଚିତ। ସଂଗଠନ ମଧ୍ୟରେ ସେମାନେ ନିୟନ୍ତ୍ରକର ଭୂମିକାରୁ ବାହାରି ସୁବିଧା ପ୍ରଦାନକାରୀ (Facilitator) ଭୂମିକା ଗ୍ରହଣ କରିବା ଦରକାର। ବ୍ୟବସାୟ କରିବାର ସହଜତା, କାର୍ଯ୍ୟ ସମ୍ପାଦନର ଗତି ଏବଂ ବ୍ୟବସାୟର ବ୍ୟୟ ହ୍ରାସ ଉପରେ ଗୁରୁତ୍ୱ ଦେବା ଉଚିତ।
ଇସ୍ପାତ, କୋଇଲା ଓ ଆଲୁମିନିୟମ୍ କ୍ଷେତ୍ରର ବରିଷ୍ଠ ଆର୍ଥିକ ଅଧିକାରୀମାନଙ୍କ ସହ କାର୍ଯ୍ୟ କରିବାର ଅଭିଜ୍ଞତା ବାଣ୍ଟି ସେ କହିଥିଲେ ଯେ, ସଂସ୍ଥାର ସାମଗ୍ରିକ ସଫଳତାକୁ ଲକ୍ଷ୍ୟ କରି କାର୍ଯ୍ୟ କଲେ ଉଲ୍ଲେଖନୀୟ ଫଳାଫଳ ମିଳିଥାଏ। ସେ ଯୁବ ଆର୍ଥିକ ବୃତ୍ତିଜୀବୀମାନଙ୍କୁ ନିଜ କାର୍ଯ୍ୟକ୍ଷେତ୍ର, ଶିଳ୍ପ ଓ ସଂସ୍ଥା ସମ୍ପର୍କରେ ସମଗ୍ର ଜ୍ଞାନ ଆହରଣ କରିବାକୁ ପରାମର୍ଶ ଦେଇ କହିଥିଲେ ଯେ, ଏହା ସେମାନଙ୍କୁ ଭବିଷ୍ୟତରେ ସଫଳ ସିଏଫ୍ଓ (CFO) ଓ ସିଇଓ (CEO) ଭାବେ ଗଢ଼ି ତୋଳିବ।
ଡଃ ଚାନ୍ଦ କହିଥିଲେ ଯେ, ଆର୍ଥିକ କ୍ଷେତ୍ରର କର୍ପୋରେଟ୍ ନେତୃତ୍ୱ କେବଳ ବୋର୍ଡରୁମ୍ରେ ସୀମିତ ନରହି ସମାଜରେ ମୂଲ୍ୟ ସଂଯୋଜନ ଓ ସାଧାରଣ ଲୋକଙ୍କ କଲ୍ୟାଣ ଦିଗରେ ମଧ୍ୟ କାର୍ଯ୍ୟ କରିବା ଉଚିତ। ଯୁବପିଢ଼ିଙ୍କୁ ଉଦ୍ୟୋଗୀ ଭାବେ ଗଢ଼ି ତୋଳି “ସ୍ୱାବଲମ୍ବୀ ଯୁବା, ସମୃଦ୍ଧ ଓଡ଼ିଶା” ଗଠନରେ ଆର୍ଥିକ କାର୍ଯ୍ୟନିର୍ବାହୀମାନେ ଗୁରୁତ୍ୱପୂର୍ଣ୍ଣ ଅବଦାନ ରଖିପାରିବେ ବୋଲି ସେ କହିଥିଲେ।
ସେ ଆହୁରି କହିଥିଲେ ଯେ, ସରକାରଙ୍କ ବିଭିନ୍ନ ଯୋଜନା ଓ କାର୍ଯ୍ୟକ୍ରମକୁ ସାଧାରଣ ଲୋକଙ୍କ ନିକଟରେ ପହଞ୍ଚାଇବା ସହିତ ବ୍ୟବସାୟ କରିବାର ସହଜତା ଏବଂ ଜୀବନଯାପନର ସହଜତା ପାଇଁ ସଂସ୍କାରମୂଳକ ପରାମର୍ଶ ଦେବାରେ ମଧ୍ୟ ଆର୍ଥିକ ବୃତ୍ତିଜୀବୀମାନେ ବଡ଼ ଭୂମିକା ନେଇପାରିବେ।
ସେ ବିକାଶର ନଅଟି ମୁଖ୍ୟ ଶକ୍ତିକେନ୍ଦ୍ର “PRAGATI” ବିଷୟରେ ଆଲୋକପାତ କରି କହିଥିଲେ— ଉତ୍ପାଦକତା (Productivity), ସଂସ୍କାର (Reforms), ମୂଲ୍ୟ ସଂଯୋଜନ (Addition of Value), ବିବିଧୀକରଣ ମାଧ୍ୟମରେ ଅଭିବୃଦ୍ଧି (Growth through Diversification), ସ୍ୱୟଂଚାଳନ (Automation), ପ୍ରଯୁକ୍ତି (Technology), ନବସୃଜନ (Innovation), ପୁଞ୍ଜି ବିନିଯୋଗ (Investment) ଏବଂ ଭିତ୍ତିଭୂମି (Infrastructure)। ଏହି ସମସ୍ତ କ୍ଷେତ୍ର ଉପରେ ଶିକ୍ଷାନୁଷ୍ଠାନ ଓ ଶିଳ୍ପ ସଂସ୍ଥାମାନେ ଗୁରୁତ୍ୱ ଦେଲେ ରାଜ୍ୟର ବିକାଶ ତ୍ୱରାନ୍ୱିତ ହେବ ବୋଲି ସେ ମତ ପ୍ରକାଶ କରିଥିଲେ।
ଦୁଇ ଦିନିଆ ଏହି ସେମିନାରରେ ଚାରିଟି ବୈଷୟିକ ଅଧିବେଶନ ଆୟୋଜିତ ହେବ। ବିଶିଷ୍ଟ ବୃତ୍ତିଜୀବୀମାନେ ଏଥିରେ ମତାମତ ରଖିବା ସହ ଖୋଲା ଆଲୋଚନା ଓ ନେଟୱାର୍କିଂ ଅଧିବେଶନ ମଧ୍ୟ ଅନୁଷ୍ଠିତ ହେବ।
ଅନୁଗୁଳ ଚାପ୍ଟରର ଅଧ୍ୟକ୍ଷ ସିଏମ୍ଏ ଆଲୋକ ତ୍ରିପାଠୀଙ୍କ ନେତୃତ୍ୱରେ ଏହି କାର୍ଯ୍ୟକ୍ରମକୁ ନାଲକୋର ପୂର୍ବତନ ସିଜିଏମ୍ (ଫାଇନାନ୍ସ) ଅନ୍ତର୍ଯ୍ୟାମୀ ଆଚାର୍ଯ୍ୟଙ୍କ ସମେତ ଅନ୍ୟ ସଦସ୍ୟମାନେ ସଫଳତାର ସହ ସମନ୍ୱୟ କରିଥିଲେ। ଏହି ସେମିନାରରେ ବହୁ ସଂଖ୍ୟାରେ ଆର୍ଥିକ କ୍ଷେତ୍ରର ବୃତ୍ତିଜୀବୀ, କର ପରାମର୍ଶଦାତା, ଉଦ୍ୟୋଗୀ, ଶିଳ୍ପ ଜଗତର ବିଶିଷ୍ଟ ବ୍ୟକ୍ତିବିଶେଷ ଏବଂ ଇନଷ୍ଟିଟ୍ୟୁଟ୍ ଅଫ୍ କଷ୍ଟ ଆକାଉଣ୍ଟାଣ୍ଟସ୍ ଅଫ୍ ଇଣ୍ଡିଆର ସଦସ୍ୟମାନେ ଅଂଶଗ୍ରହଣ କରିଥିଲେ। ସେମାନଙ୍କର ସକ୍ରିୟ ଉପସ୍ଥିତି ଓ ଅଂଶଗ୍ରହଣ ଏହି କାର୍ଯ୍ୟକ୍ରମକୁ ସଫଳ ଏବଂ ଭବ୍ୟ କରିଥିଲା।