ଚେନ୍ନାଇ, ୦୪/୦୮: ତାମିଲନାଡୁର ପୂର୍ବତନ ଉପମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ଉଦୟନିଧି ଷ୍ଟାଲିନଙ୍କୁ ପୋଲିସ ତାଙ୍କ ଚେନ୍ନାଇସ୍ଥିତ ବାସଭବନରୁ ଗିରଫ କରିଛି। କାବେରୀ ଜଳ ବିବାଦକୁ ନେଇ ଏକ ରାଲିରେ ଅଭିନେତ୍ରୀ ତ୍ରିଶାଙ୍କୁ ନେଇ ଅଶ୍ଳୀଳ ଓ ଦ୍ୱିଅର୍ଥବୋଧକ ମନ୍ତବ୍ୟ କରିଥିବା ଅଭିଯୋଗରେ ତାଙ୍କ ବିରୋଧରେ ମାମଲା ରୁଜୁ ହେବା ପରେ ଏହି କାର୍ଯ୍ୟାନୁଷ୍ଠାନ ହୋଇଛି।
ପୋଲିସ ଉଦୟନିଧିଙ୍କୁ ଗିରଫ କରିବା ପାଇଁ ଘରେ ପହଞ୍ଚିବା ମାତ୍ରେ ସେଠାରେ ଡିଏମକେ ସମର୍ଥକଙ୍କ ଭିଡ଼ ଜମିଥିଲା। ସମର୍ଥକମାନେ ପୋଲିସ ବିରୋଧରେ ସ୍ଲୋଗାନ ଦେଇ ପ୍ରତିବାଦ କରିଥିବାରୁ କିଛି ସମୟ ପାଇଁ ଉତ୍ତେଜନା ସୃଷ୍ଟି ହୋଇଥିଲା। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ଅତିରିକ୍ତ ପୋଲିସ ଫୋର୍ସ ମୁତୟନ କରାଯାଇଥିଲା।
ଗିରଫ ପରେ ଉଦୟନିଧି ଷ୍ଟାଲିନ୍ ହସୁଥିବା ଅବସ୍ଥାରେ ପୋଲିସ ସହ ଯାଉଥିବା ଦେଖାଯାଇଥିଲେ। ସେ କହିଥିଲେ, “ଏହି ଗିରଫ ଏକ ପ୍ରହସନ। ମୁଁ ଆଇନଗତ ଭାବେ ଏହାର ମୁକାବିଲା କରିବି।”
ଅନ୍ୟପଟେ, ବିଜୟଙ୍କ ଦଳ TVK ଏବଂ BJP ଉଦୟନିଧିଙ୍କ ମନ୍ତବ୍ୟକୁ କଡ଼ା ଭାଷାରେ ନିନ୍ଦା କରି ଏହାକୁ ମହିଳାଙ୍କ ପ୍ରତି ଅପମାନଜନକ ବୋଲି ଅଭିଯୋଗ କରିଛନ୍ତି। ସେମାନଙ୍କ ଅଭିଯୋଗ ଆଧାରରେ ପୋଲିସ ମାମଲା ରୁଜୁ କରି ଉଦୟନିଧିଙ୍କୁ ଗିରଫ କରିଛି।