‘ବାର୍ତ୍ତାଳାପ’ ସାମ୍ବାଦିକ ଓ ସରକାରଙ୍କ ମଧ୍ୟରେ ଏକ ସେତୁ: ପିଆଇବି ଏଡିଜି ଅଖେଳ କୁମାର ମିଶ୍ର
ପିଆଇବି ରାଞ୍ଚି ପକ୍ଷରୁ ଷଢ଼େଇକଳା ଓ ଖରସୁଆଁରେ ଆଞ୍ଚଳିକ ଗଣମାଧ୍ଯମ କର୍ମଶାଳା ‘ବାର୍ତ୍ତାଳାପ’
ଭୁବନେଶ୍ବର, ୨୭/୦୯: ଭାରତ ସରକାରଙ୍କ ସୂଚନା ଓ ପ୍ରସାରଣ ମନ୍ତ୍ରଣାଳୟ ଅଧୀନ ପତ୍ର ସୂଚନା କାର୍ଯ୍ୟାଳୟ (ପିଆଇବି) ପକ୍ଷରୁ ବିଭିନ୍ନ ସମୟରେ ଆୟୋଜନ କରାଯାଉଥିବା “ବାର୍ତ୍ତାଳାପ” କାର୍ଯ୍ୟକ୍ରମ ସାମ୍ବାଦିକ ଓ ସରକାରଙ୍କ ମଧ୍ୟରେ ଏକ ସେତୁ ଭଳି କାର୍ଯ୍ୟ କରିଥାଏ ବୋଲି ପିଆଇବି ଏଡିଜି ଅଖେଳ କୁମାର ମିଶ୍ର କହିଛନ୍ତି ।
ଆଜି ପିଆଇବି ରାଞ୍ଚି ପକ୍ଷରୁ ଝାଡ଼ଖଣ୍ଡର ଷଢ଼େଇକଳା ଓ ଖରସୁଆଁ ଠାରେ ଆଞ୍ଚଳିକ ଗଣମାଧ୍ଯମ କର୍ମଶାଳା ‘ବାର୍ତ୍ତାଳାପ’ ଆୟୋଜନ କରାଯାଇଥିଲା । ଏଥିରେ ଯୋଗ ଦେଇ ଶ୍ରୀ ମିଶ୍ର କହିଛନ୍ତି, ବାର୍ତ୍ତାଳାପ କାର୍ଯ୍ୟକ୍ରମ ସରକାରଙ୍କ ବିଭିନ୍ନ ଯୋଜନା ଓ କାର୍ଯ୍ୟକ୍ରମ ବିଷୟରେ ଗଣମାଧ୍ୟମ ପ୍ରତିନିଧୂମାନଙ୍କୁ ସୂଚନା ଦେଇଥାଏ । ଏହା ସାମ୍ବାଦିକମାନଙ୍କୁ କାର୍ଯ୍ୟ କରିବା ଲାଗି ଅନୁପ୍ରାଣିତ କରେ । ସମାଜରେ ସାମ୍ବାଦିକମାନଙ୍କର ଗୁରୁତ୍ବପୂର୍ଣ ଭୂମିକା ରହିଛି ବୋଲି ଶ୍ରୀ ମିଶ୍ର ତାଙ୍କ ଅଭିଭାଷଣରେ ଉଲ୍ଲେଖ କରିଥିଲେ I
ମୁଖ୍ୟ ଅତିଥି ଭାବରେ ସମ୍ମିଳନୀକୁ ସମ୍ବୋଧିତ କରି ଷଢ଼େଇକଳା ଖରସୁଆଁର ଉପଆୟୁକ୍ତ ନୀତିଶ କୁମାର ସିଂହ ଗୁରୁତ୍ବାରୋପ କରି କହିଥିଲେ ଯେ, ନାଗରିକ ସମାଜର ଆଚରଣଗତ ପରିବର୍ତ୍ତନ ସହିତ ଯୋଡ଼ି ହେଲେ ହିଁ ଆଇନଗତ ନିୟମାବଳୀରୁ ଦୀର୍ଘସ୍ଥାୟୀ ଫଳାଫଳ ମିଳିପାରିବା ଅପପୁଷ୍ଟି ନିରାକରଣ, ଜନସ୍ବାସ୍ଥ୍ୟ ଓ ପରିମଳ ବ୍ୟବସ୍ଥାର ସୁଦୃଢ଼ୀକରଣ ଏବଂ ବର୍ଜ୍ୟବସ୍ତୁ ସଂଗ୍ରହ ବ୍ୟବସ୍ଥାକୁ ସୁବ୍ୟବସ୍ଥିତ କରିବା ପାଇଁ ଜିଲ୍ଲା ପ୍ରଶାସନ ଦ୍ବାରା ନିଆ ଯାଇଥିବା ବିଭିନ୍ନ ଲକ୍ଷ୍ୟଭିଭିକ ପଦକ୍ଷେପ ସମ୍ପର୍କରେ ସୂଚନା ଦେଇ, ସେ ସ୍ଥାନୀୟ ଅନୁଷ୍ଠାନ ତଥା ବ୍ୟବସାୟିକ ପ୍ରତିଷ୍ଠାନଗୁଡ଼ିକୁ ସଦ୍ୟତମ କଠିନ ବର୍ଜ୍ୟବସ୍ତୁ ପରିଚାଳନା ନିୟମାବଳୀର ଦୃଢ଼ ଅନୁପାଳନ ସୁନିଶ୍ଚିତ କରିବାକୁ ଆହ୍ୱାନ ଦେଇଥିଲେ ।
“କଠିନ ବର୍ଜ୍ୟବସ୍ତୁ ପରିଚାଳନା (ଏସଡବ୍ଲୁଏମ) ନିୟମାବଳୀ-୨୦୨୬, ସ୍ବଚ୍ଛତା ହିଁ ସେବା ଏବଂ ପୋଷଣ ମାସ” ବିଷୟବସ୍ତୁକୁ ନେଇ ଏହି ବାର୍ତ୍ତାଳାପ କାର୍ଯ୍ୟକ୍ରମ ଆୟୋଜିତ ହୋଇଥିଲା । କର୍ମଶାଳାରେ ଉକ୍ତ ବିଷୟ ଗୁଡ଼ିକର ବିଭିନ୍ନ ଦିଗ ଉପରେ ପ୍ରଶାସନ, ବିଶେଷଜ୍ଞ ଏବଂ ଗଣମାଧ୍ୟମ ପ୍ରତିନିଧଙ୍କ ମଧ୍ୟରେ ଆଲୋଚନା ପାଇଁ ସୁଯୋଗ ସୃଷ୍ଟି କରିଥିଲା I
ଅନ୍ୟମାନଙ୍କ ମଧ୍ୟରେ ସାମାଜିକ କର୍ମୀ ପଦ୍ମଶ୍ରୀ ଛୁଟନୀ ମହାତୋ, ଦୂରଦର୍ଶନ ଝାଡ଼ଖଣ୍ଡର ସହାୟକ ନିର୍ଦ୍ଦେଶକ ଦିବାକର କୁମାର ପ୍ରମୁଖ ଅତିଥି ଭାବେ ଯୋଗ ଦେଇଥିଲେ । ପିଆଇବି ରାଞ୍ଚିର ଗୌରବ କୁମାର ପୁଷ୍କର ଅତିଥି ମାନଙ୍କୁ ସ୍ବାଗତ କରିବା ସହିତ କାର୍ଯ୍ୟକ୍ରମ ପରିଚାଳନା କରିଥିଲେ ।