ଆଜିର ତାରିଖ ୧୮ ନଭେମ୍ବର ୨୦୨୬
୧. ଜାତୀୟ ପ୍ରାକୃତିକ ଚିକିତ୍ସା ଦିବସ (National Naturopathy Day)- ଭାରତରେ ପ୍ରତିବର୍ଷ ନଭେମ୍ବର ୧୮ରେ ଜାତୀୟ ପ୍ରାକୃତିକ ଚିକିତ୍ସା ଦିବସ ପାଳନ କରାଯାଏ। ପ୍ରାକୃତିକ ଉପାୟରେ ସ୍ୱାସ୍ଥ୍ୟର ଯତ୍ନ, ଯୋଗ, ସୁସ୍ଥ ଜୀବନଶୈଳୀ ଓ ପ୍ରାକୃତିକ ଚିକିତ୍ସା ପଦ୍ଧତି ସମ୍ପର୍କରେ ଲୋକଙ୍କୁ ସଚେତନ କରିବା ଏହାର ଉଦ୍ଦେଶ୍ୟ। ମହାତ୍ମା ଗାନ୍ଧୀଙ୍କ ପ୍ରାକୃତିକ ଚିକିତ୍ସା ପ୍ରତି ଅବଦାନକୁ ସ୍ମରଣ କରି ଏହି ଦିବସ ପାଳନ କରାଯାଏ।
୨. ବିଶ୍ୱ ଆଣ୍ଟିମାଇକ୍ରୋବିଆଲ୍ ପ୍ରତିରୋଧ ସଚେତନତା ସପ୍ତାହ (World AMR Awareness Week): ପ୍ରତିବର୍ଷ ନଭେମ୍ବର ୧୮ରୁ ୨୪ ତାରିଖ ପର୍ଯ୍ୟନ୍ତ ଏହି ସପ୍ତାହ ପାଳନ କରାଯାଏ। ଆଣ୍ଟିବାୟୋଟିକ୍ ଓ ଅନ୍ୟ ଔଷଧର ଅନିୟନ୍ତ୍ରିତ ବ୍ୟବହାର ଯୋଗୁଁ ଜୀବାଣୁ ଔଷଧ ପ୍ରତି ପ୍ରତିରୋଧକ ହୋଇଯିବା ସମସ୍ୟା ବିଷୟରେ ସଚେତନତା ସୃଷ୍ଟି କରିବା ଏହାର ମୁଖ୍ୟ ଲକ୍ଷ୍ୟ।
୩. ଶିଶୁଙ୍କ ଯୌନ ଶୋଷଣ, ନିର୍ଯାତନା ଓ ହିଂସାର ପ୍ରତିରୋଧ ଏବଂ ଆରୋଗ୍ୟ ପାଇଁ ବିଶ୍ୱ ଦିବସ (World Day for the Prevention of and Healing from Child Sexual Exploitation, Abuse and Violence): ଜାତିସଂଘ ପକ୍ଷରୁ ପ୍ରତିବର୍ଷ ନଭେମ୍ବର ୧୮ରେ ଏହି ଦିବସ ପାଳନ କରାଯାଏ। ଶିଶୁଙ୍କ ସୁରକ୍ଷା, ଶୋଷଣ ଓ ନିର୍ଯାତନାର ପ୍ରତିରୋଧ, ପୀଡ଼ିତଙ୍କୁ ସହାୟତା ଏବଂ ସେମାନଙ୍କ ମାନସିକ ଓ ସାମାଜିକ ପୁନର୍ବାସ ଉପରେ ଏହି ଦିବସ ଗୁରୁତ୍ୱ ଦିଏ। ୨୦୨୨ରେ ଜାତିସଂଘ ସାଧାରଣ ସଭା ଏହି ଦିବସ ପାଳନ ପାଇଁ ଘୋଷଣା କରିଥିଲା।
ବିଶିଷ୍ଟ ବ୍ୟକ୍ତିଙ୍କ ଜନ୍ମ ଦିବସ:-
୧. ଭି. ଶାନ୍ତାରାମ (୧୯୦୧): ଭାରତୀୟ ସିନେମାର ଜଣେ ପ୍ରସିଦ୍ଧ ନିର୍ଦ୍ଦେଶକ, ଅଭିନେତା ଓ ପ୍ରଯୋଜକ ଥିଲେ। ସାମାଜିକ ବାର୍ତ୍ତା ଓ ନୂତନ ଚଳଚ୍ଚିତ୍ର ଶୈଳୀ ପାଇଁ ସେ ବେଶ୍ ପରିଚିତ ଥିଲେ। ‘ଡକ୍ଟର କୋଟନିସ୍ କି ଅମର କହାନୀ’, ‘ଦୋ ଆଖେଁ ବାରହ ହାଥ୍’ ଭଳି ଚଳଚ୍ଚିତ୍ର ତାଙ୍କର ଉଲ୍ଲେଖନୀୟ କୃତି।
୨. ବଟୁକେଶ୍ୱର ଦତ୍ତ (୧୯୧୦): ଭାରତର ଜଣେ ସ୍ୱାଧୀନତା ସଂଗ୍ରାମୀ ଥିଲେ। ସେ ଭଗତ ସିଂହଙ୍କ ସହଯୋଗୀ ଥିଲେ। ୧୯୨୯ ମସିହାରେ ଦିଲ୍ଲୀର କେନ୍ଦ୍ରୀୟ ବିଧାନସଭାରେ ଭଗତ ସିଂହଙ୍କ ସହ ଏକ ପ୍ରତିବାଦମୂଳକ କାର୍ଯ୍ୟରେ ଭାଗ ନେଇଥିଲେ। ବ୍ରିଟିଶ ଶାସନ ବିରୋଧରେ ତାଙ୍କର ସଂଗ୍ରାମ ଭାରତୀୟ ଇତିହାସରେ ସ୍ମରଣୀୟ।
୩. ତିରୁମଲାଇ କୃଷ୍ଣମାଚାର୍ଯ୍ୟ (୧୮୮୮): ତିରୁମଲାଇ କୃଷ୍ଣମାଚାର୍ଯ୍ୟ ଜଣେ ପ୍ରସିଦ୍ଧ ଯୋଗଗୁରୁ ଓ ଆୟୁର୍ବେଦ ବିଦ୍ୱାନ ଥିଲେ। ଆଧୁନିକ ଯୋଗ ଅଭ୍ୟାସର ବିକାଶ ଓ ପ୍ରସାରରେ ତାଙ୍କର ବିଶେଷ ଅବଦାନ ରହିଛି। ତାଙ୍କୁ ଆଧୁନିକ ଯୋଗର ଅନ୍ୟତମ ପ୍ରମୁଖ ପ୍ରବର୍ତ୍ତକ ଭାବେ ଗଣାଯାଏ।
୪. କମଳ ନାଥ (୧୯୪୬): ଭାରତର ଜଣେ ବରିଷ୍ଠ ରାଜନେତା। ସେ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଭାବେ କାର୍ଯ୍ୟ କରିଥିବା ସହ କେନ୍ଦ୍ର ସରକାରରେ ବିଭିନ୍ନ ମନ୍ତ୍ରୀପଦ ମଧ୍ୟ ସମ୍ଭାଳିଛନ୍ତି। ଦୀର୍ଘ ଦିନ ଧରି ସେ ଜାତୀୟ ରାଜନୀତିରେ ସକ୍ରିୟ ଅଛନ୍ତି।
୫. ରଞ୍ଜନ ଗୋଗୋଇ (୧୮ ନଭେମ୍ବର ୧୯୫୪): ଭାରତର ପୂର୍ବତନ ପ୍ରଧାନ ବିଚାରପତି। ସେ ଭାରତର ୪୬ତମ ପ୍ରଧାନ ବିଚାରପତି ଭାବେ ୨୦୧୮ରୁ ୨୦୧୯ ପର୍ଯ୍ୟନ୍ତ ଦାୟିତ୍ୱ ତୁଲାଇଥିଲେ। ତାଙ୍କର ଜନ୍ମ ଆସାମର ଡିବ୍ରୁଗଡ଼ରେ ହୋଇଥିଲା।
ବିଶିଷ୍ଟ ବ୍ୟକ୍ତିଙ୍କ ତିରୋଧାନ ଦିବସ:-
୧. ଭି. ଓ. ଚିଦାମ୍ବରମ୍ ପିଲ୍ଲାଇ (୧୯୩୬): ଭାରତର ଜଣେ ସ୍ୱାଧୀନତା ସଂଗ୍ରାମୀ, ଆଇନଜୀବୀ ଓ ଉଦ୍ୟୋଗପତି ଥିଲେ। ସେ ‘କପ୍ପାଲୋଟ୍ଟିୟ ତାମିଝାନ୍’ ନାମରେ ପରିଚିତ। ବ୍ରିଟିଶ ଜାହାଜ କମ୍ପାନୀର ଏକଚାଟିଆ ବ୍ୟବସାୟକୁ ଚ୍ୟାଲେଞ୍ଜ କରି ସ୍ୱଦେଶୀ ଷ୍ଟିମ୍ ନାଭିଗେସନ୍ କମ୍ପାନୀ ଆରମ୍ଭ କରିଥିଲେ। ୧୯୩୬ ନଭେମ୍ବର ୧୮ରେ ତାଙ୍କର ଦେହାନ୍ତ ହୋଇଥିଲା।
୨. ନାରାୟଣ ଦେବରାଓ ପାଣ୍ଡରିପାଣ୍ଡେ (୨୦୦୧): ‘ନାଡେପ୍ କାକା’ ଭାବେ ପରିଚିତ ଥିଲେ। ସେ ଜଣେ ଗାନ୍ଧୀବାଦୀ ଚିନ୍ତାଧାରାର ବ୍ୟକ୍ତି ଓ ପ୍ରାକୃତିକ କମ୍ପୋଷ୍ଟ ସାର ପ୍ରସ୍ତୁତି ପ୍ରଣାଳୀର ପ୍ରବର୍ତ୍ତକ ଥିଲେ। ତାଙ୍କ ଉଦ୍ଭାବିତ ନାଡେପ୍ ପ୍ରଣାଳୀ କୃଷି କ୍ଷେତ୍ରରେ ଜୈବିକ ସାର ପ୍ରସ୍ତୁତିକୁ ନୂଆ ଦିଗ ଦେଇଥିଲା। ୨୦୦୧ ନଭେମ୍ବର ୧୮ରେ ତାଙ୍କର ପରଲୋକ ହୋଇଥିଲା।
୩. ଏସ୍. ଆର୍. ଡି. ବୈଦ୍ୟନାଥନ୍ (୨୦୧୩): ଦକ୍ଷିଣ ଭାରତୀୟ ଶାସ୍ତ୍ରୀୟ ସଙ୍ଗୀତ ଜଗତର ଜଣେ ପ୍ରସିଦ୍ଧ ନାଦସ୍ୱରମ୍ ବାଦକ ଓ ସଙ୍ଗୀତକାର ଥିଲେ। କର୍ଣ୍ଣାଟକୀ ସଙ୍ଗୀତରେ ତାଙ୍କର ବିଶେଷ ଅବଦାନ ରହିଥିଲା। ୨୦୧୩ ନଭେମ୍ବର ୧୮ରେ ତାଙ୍କର ଦେହାନ୍ତ ହୋଇଥିଲା।
ନଜର ପକାନ୍ତୁ ଆଜିର ଦିନରେ ଘଟିଥିବା ଗୁରୁତ୍ୱପୂର୍ଣ୍ଣ ଘଟଣାବଳୀ ଉପରେ:-
୧୧୪୨୧ – ଉତ୍ତର ସାଗର ଉପକୂଳରେ ବନ୍ୟା ଯୋଗୁଁ ନେଦରଲ୍ୟାଣ୍ଡର ଅନେକ ଅଞ୍ଚଳ ଜଳମଗ୍ନ ହୋଇଥିଲା। ଏହି ବନ୍ୟାରେ ହଜାର ହଜାର ଲୋକଙ୍କ ଜୀବନ ଯାଇଥିଲା।
୧୮୬୩ – ଆମେରିକାର ତତ୍କାଳୀନ ରାଷ୍ଟ୍ରପତି ଆବ୍ରାହାମ୍ ଲିଙ୍କନ୍ ଗେଟିସବର୍ଗ ଅଭିମୁଖେ ଯାତ୍ରା କରିଥିଲେ। ପରଦିନ ସେଠାରେ ଯୁଦ୍ଧରେ ପ୍ରାଣ ହରାଇଥିବା ସୈନିକଙ୍କ ସ୍ମୃତିରେ ଆୟୋଜିତ ସମାରୋହରେ ସେ ଐତିହାସିକ ଗେଟିସବର୍ଗ ଭାଷଣ ଦେଇଥିଲେ।
୧୮୮୩ – ଆମେରିକା ଓ କାନାଡାର ରେଳପଥଗୁଡ଼ିକ ଚାରିଟି ମୁଖ୍ୟ ଟାଇମ୍ ଜୋନ୍ ବ୍ୟବସ୍ଥା ଗ୍ରହଣ କରିଥିଲେ। ରେଳ ଚଳାଚଳରେ ସମୟ ସମ୍ପର୍କିତ ଦ୍ୱନ୍ଦ୍ୱ ଦୂର କରିବା ଏହାର ମୁଖ୍ୟ ଉଦ୍ଦେଶ୍ୟ ଥିଲା।
୧୯୧୬ – ପ୍ରଥମ ବିଶ୍ୱଯୁଦ୍ଧ ସମୟରେ ଫ୍ରାନ୍ସର ସୋମ୍ ଅଞ୍ଚଳରେ ଚାଲିଥିବା ଯୁଦ୍ଧ ଶେଷ ହୋଇଥିଲା। ବ୍ରିଟିଶ ଓ ଫ୍ରାନ୍ସ ସେନା ଜର୍ମାନ ସେନା ବିରୋଧରେ ଏହି ଯୁଦ୍ଧ ଲଢ଼ିଥିଲେ। ଏହା ପ୍ରଥମ ବିଶ୍ୱଯୁଦ୍ଧର ସବୁଠାରୁ ଭୟଙ୍କର ଓ ଲମ୍ବା ଯୁଦ୍ଧ ମଧ୍ୟରୁ ଅନ୍ୟତମ ଥିଲା।
୧୯୨୮ – ୱାଲ୍ଟ ଡିଜନିଙ୍କ ଆନିମେସନ୍ ଚଳଚ୍ଚିତ୍ର ‘ଷ୍ଟିମ୍ବୋଟ୍ ୱିଲି’ ନ୍ୟୁୟର୍କର କଲୋନୀ ଥିଏଟରରେ ପ୍ରଦର୍ଶିତ ହୋଇଥିଲା। ଏହି ଚଳଚ୍ଚିତ୍ର ମାଧ୍ୟମରେ ମିକି ମାଉସ୍ ଚରିତ୍ର ପ୍ରଥମଥର ପାଇଁ ଦର୍ଶକଙ୍କ ସାମ୍ନାକୁ ଆସିଥିଲା। ଏହାକୁ ସମନ୍ୱିତ ଧ୍ୱନି ସହ ପ୍ରଦର୍ଶିତ ପ୍ରଥମ କାର୍ଟୁନ୍ ଚଳଚ୍ଚିତ୍ର ଭାବେ ଗୁରୁତ୍ୱ ଦିଆଯାଏ।
୧୯୬୩ – ଆମେରିକାରେ ପ୍ରଥମ ଥର ପାଇଁ ସାଧାରଣ ଲୋକଙ୍କ ବ୍ୟବହାର ପାଇଁ ପୁଶ୍ ବଟନ୍ ଟେଲିଫୋନ୍ ଉପଲବ୍ଧ ହୋଇଥିଲା। ଏହା ପୂର୍ବରୁ ଅଧିକାଂଶ ଟେଲିଫୋନ୍ରେ ନମ୍ବର ଡାଏଲ୍ କରିବା ପାଇଁ ଘୂର୍ଣ୍ଣନଶୀଳ ଡାଏଲ୍ ବ୍ୟବସ୍ଥା ରହିଥିଲା।
୧୯୮୫ – ‘ବିଲ୍ ୱାଟରସନ୍ଙ୍କ ଲୋକପ୍ରିୟ କମିକ୍ସ ‘କ୍ୟାଲଭିନ୍ ଆଣ୍ଡ ହବ୍ସ’ ପ୍ରଥମଥର ପାଇଁ ଦଶଟି ଖବରକାଗଜରେ ପ୍ରକାଶ ପାଇଥିଲା। ପରେ ଏହା ବିଶ୍ୱର ଅନ୍ୟତମ ଲୋକପ୍ରିୟ କମିକ୍ସ ଭାବେ ପରିଚିତ ହୋଇଥିଲା।
୧୯୯୧ – ଲେବାନନ୍ରେ ଚାରି ବର୍ଷରୁ ଅଧିକ ସମୟ ଧରି ବନ୍ଦୀ ଥିବା ବ୍ରିଟିଶ ଧାର୍ମିକ ପ୍ରତିନିଧି ଟେରି ୱେଟ୍ଙ୍କୁ ମୁକ୍ତ କରାଯାଇଥିଲା। ତାଙ୍କ ସହ ଆମେରିକୀୟ ଶିକ୍ଷାବିତ୍ ଥୋମାସ୍ ସଦରଲ୍ୟାଣ୍ଡ ମଧ୍ୟ ମୁକ୍ତ ହୋଇଥିଲେ।