ନାବାଳିକାଙ୍କୁ ଦୁଷ୍କର୍ମ ଅଭିଯୋଗ: ଏଏସଆଇ, ହୋମଗାର୍ଡ ଗିରଫ

ମୟୂରଭଞ୍ଜ,୧୮.୧୦.୨୦୨୩: ଦୁଇ ନାବାଳିକାଙ୍କୁ ଯୌନ ନିର୍ଯାତନା ଦେବା ଅଭିଯୋଗରେ ମୟୂରଭଞ୍ଜ ଜିଲ୍ଲାରେ ଜଣେ ଆସିଷ୍ଟାଣ୍ଟ ସବ୍ ଇନ୍ସପେକ୍ଟର (ଏଏସ୍ଆଇ) ଓ ଜଣେ ହୋମଗାର୍ଡ ଗିରଫ ହୋଇଛନ୍ତି। ଉଭୟ ଅଭିଯୁକ୍ତ ଜାମଦା ଥାନାରେ କାର୍ଯ୍ୟରତ ଥିଲେ।

ସେମାନଙ୍କ ବିରୋଧରେ ଯୌନ ଅପରାଧରୁ ଶିଶୁ ସୁରକ୍ଷା ଆଇନର ବିଭିନ୍ନ ଧାରାରେ ମାମଲା ରୁଜୁ କରାଯାଇଛି। ଉଭୟ ମାମଲାର ଅଧିକ ତଦନ୍ତ ପ୍ରାଥମିକତା ଭିତ୍ତିରେ କରାଯାଉଛି ବୋଲି ମୟୂରଭଞ୍ଜ ଏସପି ବି.ଗଙ୍ଗାଧର କହିଛନ୍ତି।

ମିଳିଥିବା ସୂଚନା ଅନୁଯାୟୀ, ଏଏସଆଇ ଆନନ୍ଦ ମାଝୀ (୩୯) କିଛି ମାସ ତଳେ ପତ୍ନୀଙ୍କ ମୃତ୍ୟୁ ପରେ ନିଜ ଘରେ କାମ କରୁଥିବା ଜଣେ ୧୬ ବର୍ଷୀୟା ନାବାଳିକାଙ୍କ ସହ ରହୁଥିଲେ। ନାବାଳିକାଙ୍କ ମାଉସୀ ତାଙ୍କୁ ନାବାଳିକା ଦର୍ଶାଇ ଅଭିଯୋଗ କରିବା ପରେ ଅଭିଯୁକ୍ତକୁ ଗିରଫ କରାଯାଇଛି। ଅନ୍ୟପକ୍ଷରେ ହୋମଗାର୍ଡ ଦେବେନ୍ଦ୍ର ପାତ୍ର (୩୫) ଗତ ଅକ୍ଟୋବର ୧୨ ତାରିଖରେ ଝାଡ଼ଖଣ୍ଡର ଜଣେ ୧୫ ବର୍ଷୀୟା ନାବାଳିକାଙ୍କୁ କଳାଯାଦୁ ବ୍ୟବହାର କରି ତାଙ୍କ ଜଣେ ସମ୍ପର୍କୀୟଙ୍କୁ ଚିକିତ୍ସା କରିବା ବାହାନାରେ ଦୁଷ୍କର୍ମ କରିଥିବା ଅଭିଯୋଗ ହୋଇଥିଲା।