ସମ୍ବଲପୁର, ୦୩/୧୧: ମହାନଦୀ କୋଲଫିଲ୍ଡସ ଲିମିଟେଡ୍ (ଏମ୍ସିଏଲ୍) କୋଇଲା ମନ୍ତ୍ରଣାଳୟର ବର୍ଷ ୨୦୨୪-୨୫ ପାଇଁ ଆୟୋଜିତ ‘ଷ୍ଟାର୍ ରେଟିଂ ଆୱାର୍ଡସ’ରେ ଏକ ପ୍ରମୁଖ ସଫଳତା ହାସଲ କରିଛି। କମ୍ପାନୀର ୧୪ଟି କୋଇଲା ଖଣି ସେମାନଙ୍କର ଉତ୍କୃଷ୍ଟ ପ୍ରଦର୍ଶନ ପାଇଁ ‘ଷ୍ଟାର୍ ରେଟିଂ’ ଲାଭ କରିଛନ୍ତି। ୫ଟି ଓପନକାଷ୍ଟ ଖଣି — ଲାଜକୁରା ଓସିପି, ସିଆରମାଲ ଓସିପି, ଅନନ୍ତ ଓସିପି, ଲିଙ୍ଗରାଜ ଓସିପି, ସମଲେଶ୍ୱରୀ ଓସିପି ଏବଂ ତା’ ସହିତ ହୀରାଖଣ୍ଡ ବୁନ୍ଦିଆ ଭୂଗର୍ଭସ୍ଥ ଖଣିକୁ ପ୍ରତିଷ୍ଠିତ ୫-ଷ୍ଟାର୍ ରେଟିଂ ପ୍ରଦାନ କରାଯାଇଛି।
ରାୟପୁରଠାରେ ଆୟୋଜିତ ଏକ ଭବ୍ୟ ସମାରୋହରେ କେନ୍ଦ୍ର କୋଇଲା ଓ ଖଣି ରାଷ୍ଟ୍ରମନ୍ତ୍ରୀ ଶ୍ରୀ ସତୀଶ ଚନ୍ଦ୍ର ଦୁବେଙ୍କ ଠାରୁ ଏମ୍ସିଏଲ୍ର ଅଧ୍ୟକ୍ଷ-ସହ-ପରିଚାଳନା ନିର୍ଦ୍ଦେଶକ (ସିଏମ୍ଡି) ଶ୍ରୀ ଉଦୟ ଅନନ୍ତ କାଓଲେ ଏହି ପୁରସ୍କାରଗୁଡ଼ିକୁ ଗ୍ରହଣ କରିଛନ୍ତି। ଏହି କାର୍ଯ୍ୟକ୍ରମରେ କୋଲ ଇଣ୍ଡିଆ ଲିମିଟେଡ୍ର ଅଧ୍ୟକ୍ଷ ଏବଂ କୋଇଲା ମନ୍ତ୍ରଣାଳୟର ଅନ୍ୟାନ୍ୟ ବରିଷ୍ଠ ପଦାଧିକାରୀମାନେ ଉପସ୍ଥିତ ଥିଲେ।
ଏହା ବ୍ୟତୀତ, ୫ଟି ଓପନକାଷ୍ଟ ଖଣି — ଗର୍ଜନବାହାଲ ଓସିପି, ଗୋପାଳଜୀ-କଣିହାଁ ସମ୍ପ୍ରସାରଣ ଓସିପି, ଭୁବନେଶ୍ୱରୀ ଓସିପି, ହିଙ୍ଗୁଳା ଓସିପି, ଜଗନ୍ନାଥ କୋଲିୟାରୀ ଏବଂ ତା’ ସହିତ ନନ୍ଦିରା ଭୂଗର୍ଭସ୍ଥ ଖଣିକୁ ୪-ଷ୍ଟାର୍ ରେଟିଂ ମିଳିଛି। ଅନ୍ୟ ଦୁଇଟି ଓପନକାଷ୍ଟ ଖଣି, ବସୁନ୍ଧରା ୱେଷ୍ଟ ଓସିପି ଏବଂ ଭରତପୁର ଏରିଆ ୩-ଷ୍ଟାର୍ ରେଟିଂ ହାସଲ କରିଛନ୍ତି।
ଏହି ସଫଳତା ପାଇଁ ଟିମ୍ ଏମ୍ସିଏଲ୍କୁ ଶୁଭେଚ୍ଛା ଜଣାଇ ସିଏମ୍ଡି ଶ୍ରୀ କାଓଲେ କହିଛନ୍ତି, “ଏହି ସମ୍ମାନ ଦେଶକୁ ନିରବଚ୍ଛିନ୍ନ ଶକ୍ତି ଯୋଗାଣ ସୁନିଶ୍ଚିତ କରିବା ସହ ସୁରକ୍ଷିତ, ସ୍ଥାୟୀ ଏବଂ ପ୍ରଯୁକ୍ତିବିଦ୍ୟା-ଆଧାରିତ ଖନନ ପଦ୍ଧତି ପ୍ରତି ଆମର ଦୃଢ଼ ପ୍ରତିବଦ୍ଧତାକୁ ଦର୍ଶାଉଛି। ଏମ୍ସିଏଲ୍ କାର୍ଯ୍ୟକ୍ଷମତା, ପରିବେଶ ସୁରକ୍ଷା ଏବଂ ସାମାଜିକ କଲ୍ୟାଣ କ୍ଷେତ୍ରରେ ନିରନ୍ତର ଶ୍ରେଷ୍ଠତା ବଜାୟ ରଖିବା ପାଇଁ ପ୍ରୟାସ ଜାରି ରଖିବ।
ଏହି ସଫଳତା କାର୍ଯ୍ୟକାରୀ ଉତ୍କର୍ଷତା, ସୁରକ୍ଷା, ପରିବେଶର ସ୍ଥିରତା ଏବଂ ଦାୟିତ୍ୱବାନ୍ ଖନନ ଉପରେ ଏମ୍ସିଏଲ୍ର ନିରବଚ୍ଛିନ୍ନ ଧ୍ୟାନକୁ ପ୍ରତିଫଳିତ କରୁଛି, ଯାହା କୁଶଳ ଓ ସ୍ଥାୟୀ କୋଇଲା ଉତ୍ପାଦନ ମାଧ୍ୟମରେ ଦେଶର ଶକ୍ତି ସୁରକ୍ଷା ସୁନିଶ୍ଚିତ କରିବା ପାଇଁ କମ୍ପାନୀର ସଂକଳ୍ପକୁ ନିଶ୍ଚିତ କରେ।