ଋଣରେ ଶ୍ରେଷ୍ଠ ପ୍ରଦର୍ଶନ କାରୀ ବ୍ୟାଙ୍କ ପାଇଁ ମୁଖ୍ୟମନ୍ତ୍ରୀ ପୁରସ୍କାର

ଭୁବନେଶ୍ଵର, ୦୬/୦୧/୨୦୨୪: ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ କହିଛନ୍ତି ଯେ ଏକ ସୁଦୃଢ଼ ଅର୍ଥନୀତି ଗଠନ ପାଇଁ କୃଷି, ଏମଏସଏମଇ ଏବଂ ମିଶନ ଶକ୍ତି ଗୋଷ୍ଠୀକୁ ଋଣ ଦେବା ଏକ ପ୍ରାଥମିକ ଆବଶ୍ୟକତା । ଏହି ପ୍ରମୁଖ କ୍ଷେତ୍ରଗୁଡିକୁ ଋଣ ପ୍ରଦାନ କରିବା ପାଇଁ ଚାମ୍ପିଅନ୍ ବ୍ୟାଙ୍କଗୁଡ଼ିକୁ ନଗଦ ପୁରସ୍କାର ପ୍ରଦାନ କରିବା ଅବସରରେ ସେ ଏହା କହିଛନ୍ତି।

ଲୋକସେବା ଭବନସ୍ଥିତ କନଭେନସନ୍ ସେଣ୍ଟରରେ କୋର ସେକ୍ଟରକୁ ଋଣ ପ୍ରଦାନରେ ଶ୍ରେଷ୍ଠ ପ୍ରଦର୍ଶନ କରୁଥିବା ବ୍ୟାଙ୍କଗୁଡ଼ିକୁ ପୁରସ୍କୃତ କରିବା ପାଇଁ ଏକ କାର୍ଯ୍ୟକ୍ରମର ଆୟୋଜନ କରାଯାଇଥିଲା।

ଏହି ଅବସରରେ ମୁଖ୍ୟମନ୍ତ୍ରୀ କହିଥିଲେ ଯେ ମୁଁ ଆମ ଅର୍ଥନୀତିର ତିନୋଟି ମୌଳିକ ସ୍ତମ୍ଭ କୃଷି, ଏମଏସଏମଇ ଏବଂ ମିଶନ ଶକ୍ତି ଗୋଷ୍ଠୀକୁ ସର୍ବାଧିକ ପ୍ରାଥମିକତା ଦେଉଛି । ଏହି କ୍ଷେତ୍ରଗୁଡ଼ିକ ପାଇଁ ବଜେଟ୍ ବ୍ୟବସ୍ଥାକୁ ଯଥେଷ୍ଟ ବୃଦ୍ଧି କରାଯାଇଛି ଏବଂ ଲୋକଙ୍କ ଉପରେ ସୁଧ ବୋଝ ହ୍ରାସ କରିବା ପାଇଁ ଆମେ ସୁଧ ରିହାତି ମଧ୍ୟ ପ୍ରଦାନ କରୁଛୁ।

କୃଷି, ଆନୁଷଙ୍ଗିକ କ୍ଷେତ୍ର, ଏମଏସଏମଇ ଏବଂ ମହିଳା ସ୍ୱୟଂ ସହାୟକ ଗୋଷ୍ଠୀ ଭଳି ପ୍ରମୁଖ କ୍ଷେତ୍ରକୁ ପର୍ଯ୍ୟାପ୍ତ ପରିମାଣର ଋଣ ଉପଲବ୍ଧ କରାଇବା ଏକ ଦୃଢ଼ ଭିତ୍ତିଭୂମି ସହିତ ଅର୍ଥନୀତି ଗଠନ ପାଇଁ ଏକ ପ୍ରାଥମିକ ଆବଶ୍ୟକତା ବୋଲି ସେ କହିଥିଲେ।

ମହିଳା ସ୍ୱୟଂ ସହାୟକ ଗୋଷ୍ଠୀର ଗୁରୁତ୍ୱ ଉପରେ ଆଲୋକପାତ କରି ମୁଖ୍ୟମନ୍ତ୍ରୀ କହିଥିଲେ ଯେ ଗ୍ରାମୀଣ ଅର୍ଥନୀତିକୁ ସୁଦୃଢ଼ କରିବା ଦିଗରେ ରାଜ୍ୟର ମିଶନ ଶକ୍ତି ଗୋଷ୍ଠୀଗୁଡ଼ିକ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛନ୍ତି । ସରକାର ସେମାନଙ୍କୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ସୁଧ ରିହାତି ପ୍ରଦାନ କରୁଛନ୍ତି। ମିଶନ ଶକ୍ତି ସ୍କୁଟର ଯୋଜନା ଜରିଆରେ ସେମାନଙ୍କୁ ସେମାନଙ୍କ ଉତ୍ପାଦର ମାର୍କେଟିଂ ଏବଂ ବ୍ୟବସାୟକୁ ବିସ୍ତାର କରିବାପାଇଁ ସଶକ୍ତ କରାଯାଇଛି । ସେମାନଙ୍କୁ ଏସଏମଇରେ ପରିଣତ କରିବାରେ ସାହାଯ୍ୟ କରିବା ପାଇଁ ବ୍ୟାଙ୍କରମାନେ ଆମର ପ୍ରୟାସକୁ ସମ୍ପୂରକ କରିବା ଆବଶ୍ୟକ।

ଏହି ମହତ କାର୍ଯ୍ୟ ପାଇଁ ସମସ୍ତ ବ୍ୟାଙ୍କ ଆଗେଇ ଆସିବାକୁ ସେ ଅନୁରୋଧ କରିଛନ୍ତି।

ସେ ସମସ୍ତ ପୁରସ୍କାର ବିଜେତା ବ୍ୟାଙ୍କଗୁଡ଼ିକୁ ଅଭିନନ୍ଦନ ଜଣାଇବା ସହ ଏହି ଅଗ୍ରାଧିକାର କ୍ଷେତ୍ରଗୁଡିକୁ ଋଣ ପ୍ରଦାନ ବୃଦ୍ଧି ପାଇଁ ଏହି ବ୍ୟାଙ୍କଗୁଡିକ ଅନ୍ୟ ବ୍ୟାଙ୍କମାନଙ୍କ ପାଇଁ ପ୍ରେରଣା ହେବ ବୋଲି ଆଶା ବ୍ୟକ୍ତ କରିଥିଲେ ।

ଚଳିତ ଆର୍ଥିକ ବର୍ଷ ପାଇଁ ରାଜ୍ୟ ସରକାର ୧.୬୦ ଲକ୍ଷ କୋଟି ଟଙ୍କାର ଉଚ୍ଚାକାଂକ୍ଷୀ ବାର୍ଷିକ ଋଣ ଯୋଜନା ଲକ୍ଷ୍ୟ ଧାର୍ଯ୍ୟ କରିଛନ୍ତି ବୋଲି ସେ ସୂଚନା ଦେଇଛନ୍ତି। ଏସିପି ଲକ୍ଷ୍ୟ ହାସଲ ଏବଂ ରାଜ୍ୟବାସୀଙ୍କ ଆକାଂକ୍ଷା ପୂରଣ ପାଇଁ ସମସ୍ତ ଜିଲ୍ଲା ଓ ବ୍ୟାଙ୍କ ମିଳିତ ଭାବେ କାର୍ଯ୍ୟ କରିବେ ବୋଲି ସେ ବିଶ୍ୱାସ ବ୍ୟକ୍ତ କରିଥିଲେ।

୨୦୨୨-୨୩ ଆର୍ଥିକ ବର୍ଷରେ ପ୍ରଥମ ଥର ପାଇଁ ୧ ଲକ୍ଷ ୩୫ ହଜାର କୋଟି ଟଙ୍କାର ବାର୍ଷିକ ଋଣ ଯୋଜନା ଅଧୀନରେ ଶତପ୍ରତିଶତ ଲକ୍ଷ୍ୟ ହାସଲ କରି ଓଡ଼ିଶା ଏକ ନୂଆ ମାଇଲଖୁଣ୍ଟ ସୃଷ୍ଟି କରିଛି ବୋଲି କହି ସେ ବ୍ୟାଙ୍କଗୁଡ଼ିକୁ ଏହି ଗତି ଜାରି ରଖିବାକୁ ଅନୁରୋଧ କରିଥିଲେ।

ଏହି ଅବସରରେ ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ କହିଥିଲେ ଯେ ଗତ ୧୦ ବର୍ଷ ମଧ୍ୟରେ ରାଜ୍ୟର ଅର୍ଥନୀତି ଜାତୀୟ ଅର୍ଥନୀତି ତୁଳନାରେ ଦ୍ରୁତ ଗତିରେ ବୃଦ୍ଧି ପାଇଛି।

ଅର୍ଥନୀତିକୁ ସୁଦୃଢ଼ କରିବା ପାଇଁ ଆମର ମୂଳ କ୍ଷେତ୍ରକୁ କ୍ରେଡିଟ୍ ଆମ ସରକାରଙ୍କ ଏକ ଅତ୍ୟାବଶ୍ୟକ ନୀତି ନିର୍ଦେଶ । ମୁଖ୍ୟମନ୍ତ୍ରୀ ପୁରସ୍କାର ବ୍ୟତୀତ ୩ଟି ବର୍ଗର ଅଗ୍ରାଧିକାର କ୍ଷେତ୍ର ଋଣ ଅଧୀନରେ ଉତ୍ତମ ପ୍ରଦର୍ଶନ ପାଇଁ ଅର୍ଥ ବିଭାଗ ୨୭୦ଟି ବ୍ୟାଙ୍କ ଶାଖାକୁ ପ୍ରଶଂସା ପ୍ରମାଣପତ୍ର ପ୍ରଦାନ କରିବ।

ଏହି ୩ଟି ପ୍ରମୁଖ କ୍ଷେତ୍ର ପାଇଁ ଚାମ୍ପିୟନ ବ୍ୟାଙ୍କଗୁଡ଼ିକୁ ପ୍ରଥମ ପୁରସ୍କାର ପାଇଁ ୫ ଲକ୍ଷ ଟଙ୍କା, ଦ୍ବିତୀୟ ପୁରସ୍କାର ପାଇଁ ୩ ଲକ୍ଷ ଟଙ୍କା ଏବଂ ତୃତୀୟ ପୁରସ୍କାର ପାଇଁ ୨ ଲକ୍ଷ ଟଙ୍କା ପ୍ରଦାନ କରାଯାଇଛି।

କୃଷି କ୍ଷେତ୍ରରେ ଏସବିଆଇ ଜୟପାଟଣା ଏଡିବି ଶାଖା କଳାହାଣ୍ଡି ପ୍ରଥମ, ଆକ୍ସିସ ବ୍ୟାଙ୍କ ବ୍ରହ୍ମପୁର ଶାଖା ଦ୍ବିତୀୟ ଓ ଏସବିଆଇ ସେମିଲିଗୁଡା ଶାଖା କୋରାପୁଟ ତୃତୀୟ ପୁରସ୍କାର ପାଇଛି।

ଏମ୍ ଏସ୍ ଏମ୍ ଇ ଋଣ ପାଇଁ ବ୍ୟାଙ୍କ ଅଫ୍ ଇଣ୍ଡିଆ ଜୟଦେବ ବିହାର ଶାଖା ଖୋର୍ଦ୍ଧା ପ୍ରଥମ, ପିଏନ୍ ବି ବାଲେଶ୍ୱର ଶାଖା ଦ୍ବିତୀୟ ଓ ୟୁକୋ ବ୍ୟାଙ୍କ ଜୟପୁର ଶାଖା ତୃତୀୟ ପୁରସ୍କାର ପାଇଥିଲା।

ମହିଳା ସ୍ୱୟଂ ସହାୟକ ଗୋଷ୍ଠୀକୁ ଋଣ ଦେବା ପାଇଁ ୟୁକୋ ବ୍ୟାଙ୍କ ଭୋଗରାଇ ବାଲେଶ୍ୱର ପ୍ରଥମ, ଏସବିଆଇ ସାଲେପୁର ଏଡିବି କଟକ ଦ୍ବିତୀୟ ଏବଂ ଏସବିଆଇ ସାଧେଇପଲ୍ଲୀ ସୁନ୍ଦରଗଡ଼ ତୃତୀୟ ପୁରସ୍କାର ପାଇଥିଲା।

ଶ୍ରେଷ୍ଠ ପ୍ରଦର୍ଶନ କାରୀ ବ୍ୟାଙ୍କ ବ୍ୟତୀତ ନିମ୍ନଲିଖିତ ବ୍ୟାଙ୍କଗୁଡ଼ିକୁ ୨୦୨୨-୨୩ ବର୍ଷ ପାଇଁ ମୁଖ୍ୟମନ୍ତ୍ରୀ ସମ୍ବର୍ଦ୍ଧିତ କରିଥିଲେ। କୃଷି ପାଇଁ ଓଡ଼ିଶା ରାଜ୍ୟ ସମବାୟ ବ୍ୟାଙ୍କ, ଏମଏସଏମଇ ପାଇଁ ଏସବିଆଇ, ମହିଳା ସ୍ୱୟଂ ସହାୟକ ଗୋଷ୍ଠୀ ପାଇଁ ଓଡ଼ିଶା ଗ୍ରାମ୍ୟ ବ୍ୟାଙ୍କକୁ ସମ୍ବର୍ଦ୍ଧିତ କରାଯାଇଥିଲା।

ସେହିପରି ୨୦୨୧-୨୨ ବର୍ଷ ପାଇଁ କୃଷି ପାଇଁ ଖୋର୍ଦ୍ଧା, ଏମଏସଏମଇ ପାଇଁ କଟକ ଓ ଡବ୍ଲୁଏସଏଚଜି ପାଇଁ ବାଲେଶ୍ୱରକୁ ଶ୍ରେଷ୍ଠ ପ୍ରଦର୍ଶନକାରୀ ଜିଲ୍ଲା ଭାବେ ସମ୍ମାନିତ କରାଯାଇଛି।

ଅର୍ଥ ବିଭାଗପ୍ରମୁଖ ଶାସନ ସଚିବ ବିଶାଲ ଦେବ ସଭାକୁ ସ୍ୱାଗତ କରିଥିବା ବେଳେ ସଂସ୍ଥାଗତ ଅର୍ଥ ନିର୍ଦ୍ଦେଶିକା ପ୍ରଜ୍ଞାସ୍ମିତା ସାହୁ ଧନ୍ୟବାଦ ଅର୍ପଣ କରିଥିଲେ। ଅନ୍ୟମାନଙ୍କ ମଧ୍ୟରେ ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଅନୁ ଗର୍ଗ, କୃଷି ଓ କୃଷକ ସଶକ୍ତୀକରଣ ବିଭାଗପ୍ରମୁଖ ଶାସନ ସଚିବ ଡ. ଅରବିନ୍ଦ କୁମାର ପାଢ଼ୀ, ଏମ୍ଏସ୍ଏମ୍ଇ ପ୍ରମୁଖ ଶାସନ ସଚିବ ଶାଶ୍ୱତ ମିଶ୍ର, ମିଶନ ଶକ୍ତି କମିଶନର ତଥା ସଚିବ ସୁଜାତା ଆର କାର୍ତ୍ତିକେୟନ, ରିଜର୍ଭ ବ୍ୟାଙ୍କର ଆଞ୍ଚଳିକ ନିର୍ଦେଶିକା ସାରଦା ପ୍ରସାଦ ମହାନ୍ତି ପ୍ରମୁଖ ଉପସ୍ଥିତ ଥିଲେ।