ଭୁବନେଶ୍ୱର, ୧୩/୦୨: ଆଜି ବିଧାନସଭାର ବଜେଟ୍ ଅଧିବେଶନ ଆରମ୍ଭ ହେବା ପୂର୍ବରୁ ହିଁ ଗୃହ ପରିସରରେ ବିରୋଧୀ ଦଳ ନେତା ଶ୍ରୀଯୁକ୍ତ ନବୀନ ପଟ୍ଟନାୟକ ପହଞ୍ଚୁ ପହଞ୍ଚୁ ଆରମ୍ଭ ହୋଇଛି ରାଜନୀତି। ନବୀନ ପହଞ୍ଚିବା କ୍ଷଣି ସାମ୍ନାରେ ଛିଡ଼ା ହୋଇଥିଲେ ଚମ୍ପୁଆ ବିଧାୟକ ସନାତନ ମହାକୁଡ଼। ନବୀନ ସିଧାସଳଖ ସନାତନ ମହାକୁଡ଼ଙ୍କୁ ପ୍ରଶ୍ନ କରିଥିଲେ ଯେ, ଗତ କାଲି କ’ଣ ପାଇଁ ବିଧାୟକ ଦଳୀୟ ବୈଠକକୁ ଆସିଲ ନାହିଁ। ଆପଣ ବିଜେପି ଆଡକୁ ମୁହାଁଉଛନ୍ତି କି? ସନାତନ ଉତ୍ତର ଦେଇଥିଲେ ଯେ, ଦେହ ଭଲ ହୋଇନଥିଲା। ପାଖରେ ଉପସ୍ଥିତ ଥିବା ବିଧାୟକ ସାରଦା ଜେନା ମଧ୍ୟ ସନାତନଙ୍କ ଶରୀର ଅସୁସ୍ଥ ଥିବା କଥା ଦୋହରାଇଥିଲେ।
ନବୀନଙ୍କ ଏପରି ଆଭିମୁଖ୍ୟକୁ ନେଇ ଏବେ ରାଜନୈତିକ ମହଲରେ ତୁମ୍ବିତୋଫାନ ଦେଖାଦେଇଛି। ବରିଷ୍ଠ ନେତା ବିଜୟ ପଟ୍ଟନାୟକ କହିଛନ୍ତି ଯେ, ଦଳ ଭିତରେ କିଛି ବିଶୃଙ୍ଖଳା ଥିବା ପରିଲକ୍ଷିତ ହେଉଛି। ବିଜେଡ଼ି ବିଧାୟକ ସନାତନ ମହାକୁଡ଼ କହିଛନ୍ତି ନବୀନ ଦଳର ମୁଖିଆ। ତେଣୁ ତାଙ୍କର ପ୍ରଶ୍ନ ପଚାରିବାର ଅଧିକାର ମଧ୍ୟ ଅଛି। ଏବେ ଦଳ ଛାଡି ନାହିଁ କିମ୍ବା ଭବିଷ୍ୟତରେ ଦଳ ଛାଡିବାର ସମ୍ଭାବନା ନାହିଁ।
ସୂଚନାଯୋଗ୍ୟ, ଗତ ଦୁଇ ମାସରେ ଦୁଇ ଥର ବିଧାୟକ ଦଳୀୟ ବୈଠକ ଅନୁଷ୍ଠିତ ହୋଇଥିଲେ ମଧ୍ୟ ସନାତନ ମହାକୁଡ଼ ସେହି ବୈଠକରେ ଯୋଗ ଦେଇନଥିଲେ। ଯାହାକୁ ନେଇ ନବୀନ ଖପ୍ପା ଥିଲେ।