ଭୁବନେଶ୍ୱର, ୧୫/୦୨: ଘରକୁ ବାହୁଡିଲେ ସୁର ରାଉତରାୟ। ୯ ମାସ ପରେ କଂଗ୍ରେସକୁ ଫେରିଛନ୍ତି। ଦଳ ବିରୋଧୀ କାର୍ଯ୍ୟ ଅଭିଯୋଗରେ କଂଗ୍ରେସରୁ ନିଲମ୍ବନ ହୋଇଥିଲେ ସୁର। ଆଜି ଦଳର ବିଭିନ୍ନ ନେତା ଓ ପୁଅ ସିଦ୍ଧାର୍ଥ ରାଉତରାୟଙ୍କ ଉପସ୍ଥିତିରେ କଂଗ୍ରେସ ଭବନରେ ପ୍ରବେଶ କରିଛନ୍ତି। ଏହି ସମୟରେ ଭାବ ବିହ୍ୱଳ ହୋଇ ଯାଇଥିଲେ ସୁର। ଅନ୍ୟାୟରେ ମୋତେ ଦଳରୁ କାଢି ଦିଆଯାଇଥିଲା। କଂଗ୍ରେସ ଭବନ ମୋ ପାଇଁ ମନ୍ଦିର। ନିଜ ଘରକୁ ଆଜି ଫେରିଛି। ଓପିସିସି ସଭାପତି ଭକ୍ତ ଦାସଙ୍କୁ ଧନ୍ୟବାଦ ଜଣାଉଛି ବୋଲି କହିଛନ୍ତି ସୁର।
ସୂଚନାଯୋଗ୍ୟ, ଗତ ଲୋକସଭା ଓ ବିଧାନସଭା ନିର୍ବାଚନ ସମୟରେ ସୁର ରାଉତରାୟ ତାଙ୍କ ପୁଅ ତଥା ବିଜେଡ଼ି ନେତା ମନ୍ମଥ ରାଉତରାୟଙ୍କ ପାଇଁ ପ୍ରଚାର କରୁଥିବା ବେଳେ ଦଳ ବିରୋଧୀ କାର୍ଯ୍ୟ ଅଭିଯୋଗରେ ଦଳରୁ ବିତାଡିତ କରିଥିଲେ ପୂର୍ବତନ କଂଗ୍ରେସ ସଭାପତି ଶରତ ପଟ୍ଟନାୟକ। ତେବେ ଗତ କିଛି ଦିନ ପୂର୍ବରୁ ନୂଆ ସଭାପତି ଭାବେ ନିଯୁକ୍ତ ହେବା ପରେ ଗତ କାଲି ଭକ୍ତ ଦାସ ନିଲମ୍ବିତ କଂଗ୍ରେସ ନେତାଙ୍କୁ ଦଳରେ ପୁଣି ଥରେ ଯୋଗ ଦେବା ପାଇଁ ସ୍ୱାଗତ କରିଥିଲେ। ଆଜି ସୁର ରାଉତରାୟ ଦଳରେ ପୁନଃ ଯୋଗ ଦେଇଛନ୍ତି।