ଆଜିର ତାରିଖ ୩୦ ଜାନୁଆରୀ ୨୦୨୬
ସହିଦ ଦିବସ:- ପ୍ରତିବର୍ଷ ଜାନୁଆରୀ ୩୦ ତାରିଖରେ ଭାରତରେ ସହିଦ ଦିବସ ପାଳନ କରାଯାଏ। ଏହା ଜାତୀୟ ସ୍ତରରେ ପାଳିତ ହୁଏ ଏବଂ ମହାତ୍ମା ଗାନ୍ଧୀଙ୍କ ପୁଣ୍ୟତିଥି (ମୃତ୍ୟୁ ବାର୍ଷିକୀ) ରେ ପାଳନ ହୁଏ। ଏହି ଦିବସକୁ ସହିଦ ଦିବସ ବା ବଳିଦାନ ଦିବସ ବୋଲି କୁହାଯାଏ। ଏହି ଦିନ ସମଗ୍ର ଦେଶରେ ସକାଳ ୧୧ଟାରେ ଦୁଇ ମିନିଟ୍ ନିରବତା ପାଳନ କରାଯାଏ।
୧୯୪୮ ମସିହା ଜାନୁଆରୀ ୩୦ ତାରିଖରେ ଦିଲ୍ଲୀର ବିରଳା ହାଉସ କମ୍ପ୍ଲେକ୍ସରେ ସନ୍ଧ୍ୟା ପ୍ରାର୍ଥନା ସଭାରେ ନାଥୁରାମ ଗଡସେ ମହାତ୍ମା ଗାନ୍ଧୀଙ୍କୁ ଗୁଳି କରି ହତ୍ୟା କରିଥିଲେ। ଗାନ୍ଧୀଜୀ ଭାରତର ସ୍ୱାଧୀନତା ସଂଗ୍ରାମର ପ୍ରମୁଖ ନେତା, ଅହିଂସା ଓ ସତ୍ୟାଗ୍ରହର ପ୍ରତୀକ ଥିଲେ। ତାଙ୍କ ବଳିଦାନ ପରେ ଏହି ଦିନକୁ ସହିଦମାନଙ୍କୁ ସ୍ମରଣ କରିବା ପାଇଁ ନିର୍ଦ୍ଧାରଣ କରାଗଲା।
ଏହା କେବଳ ଗାନ୍ଧୀଜୀଙ୍କ ପାଇଁ ନୁହେଁ, ସ୍ୱାଧୀନତା ପାଇଁ ପ୍ରାଣ ଦେଇଥିବା ସମସ୍ତ ସହିଦଙ୍କୁ ସମ୍ମାନ ଜଣାଇବାର ଦିନ। ଗାନ୍ଧୀଜୀଙ୍କ ଅହିଂସା, ସତ୍ୟ ଓ ସମାନତାର ଆଦର୍ଶକୁ ସ୍ମରଣ କରାଯାଏ। ପ୍ରତିବର୍ଷ ଜାନୁଆରୀ ୩୦ ରେ ରାଷ୍ଟ୍ରପତି, ଉପରାଷ୍ଟ୍ରପତି, ପ୍ରଧାନମନ୍ତ୍ରୀ, ପ୍ରତିରକ୍ଷା ମନ୍ତ୍ରୀ ଏବଂ ସ୍ଥଳସେନା, ବାୟୁସେନା ଏବଂ ନୌସେନାର ମୁଖ୍ୟମାନେ ଦିଲ୍ଲୀର ରାଜଘାଟରେ ମହାତ୍ମା ଗାନ୍ଧୀଙ୍କ ସମାଧି ସ୍ଥଳରେ ଶ୍ରଦ୍ଧାଞ୍ଜଳି ଅର୍ପଣ କରନ୍ତି।
ବିଶିଷ୍ଟ ବ୍ୟକ୍ତିଙ୍କ ଜନ୍ମ ଦିବସ:-
୧. ଚିଦାମ୍ବରମ ସୁବ୍ରମଣ୍ୟମ (୩୦ ଜାନୁଆରୀ ୧୯୧୦ – ୭ ନଭେମ୍ବର ୨୦୦୦), ଭାରତରେ “ସବୁଜ ବିପ୍ଳବର ଜନକ” ଭାବରେ ଜଣାଶୁଣା ଥିଲେ। ଦେଶର ବଙ୍ଗଳା, ବିହାର ଏବଂ ଓଡ଼ିଶାରେ ଦୁର୍ଭିକ୍ଷ ପଡ଼ିଥିବା ବେଳେ ସି. ସୁବ୍ରମଣ୍ୟମଙ୍କୁ କେନ୍ଦ୍ରରେ କୃଷି ମନ୍ତ୍ରୀ କରାଯାଇଥିଲା, ସେ ଦେଶକୁ ଖାଦ୍ୟ ଉତ୍ପାଦନରେ ସ୍ୱାବଲମ୍ବୀ କରିବା ପାଇଁ ଅନେକ ଯୋଜନା କାର୍ଯ୍ୟକାରୀ କରିଥିଲେ। ତାଙ୍କର ଉନ୍ନତ କୃଷି ନୀତି ଯୋଗୁଁ ୧୯୭୨ ମସିହାରେ ଦେଶରେ ଖାଦ୍ୟ ଶସ୍ୟ ଉତ୍ପାଦନ ରେକର୍ଡ ହୋଇଥିଲା। ସି. ସୁବ୍ରମଣ୍ୟମଙ୍କ ନୀତି ଏବଂ ଦକ୍ଷ ପ୍ରୟାସ ଯୋଗୁଁ, ଆଜି ଦେଶ ଖାଦ୍ୟ ଶସ୍ୟ ଉତ୍ପାଦନରେ ସମ୍ପୂର୍ଣ୍ଣ ସ୍ୱାବଲମ୍ବୀ ହୋଇପାରିଛି। ତାଙ୍କର ଜନ୍ମ ୩୦ ଜାନୁଆରୀ ୧୯୧୦ ରେ ହୋଇଥିଲା।
ବିଶିଷ୍ଟ ବ୍ୟକ୍ତିଙ୍କ ତିରୋଧାନ ଦିବସ:-
୧. ମହାତ୍ମା ଗାନ୍ଧୀ (୨ ଅକ୍ଟୋବର ୧୮୬୯ – ୩୦ ଜାନୁଆରୀ ୧୯୪୮), ଭାରତର ଜାତିର ପିତା (Father of the Nation) ଭାବରେ ପରିଚିତ ମହାତ୍ମା ଗାନ୍ଧୀ ଅହିଂସା (non-violence), ସତ୍ୟାଗ୍ରହ (satyagraha) ଓ ସମ୍ପ୍ରୀତିର ପ୍ରତୀକ। ସେ ବ୍ରିଟିଶ ଶାସନରୁ ଭାରତର ସ୍ୱାଧୀନତା ପାଇଁ ନେତୃତ୍ୱ ଦେଇଥିଲେ ଏବଂ ବିଶ୍ୱରେ ଶାନ୍ତିପୂର୍ଣ୍ଣ ପ୍ରତିରୋଧର ଏକ ଅନନ୍ୟ ଉଦାହରଣ ସ୍ଥାପନ କରିଛନ୍ତି। ତାଙ୍କର ପୂର୍ଣ୍ଣ ନାମ ମୋହନଦାସ କରମଚାନ୍ଦ ଗାନ୍ଧୀ ଥିଲା। ରାଜନୈତିକ ଏବଂ ସାମାଜିକ ପ୍ରଗତି ହାସଲ କରିବା ପାଇଁ ଅହିଂସାତ୍ମକ ପ୍ରତିବାଦର ସିଦ୍ଧାନ୍ତ ପାଇଁ ସେ ଅନ୍ତର୍ଜାତୀୟ ଖ୍ୟାତି ଅର୍ଜନ କରିଥିଲେ। ‘ସାବରମତୀ ଆଶ୍ରମ’ ସହିତ ତାଙ୍କର ଏକ ଅତୁଟ ସମ୍ପର୍କ ଥିଲା। ମହାତ୍ମା ଗାନ୍ଧୀ ଜୀବନସାରା ଏହି ଆଶ୍ରମ ସହିତ ଜଡିତ ଥିଲେ, ସେଥିପାଇଁ ତାଙ୍କୁ ‘ସାବରମତୀର ସନ୍ଥ’ ଉପାଧି ମଧ୍ୟ ମିଳିଥିଲା। ଦକ୍ଷିଣ ଆଫ୍ରିକାରେ ଭାରତୀୟମାନଙ୍କ ପ୍ରତି ଜାତିଗତ ଭେଦଭାବ ଦେଖି ସେ ପ୍ରଥମ ସତ୍ୟାଗ୍ରହ ଆନ୍ଦୋଳନ ଆରମ୍ଭ କଲେ। ଏହିଠିରେ ତାଙ୍କୁ “ମହାତ୍ମା” (Great Soul) ଉପାଧି ମିଳିଥିଲା। ଅହିଂସାତ୍ମକ ପ୍ରତିରୋଧର ନୀତି ବିକାଶ କଲେ, ଯାହା ପରେ ଭାରତରେ ପ୍ରୟୋଗ କଲେ। ୧୯୧୫ରେ ଭାରତ ଫେରିବା ପରେ ଭାରତୀୟ ଜାତୀୟ କଂଗ୍ରେସର ନେତା ହୋଇଥିଲେ। ବିଭିନ୍ନ ଆନ୍ଦୋଳନ ଯେପରିକି ଅସହଯୋଗ ଆନ୍ଦୋଳନ (୧୯୨୦–୨୨), ଲବଣ ସତ୍ୟାଗ୍ରହ (୧୯୩୦), ଭାରତ ଛାଡ଼ ଆନ୍ଦୋଳନ (Quit India Movement, ୧୯୪୨) ର ନେତୃତ୍ୱ ନେଇଥିଲେ। ୧୯୪୮ ମସିହା ଜାନୁଆରୀ ୩୦ ତାରିଖରେ ସନ୍ଧ୍ୟା ପ୍ରାୟ ୫:୧୭ ବାଜିକାରେ ନୂଆଦିଲ୍ଲୀର ବିରଳା ଭବନ (ବର୍ତ୍ତମାନ ଗାନ୍ଧୀ ସ୍ମୃତି)ରେ ପ୍ରାର୍ଥନା ସଭାକୁ ଯାଉଥିବା ବେଳେ ନାଥୁରାମ ଗଡସେ ମହାତ୍ମା ଗାନ୍ଧୀଙ୍କୁ ତିନିଟି ଗୁଳି ମାରି ହତ୍ୟା କରିଥିଲେ।
୨. ମାଖନ ଲାଲ ଚତୁର୍ବେଦୀ (୪ ଏପ୍ରିଲ ୧୮୮୯ – ୩୦ ଜାନୁଆରୀ ୧୯୬୮), ଜଣେ ହିନ୍ଦୀ ଲେଖକ ଥିଲେ। ସେ ହିନ୍ଦୀ ଏବଂ ସଂସ୍କୃତ ଅଧ୍ୟୟନ କରିଥିଲେ। ସେ ଜାତୀୟ ଦୈନିକ ‘କର୍ମବୀର’ର ସମ୍ପାଦକ ଥିଲେ। ସେ ସ୍ୱାଧୀନତା ଆନ୍ଦୋଳନରେ ସକ୍ରିୟ ଭାବରେ ଅଂଶଗ୍ରହଣ କରିଥିଲେ। ୧୯୬୮ ଜାନୁଆରୀ ୩୦ ତାରିଖରେ ତାଙ୍କର ମୃତ୍ୟୁ ହୋଇଥିଲା।
୩. ଜେ.ସି. କୁମାରପ୍ପା (୪ ଜାନୁଆରୀ ୧୮୯୨ – ୩୦ ଜାନୁଆରୀ ୧୯୬୦), ଜଣେ ଭାରତୀୟ ଅର୍ଥନୀତିଜ୍ଞ। ତାଙ୍କର ମୂଳ ନାମ ‘ଜୋସେଫ ଚେଲାଦୁରାଇ କର୍ଣ୍ଣେଲିୟସ୍’ ଥିଲା। ସେ ମହାତ୍ମା ଗାନ୍ଧୀଙ୍କ ଜଣେ ଘନିଷ୍ଠ ସହଯୋଗୀ ଥିଲେ। ଜେ.ସି. କୁମାରପ୍ପାଙ୍କୁ ଭାରତରେ ଗାନ୍ଧୀବାଦୀ ଅର୍ଥନୀତିର ପ୍ରଥମ ଗୁରୁ ଭାବରେ ବିବେଚନା କରାଯାଏ। ତାଙ୍କର ମୃତ୍ୟୁ ୩୦ ଜାନୁଆରୀ ୧୯୬୦ରେ ମାଦୁରାଇରେ ହୋଇଥିଲା।
ନଜର ପକାନ୍ତୁ ଆଜିର ଦିନରେ ଘଟିଥିବା ଗୁରୁତ୍ୱପୂର୍ଣ୍ଣ ଘଟଣାକ୍ରମ ଉପରେ:-
୧୬୪୮ – ହଲାଣ୍ଡ ଏବଂ ସ୍ପେନ୍ ମଧ୍ୟରେ ଏକ ଶାନ୍ତି ଚୁକ୍ତି ସ୍ୱାକ୍ଷରିତ ହୋଇଥିଲା।
୧୬୪୯ – ଇଂଲଣ୍ଡର ସମ୍ରାଟ ‘ଚାର୍ଲ୍ସ ପ୍ରଥମ’ଙ୍କୁ ଫାଶୀ ଦିଆଯାଇଥିଲା।
୧୯୪୯ – ରାତ୍ରିକାଳୀନ ବିମାନ ଡାକ ସେବା ଆରମ୍ଭ ହୋଇଥିଲା।
୧୯୬୪ – ଦକ୍ଷିଣ ଭିଏତନାମରେ ସାମରିକ ବାହିନୀ କ୍ଷମତା ଦଖଲ କଲା।
୧୯୮୯ – ଆମେରିକା ଆଫଗାନିସ୍ତାନର କାବୁଲରେ ଥିବା ଏହାର ଦୂତାବାସ ବନ୍ଦ କରିଦେଲା।
୧୯୯୧ – ଇରାକୀ ସେନା ସାଉଦି ଆରବ ସୀମା ନିକଟରେ ଏକ ସହର କବଜା କରିଥିଲେ। ଏହି ଆକ୍ରମଣରେ ପ୍ରାୟ ୧୨ ଜଣ ଆମେରିକୀୟ ସୈନିକଙ୍କୁ ପ୍ରାଣ ହରାଇବାକୁ ପଡିଥିଲା।
୨୦୦୪ – ବୈଜ୍ଞାନିକମାନେ ମଙ୍ଗଳ ଗ୍ରହରେ ଲୁହା ଅକ୍ସାଇଡର ଉପସ୍ଥିତି ଘୋଷଣା କଲେ।