କଂଟାବାଞ୍ଜି: ମମିତା ମେହେର ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ ଆତ୍ମହତ୍ୟା ମାମଲାରେ କ୍ରାଇମ୍ବ୍ରାଞ୍ଚ ଶୁକ୍ରବାର କଣ୍ଟାବାଞ୍ଜି ଜେଲ୍ରେ ସିନ୍ ରିକ୍ରିଏସନ୍ କରିଛି। ଜେଲରୁ ଜବତ ହୋଇଥିବା ପ୍ରମାଣ ଫରେନସିକ୍ ଲାବ୍କୁ ଟେଷ୍ଟ ପାଇଁ ପଠାଇଛି। ଆତ୍ମହତ୍ୟାସ୍ଥଳରେ ଲାଗିଥିବା ସିସିଟିଭି ଫୁଟେଜକୁ ଜବତ କରିଛି। କ୍ରାଇମବ୍ରାଞ୍ଚ କାର୍ଯ୍ୟାଳୟ ପକ୍ଷରୁ ଏହି ସୂଚନା ଦିଆଯାଇଛି।
ସୂଚନାଯୋଗ୍ୟ, କଂଟାବାଞ୍ଜି ଜେଲ ଭିତରେ ବିଚାରଧିନ କଏଦୀ ଭାବେ ରହିଥିବା ଗୋବିନ୍ଦ ସାହୁ ଗତ ମଙ୍ଗଳବାର ଦିନ ଆତ୍ମହତ୍ୟା କରିଥିଲା। ଏହାକୁ ନେଇ କ୍ରାଇମବ୍ରାଂଚର ଏକ ସ୍ୱତନ୍ତ୍ର ଟିମ୍ ତଦନ୍ତ କରୁଛନ୍ତି। ଆଜି ତୃତୀୟ ଦିନରେ ମଧ୍ୟ କଂଟାବାଞ୍ଜି ଜେଲ ଭିତରେ ଏହି ଟିମ୍ ତଦନ୍ତ କରିଛି। ଆତ୍ମହତ୍ୟା ଘଟଣା ଘଟିଥିବା ସ୍ଥାନରେ ଏହି ଟିମ ସାଇଟିଫିକ ଦଳ ସହ ଅଧିକକ ତଦନ୍ତ କରିଥିବା ଜଣାପଡିଛି। ଗୋବିନ୍ଦ ସାହୁ ରହୁଥିବା ସେଲ୍ ନଂ ୧ରେ ଯାଂଚ କରିବା ସହ ସେଠାରେ ବ୍ୟବହାର କରୁଥିବା ଗୋବିନ୍ଦଙ୍କ ଆବାସ ପତ୍ର ଯାଂଚ, କାଗଜ ପତ୍ର ଏବଂ ଔଷଧ ମଧ୍ୟ ଯାଂଚ ହୋଇଥିବା ଅନୁମାନ କରାଯାଇଛି।