ଛଦ୍ମ ବେଶରେ କଟକ ଏସସିବି ଡାକ୍ତରଖାନାରୁ କଏଦୀ ଫେରାର

କଟକ : କଟକ ଏସସିବି ମେଡିକାଲ କଲେଜ ଓ ହସ୍ପିଟାଲରେ ଚିକିତ୍ସିତ ହେଉଥିବା ଜଣେ ବିଚାରାଧୀନ କଏଦୀ ଗୁରୁବାର ଜଣେ ମହିଳା ଛଦ୍ମ ବେଶରେ ଖସି ପଳାଇବାରେ ସକ୍ଷମ ହୋଇଥିଲେ। ଫେରାର କଏଦୀ ଜଣକ ହେଉଛନ୍ତି ଜଗତସିଂହପୁର ଜିଲ୍ଲା ନାଉଗାଁ ଥାନା ଅଞ୍ଚଳର ସଜନ ଦାସ।
ମିଳିଥିବା ସୂଚନା ଅନୁଯାୟୀ, ନିଆଳି ଅଞ୍ଚଳରେ ଏକ ଘରେ ଲୁଟ୍ ଉଦ୍ୟମ କରୁଥିବା ବେଳେ ନାଉଗାଁ ପୁଲିସ ଦାସଙ୍କୁ ଗିରଫ କରିଥିଲା। ଜାମିନ ଆବେଦନ ଖାରଜ ହେବାପରେ ତାଙ୍କୁ କୋର୍ଟଚାଲାଣ କରାଯାଇ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ତାଙ୍କୁ ପ୍ରଥମେ ଆଳିପିଙ୍ଗଳ ଜେଲରେ ରଖାଯିବା ପରେ ଚୌଦ୍ୱାର ଜେଲକୁ ସ୍ଥାନାନ୍ତର କରାଯାଇଥିଲା। ଗତ ୨୯ ତାରିଖରେ ସେ ଅସୁସ୍ଥ ହୋଇ ପଡ଼ିବାରୁ ତାଙ୍କୁ ଏସସିବି ମେଡିକାଲରେ ଭର୍ତ୍ତି କରାଯାଇଥିଲା। ଗତକାଲି କଏଦୀ ଜଣଙ୍କ ଶୌଚାଳୟକୁ ଯାଇଥିଲେ। ସେଠାରେ ସେ ନିଜ ପୋଷାକ ବଦଳାଇ ଶାଢ଼ୀ ପିନ୍ଧି ଶୌଚାଳୟରୁ ବାହାରି ନିଜ ଗୋଡ଼କୁ ଓହ୍ଲାଇ ଏସସିବି ଏମସିଏଚର ସୁରକ୍ଷା ବ୍ୟବସ୍ଥାକୁ ପ୍ରଶ୍ନବାଚୀରେ ପକାଇଥିଲେ। ସେପଟେ ମଙ୍ଗଳାବାଗ ଥାନା ପୁଲିସ ଏକ ମାମଲା ରୁଜୁ କରି ଫେରାର କଏଦୀଙ୍କୁ ଧରିବା ପାଇଁ ଛାନଭିନ୍ ଆରମ୍ଭ କରିଛି।