ବାଲେଶ୍ୱର ରେଳ ଦୁର୍ଘଟଣା: ସିଗନାଲ ଜେଇଙ୍କୁ ପଚରାଉଚରା କଲା ସିବିଆଇ

ବାଲେଶ୍ୱର: ବାଲେଶ୍ୱର ଜିଲ୍ଲା ବାହାନଗାଠାରେ ଘଟିଥିବା ରେଳ ଦୁର୍ଘଟଣା ମାମଲାରେ ସିବିଆଇ ଆଜି ସୋରୋ ସେକ୍ସନ୍ ସିଗନାଲ୍ ଜେଇ ଅମୀର ଖାନଙ୍କୁ ପଚରାଉଚରା କରିଛି। ସିବିଆଇ ଗତକାଲି ଅମୀର ଖାନଙ୍କ ଭଡ଼ା ଘରେ ଚଢ଼ାଉ କରି ସିଲ୍ କରିଥିଲା। ଚଢ଼ାଉ ସମୟରେ ସେ ଓ ତାଙ୍କ ପରିବାର ସଦସ୍ୟ ଘରେ ଅନୁପସ୍ଥିତ ଥିବାରୁ ଆଜି ସିବିଆଇ ଟିମ୍ ଜେଇଙ୍କୁ ସୋରୋସ୍ଥିତ ବାସଭବନକୁ ଯାଇ ଟ୍ରେନ୍ ଦୁର୍ଘଟଣା ସମ୍ପର୍କରେ ପଚରାଉଚରା କରିଛି।

ସୂଚନାନୁଯାୟୀ, ଗତକାଲି ସକାଳେ ସିବିଆଇର ୪ ଜଣିଆ ଟିମ୍ ସରକାରୀ ରେଳବାଇ ପୁଲିସ କର୍ମଚାରୀଙ୍କ ସହ ସିଗନାଲ ଜେଇ ଅମୀର ଖାନଙ୍କୁ ପଚରାଉଚରା ପାଇଁ ତାଙ୍କ ଭଡ଼ା ଘରକୁ ଯାଇଥିଲେ। କିନ୍ତୁ ଘରେ କେହି ନଥିବାରୁ ଟିମ୍ ଘରକୁ ସିଲ୍ କରିଦେଇଥିଲା। ତେବେ ଜେଇ ଅମୀର ଖାନ ଓ ତାଙ୍କ ପରିବାର ଦୁର୍ଘଟଣା ଘଟିବା ପର ଠାରୁ ତାଙ୍କ ଭଡା ଘରେ ରହୁ ନଥିଲେ ଯାହାଫଳରେ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି।