୬୫ ହଜାର ବସ୍ତିବାସିନ୍ଦାଙ୍କୁ ମିଳିଲା ଜମି ଅଧିକାର ପ୍ରମାଣପତ୍ର

ଭୁବନେଶ୍ବର: କଳିଙ୍ଗ ଷ୍ଟାଡିୟମରେ ଆୟୋଜିତ ଏକ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭୁବନେଶ୍ୱର, କଟକ, ବ୍ରହ୍ମପୁର, ସମ୍ବଲପୁର ଓ ରାଉରକେଲା ବସ୍ତିରେ ରହୁଥିବା ୬୫ ହଜାର ଗରିବ ପରିବାରଙ୍କୁ ଜମି ମାଲିକାନା ପ୍ରମାଣପତ୍ର ପ୍ରଦାନ କରିଛନ୍ତି।

ସୂଚନାଯୋଗ୍ୟ, ୨୦୧୮ମସିହାରୁ ଆରମ୍ଭ ହୋଇଥିବା ଜାଗା ମିଶନ କାର୍ଯ୍ୟକ୍ରମରେ ସହରାଞ୍ଚଳ ବସ୍ତିରେ ରହୁଥିବା ଗରିବ ପରିବାରଙ୍କୁ ଜମି ଅଧିକାର ପ୍ରଦାନ କରାଯାଇଛି। ବର୍ତ୍ତମାନ ସୁଦ୍ଧା ରାଜ୍ୟର ବିଭିନ୍ନ ସହରରେ ୨ ଲକ୍ଷ ୪୦ ହଜାରରୁ ଅଧିକ ପରିବାର ଜମି ଅଧିକାର ପାଇସାରିଲେଣି। ଏହା ସହ ୪୦ ହଜାର ପରିବାରକୁ ଘର ନିର୍ମାଣ ପାଇଁ ସହାୟତା ପ୍ରଦାନ କରାଯାଇଛି। ବସ୍ତିମୁକ୍ତ ଓଡ଼ିଶା ଗଠନ ଲକ୍ଷ୍ୟରେ ଏହି ସବୁ ବସ୍ତିକୁ ସମସ୍ତ ମୌଳିକ ସୁବିଧା ଯୋଗାଇ ଦିଆଯାଉଛି ଏବଂ ଏହାକୁ ବିଜୁ ଆଦର୍ଶ କଲୋନୀରେ ପରିଣତ କରାଯାଉଛି। ବସ୍ତିବାସିନ୍ଦାଙ୍କୁ ଜମି ଅଧିକାର ଦେବାରେ ଓଡ଼ିଶା ହେଉଛି ଦେଶର ଏକମାତ୍ର ରାଜ୍ୟ।

ଏହି ଅବସରରେ ସମାବେଶକୁ ସମ୍ବୋଧିତ କରି ମୁଖ୍ୟମନ୍ତ୍ରୀ କହିଛନ୍ତି, ସହର କେବଳ ଧନୀଙ୍କ ପାଇଁ ନୁହେଁ। ଏପରିକି ଗରିବ ଲୋକମାନେ ମଧ୍ୟ ନିଜ ପରିବାର ସହ ସହରରେ ରହିବାର ଅଧିକାର ରହିଛି। ସହର ନିର୍ମାଣରେ ବ୍ୟବହୃତ ହେଉଥିବା ପ୍ରତ୍ୟେକ ଇଟାରେ ଗରିବଙ୍କ ପରିଶ୍ରମ ଯୋଡି ହୋଇଛି। ଆମେ ସମସ୍ତେ ସେମାନଙ୍କ ଅବଦାନକୁ ସମ୍ମାନ ଦେବା ଉଚିତ। ଜାଗା ମିଶନ ଗରିବଙ୍କୁ ସମ୍ମାନ ଦେଇ ସେମାନଙ୍କୁ ଏକ ନୂଆ ପରିଚୟ ଦେଇଛି। ଘର ନିର୍ମାଣ ପାଇଁ ହିତାଧିକାରୀଙ୍କୁ ଆର୍ଥିକ ସହାୟତା ମଧ୍ୟ ଯୋଗାଇ ଦିଆଯିବ। ଆସନ୍ତା ଅକ୍ଟୋବରରେ ଦ୍ବିତୀୟ ପର୍ଯ୍ୟାୟ ସାର୍ଟିଫିକେଟ୍ ପ୍ରଦାନ କରାଯିବ। ଏହି ସବୁ ସହରର ଗରିବ ପରିବାରକୁ ଜମି ଅଧିକାର ନମିଳିବା ପର୍ଯ୍ୟନ୍ତ ଏହି ଅଭିଯାନ ଜାରି ରହିବ। ଜାଗା ମିଶନ ସମଗ୍ର ବିଶ୍ୱର ଦୃଷ୍ଟି ଆକର୍ଷଣ କରିଛି ବୋଲି ଉଲ୍ଲେଖ କରି ସେ କହିଥିଲେ ଯେ ସହରରେ ଗରିବ ଲୋକଙ୍କର ପ୍ରଥମ ଅଧିକାର ରହିଛି। ଜାଗା ମିଶନ ସହରର ରୂପାନ୍ତରରେ ଏକ ନୂଆ ଯୁଗ ଆରମ୍ଭ କରିଛି। ୫-ଟି ପଦକ୍ଷେପ ଲୋକଙ୍କ ଜୀବନରେ ପରିବର୍ତ୍ତନ ଆଣିବା ପାଇଁ ଆମର ପ୍ରୟାସକୁ ତ୍ୱରାନ୍ୱିତ କରିଛି ବୋଲି ସେ କହିଛନ୍ତି।

ଜାଗା ମିଶନ କାର୍ଯ୍ୟକ୍ରମରେ ଗୁରୁତ୍ୱପୂର୍ଣ୍ଣ ଅବଦାନ ପାଇଁ ମୁଖ୍ୟମନ୍ତ୍ରୀ ଟାଟା ଷ୍ଟିଲ ଫାଉଣ୍ଡେସନକୁ ଧନ୍ୟବାଦ ଜଣାଇଛନ୍ତି। ସମସ୍ତଙ୍କ ସହଯୋଗରେ ଆମେ ଆଗକୁ ବଢ଼ୁଛୁ। ନୂଆ ଓଡ଼ିଶା, ଶକ୍ତିଶାଳୀ ଓଡ଼ିଶା, ପରିବର୍ତ୍ତିତ ଓଡ଼ିଶା ଗଠନ ପାଇଁ ସରକାରଙ୍କ ଲକ୍ଷ୍ୟ। ଆଜିର କାର୍ଯ୍ୟକ୍ରମ ଏହି ଲକ୍ଷ୍ୟ ହାସଲ ଦିଗରେ ଏକ ମାଇଲଖୁଣ୍ଟ ହେବ ବୋଲି ମୁଖ୍ୟମନ୍ତ୍ରୀ କହିଛନ୍ତି।

ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ୧୦୧୦ଟି ବିଜୁ ମଡେଲ କଲୋନୀକୁ ଉଦଘାଟନ କରିବା ସହ ବିଜୁ ମଡେଲ କଲୋନୀ ନିର୍ମାଣରେ ଉଲ୍ଲେଖନୀୟ ପଦକ୍ଷେପ ପାଇଁ କଟକ, ଖୋର୍ଦ୍ଧା, କୋରାପୁଟ ଓ ଯାଜପୁର ସହରକୁ ସମ୍ମାନିତ କରିଥିଲେ।

ଏହି କାର୍ଯ୍ୟକ୍ରମରେ ଓଡ଼ିଶାର ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ଉଷା ଦେବୀ କହିଥିଲେ, ମୁଖ୍ୟମନ୍ତ୍ରୀଙ୍କ ଦୂରଦୃଷ୍ଟି ଓ ପ୍ରୟାସ ଯୋଗୁଁ ଆଜି ରାଜ୍ୟର ଗରିବ ଲୋକଙ୍କ ମୁହଁରେ ହସ ଫୁଟିଛି। ଟାଟା ଷ୍ଟିଲ ଫାଉଣ୍ଡେସନର ପରିଚାଳନା ନିର୍ଦ୍ଦେଶକ କହିଛନ୍ତି, ଟାଟା ଷ୍ଟିଲ ବିଭିନ୍ନ ଜନକଲ୍ୟାଣକାରୀ କାର୍ଯ୍ୟକ୍ରମରେ ସରକାରଙ୍କୁ ସହାୟତା ପ୍ରଦାନ କରିବାକୁ ସର୍ବଦା ପ୍ରସ୍ତୁତ ରହିଛି। ଟାଟା ଷ୍ଟିଲ ପାଇଁ ଏହି ପଦକ୍ଷେପ ସମ୍ପୂର୍ଣ୍ଣ ନୂଆ, କିନ୍ତୁ ରାଜ୍ୟ ସରକାରଙ୍କ ପ୍ରୟାସରେ ଆମେ ସହଯୋଗ ଜାରି ରଖିବୁ।