ଓଡ଼ିଆ ସର୍ଜନଙ୍କୁ ଲାଇଫ ଟାଇମ ଆଚିଭମେଣ୍ଟ ଆୱାର୍ଡ

ଭୁବନେଶ୍ବର, ୦୨/୧୨/୨୩: ଓଡ଼ିଶାରେ ଜନ୍ମିତ ସର୍ଜନ ମୁକୁଟ ମିଞ୍ଜଙ୍କୁ ଅଙ୍ଗ ପ୍ରତ୍ୟାରୋପଣରେ ପାଞ୍ଚ ଦଶନ୍ଧିର ସଫଳତା ପାଇଁ ଲାଇଫ୍ ଟାଇମ୍ ଆଚିଭମେଣ୍ଟ ପୁରସ୍କାର ପ୍ରଦାନ କରାଯାଇଛି। ପିଜିଆଇଏମ୍ଇଆର୍ ଚଣ୍ଡିଗଡ଼ ପକ୍ଷରୁ ନିକଟରେ ଆୟୋଜିତ ୩ ଦିନିଆ ସମ୍ମିଳନୀରେ ତାଙ୍କୁ ଏହି ସମ୍ମାନରେ ସମ୍ମାନିତ କରାଯାଇଥିଲା।

ଶ୍ରୀ ମିଞ୍ଜ ତାଙ୍କ କାର୍ଯ୍ୟକାଳ ସମୟରେ ୩୫୦୦ରୁ ଅଧିକ ସଫଳ କିଡନୀ ପ୍ରତିରୋପଣ କରିଛନ୍ତି। ସେ ୨୦୧୬ରେ ପୂର୍ବତନ ବୈଦେଶିକ ବ୍ୟାପାର ମନ୍ତ୍ରୀ ସୁଷମା ସ୍ୱରାଜଙ୍କ କିଡନୀ ପ୍ରତିରୋପଣ କରିଥିବା ନୂଆଦିଲ୍ଲୀସ୍ଥିତ ଏମ୍ସ ଟିମର ମଧ୍ୟ ନେତୃତ୍ୱ ନେଇଥିଲେ।

ସୁନ୍ଦରଗଡ଼ର ମୂଳ ବାସିନ୍ଦା ଶ୍ରୀ ମିଞ୍ଜ ବୁର୍ଲାସ୍ଥିତ ଭିଏସ୍ଏସ୍ ମେଡିକାଲ କଲେଜରୁ ଏମବିବିଏସ୍ ପାସ୍ କରିଛନ୍ତି। ୨୦୧୬ ଜୁଲାଇ ୩୦ ତାରିଖରେ ସେ ବୃକକ୍ ପ୍ରତିରୋପଣ ସର୍ଜରୀ ବିଭାଗର ମୁଖ୍ୟ ଭାବେ ଅବସର ଗ୍ରହଣ କରିଥିଲେ। ମିଞ୍ଜ ୨୦୧୭ ଫେବ୍ରୁଆରିରେ ଉତ୍କଳ ବିଶ୍ୱବିଦ୍ୟାଳୟରୁ ଡକ୍ଟର ଅଫ୍ ସାଇନ୍ସ ଡିଗ୍ରୀ ହାସଲ କରିଥିଲେ।

ଅଙ୍ଗ ପ୍ରତିରୋପଣ କ୍ଷେତ୍ରରେ ତାଙ୍କର ଅବଦାନ ପାଇଁ ୨୦୧୪ ମସିହାରେ ଓଡ଼ିଶା ସରକାର ତାଙ୍କୁ ଓଡ଼ିଶା ଗୌରବ ସମ୍ମାନରେ ସମ୍ମାନିତ କରିଥିଲେ। ୨୦୧୭ରେ ହିଁ ଡାକ୍ତରୀ କ୍ଷେତ୍ରରେ ତାଙ୍କର ଅବଦାନ ପାଇଁ ତାଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରାଯାଇଥିଲା।