‘ୟୁନିଫାଏଡ୍ କମାଣ୍ଡ ଆଣ୍ଡ୍ କଣ୍ଟ୍ରୋଲ୍ ସେଣ୍ଟର’ ଉଦଘାଟନ କଲେ ମୁଖ୍ୟମନ୍ତ୍ରୀ

ଭୁବନେଶ୍ବର, ୦୯/୦୧/୨୪: କମିଶନରେଟ୍ ପୁଲିସର ୧୬ତମ ପ୍ରତିଷ୍ଠା ଦିବସ ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ‘ୟୁନିଫାଏଡ୍ କମାଣ୍ଡ ଆଣ୍ଡ୍ କଣ୍ଟ୍ରୋଲ୍ ସେଣ୍ଟର’କୁ ଉଦଘାଟନ କରିବା ସହ ‘ଇ-ଆବେଦନ ଆପ’ର ଶୁଭାରମ୍ଭ କରିଛନ୍ତି।

ଏହି ଅବସରରେ ମୁଖ୍ୟମନ୍ତ୍ରୀ ଅଭିନନ୍ଦନ ଜଣାଇ କହିଛନ୍ତି ଯେ, “ୟୁନିଫାଇଡ୍ କମାଣ୍ଡ ଆଣ୍ଡ କଣ୍ଟ୍ରୋଲ ସେଣ୍ଟର”କୁ ଉଦଘାଟନ କରିବା ଏବଂ “ଇ-ଆବେଦାନ” ଆପ୍ ଲଞ୍ଚ କରି ମୁଁ ଆନନ୍ଦିତ। ଏହା ସଂଗଠନକୁ ଅଧିକ ସୁଦୃଢ଼ କରିବା ସହ ପୁଲିସକୁ ଅଧିକ ଲୋକାଭିମୁଖୀ କରିବାରେ ସହାୟକ ହେବ। ୧୬ ବର୍ଷର ଏହି ଗୌରବମୟ ଯାତ୍ରାରେ କମିସନରେଟ୍ ପୁଲିସର ଯଥେଷ୍ଟ ଉନ୍ନତି ଘଟିଛି। ଆଜି ଏହା ଅଧୀନରେ ୫୨ଟି ଥାନା କାର୍ଯ୍ୟ କରୁଛି। ମୁଁ ସର୍ବଦା ନାଗରିକ କେନ୍ଦ୍ରୀତ ଏବଂ ନାଗରିକ ଅନୁକୂଳ ବ୍ୟବସ୍ଥା ଉପରେ ଗୁରୁତ୍ୱ ଦେଇଆସିଛି। ଗତ କିଛି ବର୍ଷ ଧରି ବସ୍ତିବାସିନ୍ଦା, ବରିଷ୍ଠ ନାଗରିକ ଓ ଶିଶୁଙ୍କ ସମେତ ସମାଜର ବିଭିନ୍ନ ସମ୍ବେଦନଶୀଳ ବର୍ଗସହ ଯୋଗାଯୋଗ ପାଇଁ କମିସନରେଟ୍ ପୁଲିସ ଅନେକ ଅଭିଯାନ ହାତକୁ ନେଇଛି। ଶିକ୍ଷାନୁଷ୍ଠାନରେ ସାଇବର ଅପରାଧ ସଚେତନତା ପ୍ରସାର ପାଇଁ ମଧ୍ୟ ପଦକ୍ଷେପ ନିଆଯାଇଛି।”

ମୁଖ୍ୟମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ମହିଳାଙ୍କ ସୁରକ୍ଷା ମୋ ସରକାରଙ୍କ ସର୍ବୋଚ୍ଚ ପ୍ରାଥମିକତା। ପୁଲିସ ଏକ ବୁଦ୍ଧିମାନ ଏବଂ ସହାନୁଭୂତିପୂର୍ଣ୍ଣ ଆଭିମୁଖ୍ୟ ଗ୍ରହଣ କରି ପୀଡ଼ିତଙ୍କ ମଧ୍ୟରେ ଆତ୍ମବିଶ୍ୱାସ ସୃଷ୍ଟି କରିବା ଦିଗରେ କାର୍ଯ୍ୟ କରିବା ଉଚିତ୍। ଗତବର୍ଷ ଦୋଷୀ ସାବ୍ୟସ୍ତ ହାରରେ ଉଲ୍ଲେଖନୀୟ ବୃଦ୍ଧି ହାସଲ କରିବାରେ କମିସନରେଟ୍ ପୁଲିସ ଚମତ୍କାର କାର୍ଯ୍ୟ କରିଛି ବୋଲି ଜାଣି ମୁଁ ଆନନ୍ଦିତ। ମୁଁ ଖୁସି ଯେ ୫-ଟି ର କାର୍ଯ୍ୟକାରିତା ଉପରେ ମତାମତ ବହୁତ ଭଲ ଆସିଛି। ଥାନାକୁ ଆସୁଥିବା ପର୍ଯ୍ୟଟକଙ୍କ ଅଭିଜ୍ଞତାକୁ ଆହୁରି ଉନ୍ନତ କରାଗଲେ ମୁଁ ବହୁତ ଖୁସି ହେବି।

କମିଶନରେଟ ପୋଲିସ ନାଗରିକଙ୍କ ମଧ୍ୟରେ ନିରାପତ୍ତା ଭାବନା ସୃଷ୍ଟି କରିବା ଏବଂ ଦେଶ ପାଇଁ ଏକ ମଡେଲ ହେବା ପାଇଁ ନିଜର ଦକ୍ଷତା ରେ ଉନ୍ନତି ଆଣିବା ପାଇଁ ନୂତନ ଆହ୍ୱାନର ସମ୍ମୁଖୀନ ହେବ ବୋଲି ମୁଖ୍ୟମନ୍ତ୍ରୀ ଆଶା କରିଛନ୍ତି।