ଓଡ଼ିଶା ଆସୁଛନ୍ତି ମୋଦି ଓ ଶାହ

ଭୁବନେଶ୍ୱର, ୨୯/୧୧: ଆଜି ୩ ଦିନିଆ ଓଡ଼ିଶା ଗସ୍ତରେ ଆସୁଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହ ମନ୍ତ୍ରୀ ଅମିତ ଶାହ ଓ ରାଷ୍ଟ୍ରୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ। ଓଡ଼ିଶାର ଭୁବନେଶ୍ଵରରେ ଆୟୋଜିତ ଡିଜିପି ସମ୍ମିଳନୀରେ ଯୋଗ ଦେବେ। ତେବେ ବାଲୁକା କଳାରେ ମୋଦି ଓ‌ ଶାହଙ୍କୁ ସ୍ୱାଗତ ଜଣାଇଛନ୍ତି ପ୍ରଖ୍ୟାତ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ। ପୁରୀ ବେଳାଭୂମିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଗୃହ ମନ୍ତ୍ରୀ ଅମିତ ଶାହଙ୍କ ଏକ ଚମତ୍କାର ବାଲୁକା ମୂର୍ତ୍ତି କରି ସେମାନଙ୍କୁ ଓଡ଼ିଶା ଆସିବା ପୂର୍ବରୁ ସ୍ୱାଗତ କରିଛନ୍ତି।

ମିଳିଥିବା ସୂଚନା ଅନୁଯାୟୀ, ପ୍ରଧାନମନ୍ତ୍ରୀ ମୋଦୀ ଶୁକ୍ରବାର ଅପରାହ୍ନ ୪ଟା ୧୫ରେ ଭୁବନେଶ୍ୱରରେ ପହଞ୍ଚିବା ପରେ ବିମାନବନ୍ଦରରେ ତାଙ୍କୁ ରାଜ୍ୟ ବିଜେପି ନେତା ଓ ସମର୍ଥକମାନେ ସ୍ୱାଗତ କରିବେ। ଭୁବନେଶ୍ୱରରେ ପ୍ରଥମ ଥର ପାଇଁ ଡିଜି-ଆଇଜି ସମ୍ମିଳନୀ ଆୟୋଜନ କରାଯାଉଛି। କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏହାର ଉଦଘାଟନ କରିବେ।