ଆଜି ଆକାଉଣ୍ଟକୁ ଆସିବ ସୁଭଦ୍ରା ଚତୁର୍ଥ ପର୍ଯ୍ୟାୟ ଟଙ୍କା

ଭୁବନେଶ୍ୱର, ୦୮/୦୨: ଆଜି ଆସିବ ସୁଭଦ୍ରା ଯୋଜନାରେ ପ୍ରଥମ କିସ୍ତିର‌ ଚତୁର୍ଥ ପର୍ଯ୍ୟାୟ ଟଙ୍କା। ଯାଜପୁରରୁ ଯୋଗ୍ୟ ହିତାଧିକାରୀଙ୍କୁ ବଣ୍ଟନ କରାଯିବ। ଜିଲ୍ଲାର ବ୍ୟାସନଗରର ଚାନ୍ଦମା ପଡ଼ିଆରେ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଯୋଗ ଦେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ଟଙ୍କା ପ୍ରଦାନ କରିବେ। ଆଜି ୧୮ ଲକ୍ଷ ମହିଳାଙ୍କୁ ଆର୍ଥିକ ସହାୟତା ମିଳିବ। ଯାହା ଦ୍ୱାରା ସୁଭଦ୍ରା ଯୋଜନାରେ ସାମିଲ ହୋଇ ଓଡ଼ିଶାର ୯୮ ଲକ୍ଷ ମହିଳା ଉପକୃତ ହେବେ।

ଫେବ୍ରୁଆରି ୨ ରେ ସରସ୍ୱତୀ ପୂଜା ଅବସରରେ ଉପମୁଖ୍ୟମନ୍ତ୍ରୀ ତଥା ମହିଳା ଓ ଶିଶୁ ବିକାଶ ମନ୍ତ୍ରୀ ପ୍ରଭାତୀ ପରିଡ଼ା ଏ ନେଇ ଘୋଷଣା କରିଥିଲେ। ଅନ୍ତର୍ଜାତୀୟ ମହିଳା ଦିବସ ଅବସରରେ ସରକାର ମାର୍ଚ୍ଚ ୮ତାରିଖରୁ ଦ୍ବିତୀୟ କିସ୍ତି ଅର୍ଥ ବଣ୍ଟନ ଆରମ୍ଭ କରିବେ। ଏହା ସହିତ ଯେଉଁମାନେ ପ୍ରଥମ କିସ୍ତିରେ ସୁଭଦ୍ରା ଲାଭ ଉଠାଇ ପାରିନଥିବେ, ସେମାନଙ୍କୁ ମଧ୍ୟ ମାର୍ଚ୍ଚ ୮ରେ ଟଙ୍କା ବଣ୍ଟନ କରାଯିବ।

ଆଜି ମୁଖ୍ୟମନ୍ତ୍ରୀଙ୍କ ଯାଜପୁର ଗସ୍ତକୁ ଦୃଷ୍ଟିରେ ରଖି ଜିଲ୍ଲାରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି।