ଅଣାୟତ୍ତ ବିଜେଡ଼ି ନେତା

ଭୁବନେଶ୍ୱର, ୧୪/୦୨: ନବୀନଙ୍କ କଣ୍ଟ୍ରୋଲରେ ନାହାନ୍ତି ନେତା। ଅଣାୟତ୍ତ ହେଲେଣି ବିଜେଡ଼ି ନେତା। ଜଣଙ୍କ ପରେ ଜଣେ କରୁଛନ୍ତି ଦଳ ବିରୋଧରେ ବିଷୋଦଗାର। ସୁଯୋଗ ମିଳିବା ମାତ୍ରେ ମନର ଅସନ୍ତୋଷକୁ ଝାଡୁଛନ୍ତି। ନବୀନ ଯେତେ ବୁଝାଇବାକୁ ଚେଷ୍ଟା କରୁଥିଲେ ମଧ୍ୟ ଆଉ ତାଙ୍କ କଣ୍ଟ୍ରୋଲରେ ରହୁ ନାହାନ୍ତି ବିଜେଡ଼ିର ବିଶିଷ୍ଟ ନେତା।

ଏବେ ଦଳ ବିରୋଧରେ ପୁଣି ଆଗକୁ ଆସିଛନ୍ତି ଆଉ ଜଣେ ବିଜେଡ଼ିର ବରିଷ୍ଠ ନେତା ତଥା ପୂର୍ବତନ ଅର୍ଥମନ୍ତ୍ରୀ ପ୍ରଫୁଲ୍ଲ ଘଡେଇ। ନିଜ ମନର ଅସନ୍ତୋଷକୁ ଜାହିର କରିଛନ୍ତି। ଦଳୀୟ ଚକ୍ରାନ୍ତର ଶିକାର ହୋଇ ପ୍ରୀତି ରଞ୍ଜନଙ୍କୁ କୋରେଇ ଛାଡି ସୁକିନ୍ଦା ଯିବାକୁ ପଡ଼ିଲା। ପ୍ରୀତି ରଞ୍ଜନ ଓ କୋରେଇବାସୀଙ୍କ ଇଚ୍ଛା ବିରୋଧରେ ପ୍ରୀତି ରଞ୍ଜନଙ୍କୁ କୋରେଇ ଛାଡ଼ିବାକୁ ପଡ଼ିଲା। ଯେଉଁଦିନ ସୁକିନ୍ଦା ନିର୍ବାଚନ ମଣ୍ଡଳୀରେ ଲଢିବା ପାଇଁ ନୋମିନେସନ ଫାଇଲ କରିବାକୁ ଗଲେ, ସେଦିନ ତାଙ୍କ ଆଖିରୁ ଲୁହ ଝରି ଯାଉଥିଲା। ଦଳୀୟ ଚକ୍ରାନ୍ତର ଶିକାର ହୋଇ ମୁଁ ସେହି ଦିନଠୁ ସକ୍ରିୟ ରାଜନୀତିଠାରୁ ଦୂରେଇ ଯାଇଛି।

ଜୀବନର ବଡ଼ ଶତ୍ରୁ ହେଉଛି ଅହଙ୍କାର। ଅହଙ୍କାର ବହୁତ କ୍ଷତିକର। ଅହଙ୍କାର ଦ୍ୱାରା ବ୍ୟକ୍ତି ନଷ୍ଟ ହୋଇଯାଏ। ଅହଙ୍କାର ଯୋଗୁଁ ରାଜନୈତିକ ଦଳ ନଷ୍ଟ ହୋଇଯାଏ। ଅହଙ୍କାରରେ ସରକାର ଭାଙ୍ଗିଯାଏ। ଅହଙ୍କାରରେ ସମାଜ ଓଲଟି ପଡେ। ଯାଜପୁର କୋରେଇ ନିର୍ବାଚନ ମଣ୍ଡଳୀରେ ଥିବା କରଦା ହରିହାଟ ମହୋତ୍ସବରେ ଯୋଗଦେଇ ଏଭଳି ଅସନ୍ତୋଷ ଛାଡିଛନ୍ତି ଶ୍ରୀ ଘଡେଇ। ଭାଷଣ ଦେବା ବେଳେ ସିଧା ଟାର୍ଗେଟ କରିଥିଲେ ଦଳକୁ।

ତେବେ ୨୦୨୪ ଲୋକସଭା ଓ ବିଧାନସଭା ନିର୍ବାଚନ ପରାଜୟ ପରଠାରୁ ଦଳ ପାଖରୁ ମୁହଁ ଫେରାଇ ନେଉଛନ୍ତି ନେତା। ଦଳୀୟ ଟିକେଟ ବଣ୍ଟନକୁ ନେଇ ଅସନ୍ତୋଷ ଥିବା ନେତା ହାରିବା ପରେ ମନ ଇଚ୍ଛା ବୟାନ ଦେଉଛନ୍ତି। ସେପଟେ ଦଳୀୟ ନେତାଙ୍କ ଦଳ ଡିଆଁ ବିଜେଡ଼ିର ଭବିଷ୍ୟତ ଉପରେ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି।

କିଛି ଦିନ ପୂର୍ବରୁ ବିଜେଡ଼ିର କିଛି ନେତା ମେଳି ହୋଇଥିବା ଖବର ପାଇବା ପରେ ନବୀନ ଜାଣିବା ପରେ ଫୋନ୍ କରି ତାଗିଦ୍ କରିଥିଲେ। ସେହିପରି ଗତ ୨ ଦିନ ପୂର୍ବରୁ ବିଜେଡ଼ିର ବିଧାୟକ ଦଳ ବୈଠକ ଅନୁଷ୍ଠିତ ହୋଇଥିଲା। ସେଥିରେ ଯୋଗ ଦେଇନଥିଲେ ଚମ୍ପୁଆ ବିଧାୟକ ସନାତନ ମହାକୁଡ଼। ସେଥିପାଇଁ ଗତ କାଲି ବିଧାନସଭା ଅଧିବେଶନ ଆରମ୍ଭ ହେବା ପୂର୍ବରୁ ବିଧାନସଭା ପରିସରରେ ପହଞ୍ଚିବା କ୍ଷଣି ସାମ୍ନାରେ ସନାତନଙ୍କୁ ଦେଖି ପଚାରିଥିଲେ ବୈଠକରେ କାହିଁକି ଆସିନଥିଲ। ବିଜେପିରେ ଆଡ଼କୁ ଢଳୁଛନ୍ତି କି ବୋଲି ପଚାରିଥିଲେ।

ଏଥିରୁ ଜଣା ପଡ଼ୁଛି ନବୀନଙ୍କୁ ମଧ୍ୟ ଦଳୀୟ ନେତା ଛାଡିକି ଯିବାର ଭୟ ଅଛି। ଦଳର ଭବିଷ୍ୟତକୁ ନେଇ ମଧ୍ୟ ଚିନ୍ତାରେ ଅଛନ୍ତି ନବୀନ।