ଓଡ଼ିଶା ବିକାଶର ଆଧାର ହେବ ଓଡ଼ିଆ ଅସ୍ମିତା ଓ ନିରବଚ୍ଛିନ୍ନ ପ୍ରୟାସ: ମୁଖ୍ୟମନ୍ତ୍ରୀ

ଭୁବନେଶ୍ୱର, ୦୧/୦୪: ମଙ୍ଗଳବାର ଓଡ଼ିଶା ଦିବସ ଅବସରରେ ଓଡ଼ିଶାରେ ବିଜେପି ଓ ବିଜେଡ଼ି ଉଭୟ ଓଡ଼ିଶାର ବିକଶିତ ଦିଗ ପ୍ରତି ଗୁରୁତ୍ୱାରୋପ କରିଛନ୍ତି। ୨୦୩୬ ସୁଦ୍ଧା ଓଡ଼ିଶା ଏକ ବିକଶିତ ରାଜ୍ୟ ଭାବେ ଗଣା ହେବ ବୋଲି ବିଜେପି କହିଥିବା ବେଳେ ୨୦୦୦-୨୦୨୪ ଓଡ଼ିଶା ବିକାଶର ଏକ ନୂଆ ଯୁଗ ଥିଲା ବୋଲି କହିଛି ବିଜେଡ଼ି।

କଟକ ଜିଲ୍ଲା ସତ୍ୟଭାମାପୁରଠାରେ ମଧୁସୂଦନ ଦାସଙ୍କ ଜନ୍ମଭୂମିର ସମନ୍ୱିତ ବିକାଶ ପାଇଁ ୨୧ କୋଟି ଟଙ୍କାର ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବା ସହ ଆୟୋଜିତ ଏକ ସ୍ମୃତି ସମାରୋହରେ ଯୋଗ ଦେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଥିଲେ, ଭାରତର ସ୍ୱାଧୀନତା ପରଠାରୁ ୭୭ ବର୍ଷ ମଧ୍ୟରେ ଓଡ଼ିଶାରେ ଆଖି ଦୃଷ୍ଟିଆ ବିକାଶ ହୋଇନାହିଁ। କିନ୍ତୁ ବିଜେପି ସରକାର ଓଡ଼ିଶାକୁ ବିକାଶ ପଥରେ ଅଗ୍ରସର କରାଇବା ପାଇଁ ପ୍ରତିଶ୍ରୁତିବଦ୍ଧ। ଓଡ଼ିଆ ଅସ୍ମିତା, ଉଚ୍ଚ ଆକାଂକ୍ଷା ଏବଂ ନିରବଚ୍ଛିନ୍ନ ପ୍ରୟାସ ହିଁ ଓଡ଼ିଶା ଏକ ବିକଶିତ ରାଜ୍ୟରେ ପରିଣତ ହେବାର ଆଧାର ହେବ। ଓଡିଆଙ୍କ ଗର୍ବ ଓ ଗୌରବ ପ୍ରତିଫଳନ କରିବ ଓଡ଼ିଆ ପକ୍ଷ। ଏପ୍ରିଲ ୧୪ ତାରିଖ ପର୍ଯ୍ୟନ୍ତ ରାଜ୍ୟ ସରକାର ‘ଓଡିଆ ପକ୍ଷ’ ପାଳନ କରିବା ପାଇଁ ନିଷ୍ପତ୍ତି ନେଇଛନ୍ତି ବୋଲି ମୁଖ୍ୟମନ୍ତ୍ରୀ ମୋହନ ମାଝୀ କହିଥିଲେ।

ଅନ୍ୟପଟେ ବିରୋଧୀ ଦଳର ମୁଖ୍ୟ କାର୍ଯ୍ୟାଳୟ ଶଙ୍ଖ ଭବନରେ ଉତ୍କଳ ଦିବସକୁ ବହୁ ଆଡମ୍ବର ସହକାରେ ପାଳନ କରାଯାଇଥିଲା। ଏଥିରେ ବିରୋଧୀ ଦଳ ନେତା ତଥା ବିଜେଡ଼ି ସଭାପତି ନବୀନ ପଟ୍ଟନାୟକ ଯୋଗ ଦେଇ ବିଗତ ୨୪ ବର୍ଷ ମଧ୍ୟରେ ଓଡିଶା ସବୁ ମାନଦଣ୍ଡରେ ଆଗୁଆ ରହିଛି ବୋଲି କହିଥିଲେ।

ନବୀନ ତାଙ୍କ ସରକାର ସମୟରେ ସଫଳତା ବିଷୟରେ ବଖାଣି କହିଥିଲେ ଯେ, ୨୦୦୦ ମସିହାରୁ ୨୦୨୪ ଯାଏଁ ଓଡ଼ିଶା ବିକାଶର ଏକ ନୂଆ ଯୁଗ ଥିଲା। କୃଷି ଭିତ୍ତିଭୂମି, ଅର୍ଥନୀତି, ନିବେଶ, ବିପର୍ଯ୍ୟୟ ପରିଚାଳନା, ଶିକ୍ଷା ଓ ସ୍ୱାସ୍ଥ୍ୟ ସବୁଥିରେ ବିକାଶ ହୋଇଥିଲା। ଆମର ସବୁଠାରୁ ବଡ଼ ସଫଳତା ଥିଲା ଦାରିଦ୍ର୍ୟ ଦୂରୀକରଣ। ଯାହା ୨୦୦୦ ମସିହାରେ ୭୦% ଥିବାବେଳେ ୨୦୨୪ରେ ଏହା ୧୦%କୁ ହ୍ରାସ ପାଇଥିଲା। ଓଡ଼ିଶା ଏକ ମଜବୁତ ଭିତ୍ତିଭୂମି ଉପରେ ଆଗକୁ ବଢି ଚାଲିଛି। ବିଜୁ ବାବୁଙ୍କ ସ୍ୱପ୍ନ ଥିଲା, ଓଡ଼ିଶାକୁ ଏସିଆର ଏକ ନମ୍ୱର ରାଜ୍ୟ ଭାବେ ଗଢି ତୋଳିବା। ସମସ୍ତଙ୍କ ସହଯୋଗ ରହିଲେ ଏହି ଲକ୍ଷ୍ୟ ମଧ୍ୟ ଖୁବଶୀଘ୍ର ପୂରଣ ହେବ ବୋଲି କହିଥିଲେ ନବୀନ ପଟ୍ଟନାୟକ।

ଏହି ଅବସରରେ ବିଜୁ ଜନତା ଦଳ ପକ୍ଷରୁ ବିଶିଷ୍ଟ ଭାଷାବିତ୍‌ ପଦ୍ମଶ୍ରୀ ଡକ୍ଟର ଦେବୀ ପ୍ରସନ୍ନ ପଟ୍ଟନାୟକ, ଝାଡ଼ଖଣ୍ଡର ପୂର୍ବତନ ମନ୍ତ୍ରୀ ଡକ୍ଟର ଦିନେଶ ଷଡଙ୍ଗୀ, କବୟିତ୍ରୀ ଡକ୍ଟର ମିନି ଷଡଙ୍ଗୀ ଏବଂ ଏଭେରେଷ୍ଟ ବିଜୟିନୀ ମମତା ରାଉତଙ୍କୁ ବିଭିନ୍ନ କ୍ଷେତ୍ରରେ ସେମାନଙ୍କ ଅବଦାନ ପାଇଁ ନବୀନ ପଟ୍ଟନାୟକ ମାନପତ୍ର ଦେଇ ସମ୍ବର୍ଦ୍ଧିତ କରିଥିଲେ।