ଚଳନ୍ତା ଟ୍ରେନ ୱାଗନ ସହ ଫସିଗଲା ପୁସ୍ ଟ୍ରଲି ଛତା

ରାୟଗଡ଼ା, ୧୭/୦୭: ରାୟଗଡା ୟାର୍ଡରେ ଆଜି ସକାଳେ ଏକ ବଡ ଅଘଟଣ ଘଟିଛି। ୟାର୍ଡରେ ଏକ ପୁସ୍ ଟ୍ରଲିର ଛତା ଏକ ମାଲବାହୀ ଟ୍ରେନ୍ ର ଚଳନ୍ତା ୱାଗନ ସହିତ ଫସିଯିବା ଫଳରେ ଧକ୍କା ହୋଇ ଜଣେ ଠିକା ଶ୍ରମିକଙ୍କ ଅକାଳ ମୃତ୍ୟୁ ଘଟିଛି।

ଟ୍ରଲିଟି ୟାର୍ଡରେ ଲାଇନ୍ ନମ୍ବର ୪ ଏବଂ ୫ ମଧ୍ୟରେ ଥିଲା। କିନ୍ତୁ କୌଣସି ଟ୍ରାକରେ ନଥିଲା। ଦୁର୍ଭାଗ୍ୟବଶତଃ, ଜଣେ ଠିକା ଶ୍ରମିକ ମାଲବାହୀ ଟ୍ରେନ୍ ଦ୍ୱାରା ଧକ୍କା ହୋଇ ମୃତ୍ୟୁବରଣ କରିଛନ୍ତି। ଆଉ ଜଣେ ଶ୍ରମିକ ଏବଂ ଜଣେ ଟ୍ରଲି ମ୍ୟାନ ସାମାନ୍ୟ ଆହତ ହୋଇଛନ୍ତି। ସେମାନଙ୍କୁ ନିକଟସ୍ଥ ଏକ ହସ୍ପିଟାଲରେ ଭର୍ତ୍ତି କରାଯାଇଛି ଏବଂ ଉପଯୁକ୍ତ ଚିକିତ୍ସା ପରେ ସେମାନଙ୍କୁ ଡିସଚାର୍ଜ କରାଯିବ।

ଘଟଣାର ତଦନ୍ତ ପାଇଁ ବରିଷ୍ଠ ରେଳ ଅଧିକାରୀମାନେ ତୁରନ୍ତ ଘଟଣାସ୍ଥଳ ପରିଦର୍ଶନ କରିଛନ୍ତି ଏବଂ ଠିକାଦାରଙ୍କ ଦ୍ୱାରା ଉପଯୁକ୍ତ କ୍ଷତିପୂରଣ ପ୍ରଦାନ କରାଯାଉଛି।