ୱାଶିଂଟନ, ୨୮/୧୧: ହ୍ୱାଇଟ୍ ହାଉସ୍ ନିକଟରେ ଜଣେ ଆଫଗାନ ନାଗରିକ ଦୁଇ ଜଣ ନ୍ୟାସନାଲ୍ ଗାର୍ଡ କର୍ମଚାରୀଙ୍କ ଉପରେ ଗୁଳି ଚଳାଇବା ପରେ ଏକ ବଡ଼ ପଦକ୍ଷେପ ନିଆଯାଇଛି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆଜି ଘୋଷଣା କରିଛନ୍ତି ଯେ ସେ ‘ତୃତୀୟ ବିଶ୍ଵ’ ରାଷ୍ଟ୍ରରୁ ପ୍ରବାସକୁ ସ୍ଥାୟୀ ଭାବରେ ବନ୍ଦ କରିବେ ଏବଂ ଯେଉଁମାନେ ଆମେରିକାର ନେଟ୍ ସମ୍ପତ୍ତି ନୁହଁନ୍ତି ସେମାନଙ୍କୁ ବାହାର କରିଦେବେ।
ଏପରି ପଦକ୍ଷେପ ବିଶ୍ୱବ୍ୟାପୀ ବ୍ୟାପକ ପ୍ରଭାବ ପକାଇବ। ଚାକିରି, ଶିକ୍ଷା ଏବଂ ନିଜ ଦେଶରେ ନିର୍ଯାତନାରୁ ରକ୍ଷା ପାଇବା ପାଇଁ ଆମେରିକାକୁ ସ୍ଥାନାନ୍ତରିତ ହେଉଥିବା ଲକ୍ଷ ଲକ୍ଷ ଲୋକଙ୍କୁ ପ୍ରଭାବିତ କରିବ।
ଟ୍ରୁଥ୍ ସୋସିଆଲରେ ତାଙ୍କ ପୋଷ୍ଟରେ ଟ୍ରମ୍ପ କହିଛନ୍ତି ଯେ ଆମେରିକା ପ୍ରଯୁକ୍ତିବିଦ୍ୟା କ୍ଷେତ୍ରରେ ଅଗ୍ରଗତି କରିଥିବା ବେଳେ, ଏହାର ପ୍ରବାସୀ ନୀତି ଅନେକଙ୍କ ଜୀବନଧାରଣ ସ୍ଥିତିକୁ ନଷ୍ଟ କରିଦେଇଛି”।
“ଆମେରିକୀୟ ବ୍ୟବସ୍ଥାକୁ ସମ୍ପୂର୍ଣ୍ଣ ସୁସ୍ଥ କରିବା ପାଇଁ ମୁଁ ସମସ୍ତ ତୃତୀୟ ବିଶ୍ୱ ଦେଶରୁ ପ୍ରବାସକୁ ସ୍ଥାୟୀ ଭାବରେ ବନ୍ଦ କରିବି। ଯେଉଁମାନେ ଆମେରିକାର ଏକ ନିଟ୍ ସମ୍ପତ୍ତି ନୁହଁନ୍ତି, କିମ୍ବା ଆମ ଦେଶକୁ ଭଲ ପାଇବାରେ ଅସମର୍ଥ, ମୁଁ ସେମାନଙ୍କୁ ବାହାର କରିଦେବି। ମୁଁ ଆମ ଦେଶର ଅଣ-ନାଗରିକଙ୍କ ପାଇଁ ସମସ୍ତ ସଂଘୀୟ ସୁବିଧା ଏବଂ ସବସିଡିକୁ ସମାପ୍ତ କରିବି, ଘରୋଇ ଶାନ୍ତିକୁ ନଷ୍ଟ କରୁଥିବା ପ୍ରବାସୀମାନଙ୍କୁ ଅସ୍ୱୀକାର କରିବି, ଏବଂ ଯେକୌଣସି ବିଦେଶୀ ନାଗରିକଙ୍କୁ ଦେଶାନ୍ତର କରିବି ଯିଏ ଏକ ସାଧାରଣ ବୋଝ, ସୁରକ୍ଷା ପ୍ରତି ବିପଦ କିମ୍ବା ପାଶ୍ଚାତ୍ୟ ସଭ୍ୟତା ସହିତ ଅସଙ୍ଗତ।
ସୂଚନାଯୋଗ୍ୟ, ବୁଧବାର ଦିନ ହ୍ୱାଇଟ ହାଉସ ନିକଟରେ ଜଣେ ଆଫଗାନ ନାଗରିକ ନ୍ୟାସନାଲ ଗାର୍ଡ ସଦସ୍ୟଙ୍କ ଉପରକୁ ଗୁଳି ମାଡ଼ କରିଥିଲେ। ଏଥିରେ ଆହତ ହୋଇଥିବା ଦୁଇ ୱେଷ୍ଟ ଭର୍ଜିନିଆ ନ୍ୟାସନାଲ୍ ଗାର୍ଡ ସଦସ୍ୟଙ୍କ ମଧ୍ୟରୁ ଜଣଙ୍କର ମୃତ୍ୟୁ ହୋଇଛି। ଗୁଳି ଚାଳନା କରିଥିବା ବ୍ୟକ୍ତିର ନାମ ରହମାନୁଲ୍ଲା ଲାକାନୱାଲ ବୋଲି ଚିହ୍ନଟ କରାଯାଇଛି। ଟ୍ରମ୍ପ ଏହି ଗୁଳିକାଣ୍ଡକୁ ଏକ “ଆତଙ୍କବାଦୀ ଆକ୍ରମଣ” ବୋଲି ଅଭିହିତ କରିଛନ୍ତି ଏବଂ ବାଇଡେନ ପ୍ରଶାସନକୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ ଆଫଗାନିସ୍ତାନ ଯୁଦ୍ଧରେ ଆମେରିକୀୟ ସେନାକୁ ସାହାଯ୍ୟ କରିଥିବା ଆଫଗାନମାନଙ୍କୁ ଆମେରିକା ଆସିବାକୁ ଅନୁମତି ଦେଇ ଏକ ଭୁଲ କରାଯାଇଛି।