ଶାମଲି, ୧୮/୧୨: ବୁର୍ଖା ପିନ୍ଧି ନଥିବା କାରଣରୁ ସ୍ତ୍ରୀ ଏବଂ ଦୁଇ ଝିଅଙ୍କୁ ହତ୍ୟା କରିଛି ରାକ୍ଷସ ସ୍ୱାମୀ। ପ୍ରଥମେ ସ୍ତ୍ରୀ ଓ ପରେ ଦୁଇ ଝିଅଙ୍କୁ ବି ଅତ୍ୟନ୍ତ ବିଭତ୍ସ ଭାବେ ହତ୍ୟା କରିଛି। ଏଭଳି ଘଟଣା ଘଟିଛି ଉତ୍ତରପ୍ରଦେଶରେ। ଉତ୍ତରପ୍ରଦେଶର ଶାମଲିରେ ରହୁଥିବା ଫାରୁକଙ୍କର କେବଳ ଗୋଟିଏ ଜିଦ୍ ଥିଲା ଯେ, ତାଙ୍କ ପତ୍ନୀ ତାହିରା ସବୁବେଳେ ବୁର୍ଖା ପିନ୍ଧିବା ଉଚିତ। ଯେଉଁଥିପାଇଁ ସେ ୧୮ ବର୍ଷ ଧରି ତାଙ୍କୁ ଆଧାର ଏବଂ ରାସନ କାର୍ଡ ମଧ୍ୟ କରିବାକୁ ଅନୁମତି ଦେଇନଥିଲେ। କାରଣ ଏଥିରେ ବୁର୍ଖା ବିନା ତାଙ୍କର ଫଟୋ ରହିବ।
ଏହି ଦମ୍ପତିଙ୍କର ପାଞ୍ଚଟି ସନ୍ତାନ ଥିଲେ – ଆଫ୍ରିନ୍ (୧୪), ଅସମିନ୍ (୧୦), ସେହରିନ (୭), ବିଲାଲ୍ (୯) ଏବଂ ଅର୍ଶଦ (୫)। ଫାରୁକ ସ୍ତ୍ରୀଙ୍କୁ ହତ୍ୟା କରିବା ପରେ, ସେ ଆଫ୍ରିନ୍କୁ ଗୁଳି କରି ସେହରିନ୍ଙ୍କୁ ଗଳାକାଟି ହତ୍ୟା କରିଥିଲେ।
ଫାରୁକ ପାଖରୁ ଗୋଟିଏ ପିସ୍ତଲ, ସାତଟି ଖାଲି ଗୁଳି ଏବଂ ୧୦ଟି ଜୀବନ୍ତ ଗୁଳି ରହିଛି।
ବିବାହ ଉତ୍ସବରେ ରୋଷେୟା ଭାବରେ କାମ କରୁଥିବା ଫାରୁକ ଯେତେବେଳେ ଜାଣିଲେ ଯେ ତାଙ୍କ ସ୍ତ୍ରୀ ବୁର୍ଖା ପିନ୍ଧି ତାଙ୍କ ବାପାଙ୍କ ଘରକୁ ଆସିଥିଲେ, ସେତେବେଳେ ସେ ରାଗି ଯାଇଥିଲେ, ଯାହା ପରେ ଏହି କାଣ୍ଡ ସବୁ ଘଟାଇଥିଲେ।
ତାହିରା ଏବଂ ତାଙ୍କ ଦୁଇ ଝିଅଙ୍କୁ ଛଅ ଦିନ ପର୍ଯ୍ୟନ୍ତ ଦେଖିବାକୁ ନ ମିଳିବାରୁ ହତ୍ୟାକାଣ୍ଡ ସମ୍ପର୍କରେ ଜଣାପଡିଥିଲା। ତାଙ୍କ ବାପା ଦାଉଦ ଯେତେବେଳେ ତାଙ୍କୁ ଏ ବିଷୟରେ ପଚାରୁଥିଲେ, ସେ ଏହାକୁ ଏଡ଼ାଇ ଯାଉଥିଲେ। ଦାଉଦ୍ ଥାନାରେ ଏତଲା ଦେବା ପରେ ସବୁ ସତ ସାମନାକୁ ଆସିଥିଲା।
ପଚରାଉଚରା ବେଳେ ଜଣାପଡ଼ିଛି ଯେ, ଏପରିକି ଫାରୁକ ତାଙ୍କ ଘରକୁ ଅତିଥି ଆସୁଥିବା ସମୟରେ ମଧ୍ୟ ଭେଟିବାକୁ ଦେଉନଥିଲେ। ଫାରୁକ୍ ପୋଲିସକୁ କହିଛନ୍ତି ଯେ ତାଙ୍କ ସ୍ତ୍ରୀ ଘର ଚଳାଇବାକୁ ଚାହୁଁଥିବାରୁ ସେ ପ୍ରାୟତଃ ଘରୋଇ କଥାକୁ ନେଇ ତାଙ୍କ ସହ ଝଗଡ଼ା କରୁଥିଲେ। ଗୋଟିଏ ମାସ ପୂର୍ବେ ସେ ବୁର୍ଖା ପିନ୍ଧି ନ ଥାଇ ତାଙ୍କ ବାପାମାଆଙ୍କ ଘରକୁ ଯାଇଥିଲେ, ଯାହା ତାଙ୍କ ସମ୍ମାନକୁ ଆଞ୍ଚ ଆଣିଥିଲା ବୋଲି ସେ କହିଥିଲେ। ଏଥିରେ କ୍ରୋଧିତ ହୋଇ ସେ ଡିସେମ୍ବର ୧୦ ମଧ୍ୟରାତ୍ରିରେ ହିଁ ରୋଷେଇ ଘରେ ତାହିରାଙ୍କୁ ଗୁଳି କରିଥିଲେ। ତାଙ୍କ ବଡ଼ ଝିଅ ଆଫ୍ରିନ୍ ଗୁଳି ଶବ୍ଦ ଶୁଣି ଉଠି ପଡ଼ିଲେ। ଯେତେବେଳେ ସେ ରୋଷେଇ ଘରକୁ ଆସିଲେ, ସେ ତାଙ୍କୁ ମଧ୍ୟ ଗୁଳି କଲେ। ଯେତେବେଳେ ତାଙ୍କ ଦ୍ୱିତୀୟ ଝିଅ ସେହରିନ ମଧ୍ୟ କ’ଣ ଘଟିଛି ଦେଖିବାକୁ ଆସିଲେ, ସେ ତାଙ୍କୁ ଗଳାକାଟି ହତ୍ୟା କଲେ।
ହତ୍ୟାକାଣ୍ଡ ଘଟାଇବା ପରେ ଫାରୁକ ସେମାନଙ୍କ ମୃତଦେହକୁ ଅଗଣାରେ ଶୌଚାଳୟ ପାଇଁ ଖୋଳାଯାଇଥିବା ନଅ ଫୁଟ ଗଭୀର ଗାତରେ ପୋତି ଦେଇଥିଲେ ଏବଂ ତା’ ଉପରେ ଇଟାରେ ଚଟାଣ କରି ଦେଇଥିଲେ।