ଆହୁରି ଭୟଙ୍କର ହେବ ଯୁଦ୍ଧ! ଆରବ ସାଗରରେ ପରମାଣୁ ସବମରିନ
କିର୍ ଷ୍ଟାର୍ମରଙ୍କ ଅନୁମୋଦନ ପରେ ଯୁଦ୍ଧକୁ ଓହ୍ଲାଇବ ବ୍ରିଟେନ
୮,୮୦୦ କି.ମି ଅତିକ୍ରମ କରି ପହଞ୍ଚିଲା, ପ୍ରତି ୨୪ ଘଣ୍ଟାରେ ଦେଉଛି ଅପଡେଟ୍
ନୂଆଦିଲ୍ଲୀ, ୨୨/୦୩: ମଧ୍ୟପ୍ରାଚ୍ୟରେ ଯୁଦ୍ଧ ନିରନ୍ତର ଜାରି ରହିଛି। ୨୩ ଦିଳ ଧରି ଚାଲିଥିବା ଯୁଦ୍ଧ ବନ୍ଦ ହେବାର କୌଣସି ଲକ୍ଷଣ ଦେଖାଯାଉନାହିଁ। ଏହି ସଂଘର୍ଷରେ ବ୍ରିଟେନର ସମ୍ପୃକ୍ତି ବୃଦ୍ଧି ପାଉଥିବା ପରି ମନେ ହେଉଛି। ବ୍ରିଟେନ ଆରବ ସାଗରରେ ଏକ ପରମାଣୁ ଶକ୍ତି ସମ୍ପନ୍ନ ବୁଡ଼ାଜାହାଜ ମୁତୟନ କରିଛି, ଯାହା ଏହାର ସାମରିକ ଶକ୍ତି ପ୍ରଦର୍ଶନ କରୁଛି।
ରିପୋର୍ଟ ଅନୁଯାୟୀ, ଟୋମାହକ୍ କ୍ରୁଜ୍ ମିସାଇଲ୍ ସହିତ ସଜ୍ଜିତ HMS Anson ଉତ୍ତର ଆରବ ସାଗରରେ ମୁତୟନ ହୋଇଛି।
ଏହା ଦ୍ୱାରା ଆଞ୍ଚଳିକ ସଂଘର୍ଷ ଅତ୍ୟନ୍ତ ତୀବ୍ର ହେଲେ ଇରାନ ଉପରେ ଆକ୍ରମଣ କରିବା ପାଇଁ ବ୍ରିଟେନକୁ ସହଜ ହେବ। ଏହା ପୂର୍ବରୁ, ଶୁକ୍ରବାର ଦିନ ବ୍ରିଟିଶ ସରକାର ଆମେରିକାର ସେନାକୁ ହର୍ମୁଜ ପ୍ରଣାଳୀରେ ଜାହାଜ ଉପରେ ଆକ୍ରମଣ କରୁଥିବା ଇରାନୀ ମିସାଇଲ ସେଣ୍ଟର ଉପରେ ଆକ୍ରମଣ କରିବା ପାଇଁ ବ୍ରିଟେନରେ ଥିବା ଘାଟି ବ୍ୟବହାର କରିବାକୁ ଅନୁମତି ଦେଇଥିଲେ।
ୟୁକେ ପ୍ରଧାନମନ୍ତ୍ରୀ କୀର ଷ୍ଟାରମର ପ୍ରାରମ୍ଭରେ ଇରାନ ଉପରେ ଆକ୍ରମଣ ପାଇଁ ବ୍ରିଟିଶ ଘାଟି ବ୍ୟବହାର ପାଇଁ ଆମେରିକାର ଅନୁରୋଧକୁ ପ୍ରତ୍ୟାଖ୍ୟାନ କରି କହିଥିଲେ ଯେ ତାଙ୍କୁ ନିଶ୍ଚିତ ହେବାକୁ ପଡିବ ଯେ ଯେକୌଣସି ସାମରିକ କାର୍ଯ୍ୟାନୁଷ୍ଠାନ ଆଇନଗତ।
କିନ୍ତୁ ମଧ୍ୟପ୍ରାଚ୍ୟରେ ଇରାନ ବ୍ରିଟିଶ ସହଯୋଗୀଙ୍କ ଉପରେ ଆକ୍ରମଣ କରିବା ପରେ ବ୍ରିଟିଶ ଲିଡର ତାଙ୍କର ମତ ପରିବର୍ତ୍ତନ କରି କହିଥିଲେ ଯେ ଆମେରିକା ଭାରତ ମହାସାଗରରେ ଆମେରିକା-ୟୁକେର ମିଳିତ ଘାଟି, RAF ଫେୟାରଫୋର୍ଡ ଏବଂ ଡିଏଗୋ ଗାର୍ସିଆ ବ୍ୟବହାର କରିପାରିବ।
ଡେଲି ମେଲର ରିପୋର୍ଟ ଅନୁଯାୟୀ, HMS Anson ମାର୍ଚ୍ଚ ୬ ତାରିଖରେ ଅଷ୍ଟ୍ରେଲିଆର ପର୍ଥ ବନ୍ଦର ଛାଡି ୮,୮୦୦ କିଲୋମିଟର ଅତିକ୍ରମ କରି ଆରବ ସାଗରରେ ପହଞ୍ଚିଛି। ରିପୋର୍ଟରେ କୁହାଯାଇଛି ଯେ ଲଣ୍ଡନରେ ସ୍ଥାୟୀ ମିଳିତ ମୁଖ୍ୟାଳୟ (PJHQ) ସହିତ ଯୋଗାଯୋଗ କରିବା ପାଇଁ ଏହି ବୁଡ଼ାଜାହାଜ ପ୍ରତି ୨୪ ଘଣ୍ଟାରେ ଥରେ ଉପରକୁ ଉଠେ।
HMS Anson ନାମକ ଏହି ବୁଡ଼ାଜାହାଜ ଟୋମାହକ୍ ବ୍ଲକ IV କ୍ରୁଜ୍ ମିସାଇଲ୍ ସହିତ ସଜ୍ଜିତ, ଯାହା ଶହ ଶହ ମାଇଲ୍ ଦୂରରେ ଅବସ୍ଥିତ ଲକ୍ଷ୍ୟସ୍ଥଳକୁ ଆକ୍ରମଣ କରିବାର କ୍ଷମତା ରଖେ। ଏହାକୁ ବ୍ରିଟେନର ‘ସାଇଲେଣ୍ଟ କିଲର’ ବୋଲି କୁହାଯାଏ।
ବ୍ରିଟିଶ ଗଣମାଧ୍ୟମରେ ପ୍ରକାଶ ପାଇଥିବା ପ୍ରତିରକ୍ଷା ସୂତ୍ରରୁ ମିଳିଥିବା ଖବର ଅନୁଯାୟୀ, ଗୁଳିଚାଳନା ପାଇଁ ଷ୍ଟାରମରଙ୍କ ଦ୍ୱାରା ସିଧାସଳଖ ଅନୁମୋଦନ କରାଯିବ।
ଇରାନ ଶନିବାର ଦିନ ଡିଏଗୋ ଗାର୍ସିଆକୁ ଟାର୍ଗେଟ କରିଥିଲା , ଯାହା ପ୍ରାୟ ୨,୫୦୦ ମାଇଲ (୪,୦୦୦ କିଲୋମିଟର) ଦୂରରେ ଅବସ୍ଥିତ। ଯଦିଓ ଇରାନ ଦ୍ୱାରା ପ୍ରକ୍ଷେପିତ ଦୁଇଟି କ୍ଷେପଣାସ୍ତ୍ର ଦ୍ୱୀପରେ ପଡ଼ିନଥିଲା।
ରଏଟର୍ସରେ ପ୍ରକାଶ ପାଇଥିବା ବ୍ରିଟେନର ପ୍ରତିରକ୍ଷା ମନ୍ତ୍ରଣାଳୟର ଏକ ସୂତ୍ରର ସୂଚନା ଅନୁସାରେ, ଇରାନର କ୍ଷେପଣାସ୍ତ୍ର ସେଣ୍ଟର ଉପରେ ଆକ୍ରମଣ ପାଇଁ ଆମେରିକାକୁ ବ୍ରିଟିଶ ସାମରିକ ଘାଟି ବ୍ୟବହାର କରିବାକୁ ସରକାର ନିର୍ଦ୍ଦିଷ୍ଟ ଅନୁମତି ଦେବା ପୂର୍ବରୁ ଏହି ଆକ୍ରମଣ ଘଟିଥିଲା।