ବୋଗୋଟା, ୨୪/୦୩: ସୋମବାର କଲମ୍ବିଆରେ ବାୟୁସେନାର ହର୍କୁଲେସ୍ C-130 ବିମାନ ଉଡ଼ାଣ ଭରିବା ସମୟରେ ଦୁର୍ଘଟଣାଗ୍ରସ୍ତ ହୋଇଛି। ଏହି ଦୁର୍ଘଟଣାରେ ଏପର୍ଯ୍ୟନ୍ତ ୬୬ ଜଣଙ୍କର ମୃତ୍ୟୁ ହୋଇଛି ଏବଂ ୫୦ ରୁ ଅଧିକ ଆହତ ହୋଇଛନ୍ତି। ଚାରି ଜଣ ସୈନିକ ଏବେ ବି ନିଖୋଜ ଅଛନ୍ତି।
ଏକ ସାମରିକ ସୂତ୍ର ଏଏଫପିକୁ କହିଛି ଯେ ୫୮ ଜଣ ସୈନିକ, ୬ ଜଣ ବାୟୁସେନା କର୍ମଚାରୀ ଏବଂ ଦୁଇ ଜଣ ପୋଲିସ ଅଧିକାରୀ ପ୍ରାଣ ହରାଇଛନ୍ତି। ଏହି ଦୁର୍ଘଟଣା ପେରୁ ସୀମା ନିକଟରେ ଦକ୍ଷିଣ ଆମାଜନ ଅଞ୍ଚଳର ପୁଏର୍ଟୋ ଲେଗୁଇଜାମୋରେ ଘଟିଛି।
ଦୁର୍ଘଟଣା ପରେ ନିକଟବର୍ତ୍ତୀ ଗାଁ ଲୋକେ ସାହାଯ୍ୟ ପାଇଁ ଦୌଡ଼ି ଆସିଥିଲେ। ଅନେକ ଆହତମାନଙ୍କୁ ମୋଟରସାଇକେଲରେ ଡାକ୍ତରଖାନାକୁ ନେବା ସହ ନିଆଁ ଲିଭାଇବାକୁ ଚେଷ୍ଟା କରିଥିଲେ। ଆହତମାନଙ୍କୁ ପ୍ରଥମେ ଛୋଟ କ୍ଲିନିକ୍ରେ ଭର୍ତ୍ତି କରାଯାଇଥିଲା। ପରେ ବୋଗୋଟା ବଡ଼ ସହରଗୁଡ଼ିକର ହସ୍ପିଟାଲକୁ ବିମାନ ଯୋଗେ ସ୍ଥାନାନ୍ତର କରାଯାଇଥିଲା।
ପ୍ରତିରକ୍ଷା ମନ୍ତ୍ରୀ ପେଡ୍ରୋ ସାଞ୍ଚେଜ୍ କହିଛନ୍ତି ଯେ ବିମାନଟି ରନୱେରୁ ପ୍ରାୟ ୧.୫ କିଲୋମିଟର ଯିବା ପରେ ଦୁର୍ଘଟଣାଗ୍ରସ୍ତ ହୋଇଥିଲା। ବିମାନରେ ୧୧୪ ସୈନିକ ଏବଂ ୧୧ ଜଣ କ୍ରୁ ସଦସ୍ୟ ଥିଲେ। କଲମ୍ବିଆ ସେନା କହିଛି ଯେ ପ୍ରାୟ ୮୦ ସୈନିକଙ୍କ ମୃତ୍ୟୁ ହୋଇଥିବା ଆଶଙ୍କା କରାଯାଉଛି।
କଲମ୍ବିଆ ରାଷ୍ଟ୍ରପତି ଗୁସ୍ତାଭୋ ପେଟ୍ରୋ ସାମରିକ ବିମାନ ଦୁର୍ଘଟଣାରେ ଦୁଃଖ ପ୍ରକାଶ କରିଛନ୍ତି। ପେଟ୍ରୋ କହିଛନ୍ତି ଯେ ସେନାର ଅସ୍ତ୍ରଶସ୍ତ୍ର ଏବଂ ସମ୍ବଳକୁ ଆଧୁନିକୀକରଣ କରିବା ପାଇଁ ନିଷ୍ପତ୍ତି ନିଆଯାଇସାରିଛି, କିନ୍ତୁ ପ୍ରଶାସନିକ ବିଳମ୍ବ ଯୋଗୁଁ ଏହା ଅଟକି ରହିଛି।
ଉଲ୍ଲେଖଯୋଗ୍ୟ, C-130 ହର୍କୁଲେସ୍ ହେଉଛି ବିଶ୍ୱର ସବୁଠାରୁ ନିର୍ଭରଯୋଗ୍ୟ ସାମରିକ ପରିବହନ ବିମାନ ମଧ୍ୟରୁ ଗୋଟିଏ, ଯାହା ସୈନ୍ୟ, ଅସ୍ତ୍ରଶସ୍ତ୍ର ଏବଂ ରିଲିଫ୍ ସାମଗ୍ରୀ ପହଞ୍ଚାଇବା ପାଇଁ ବ୍ୟବହୃତ ହୁଏ।
ଏହି ବିମାନଟି କଷ୍ଟକର ଏବଂ ଅଣଓସାରିଆ ରନୱେରେ ମଧ୍ୟ ଅବତରଣ କରିପାରିବ। ଏହା ଏକ ସମୟରେ ଭାରୀ ସାମଗ୍ରୀ, ହେଲିକପ୍ଟର, ସଶସ୍ତ୍ର ଯାନ ଏବଂ ବହୁ ପରିମାଣର ରିଲିଫ ସାମଗ୍ରୀ ବହନ କରିପାରିବ।
ଏହା ଚିକିତ୍ସା ଜରୁରୀକାଳୀନ ପରିସ୍ଥିତି, ପ୍ରାକୃତିକ ବିପର୍ଯ୍ୟୟ ସହାୟତା, ଅଗ୍ନି ନିର୍ବାପନ ଏବଂ ପାଣିପାଗ ପୂର୍ବାନୁମାନ ପାଇଁ ମଧ୍ୟ ବ୍ୟବହୃତ ହୁଏ। C-130 ହର୍କୁଲେସ୍ ଏକାଥରେ ୪୨ ହଜାର ପାଉଣ୍ଡ (ପ୍ରାୟ ୧୯ ହଜାର କିଲୋଗ୍ରାମ) ପର୍ଯ୍ୟନ୍ତ ଓଜନର ପରିବହନ କରିପାରିବ।