ଡ଼ଃ ଏନ୍. ଶେଷଗିରିଙ୍କ ସ୍ମୃତିରେ ଏନ୍ଆଇସି ଓଡ଼ିଶାର ରକ୍ତଦାନ ଶିବିର
ରକ୍ତଦାନର ଗୁରୁତ୍ୱ ଏବଂ ଜୀବନ ରକ୍ଷାରେ ଏହାର ଭୂମିକା ଉପରେ ଆଲୋଚନା
ଭୁବନେଶ୍ୱର, ୧୧/୦୫: ରାଷ୍ଟ୍ରୀୟ ସୂଚନା ବିଜ୍ଞାନ କେନ୍ଦ୍ର (ଏନ୍ଆଇସି), ଓଡ଼ିଶା ରାଜ୍ୟ କେନ୍ଦ୍ର ପକ୍ଷରୁ ପଦ୍ମଭୂଷଣ ଡ଼ଃ ଏନ୍. ଶେଷଗିରିଙ୍କ ଜୟନ୍ତୀ ଅବସରରେ ଭୁବନେଶ୍ୱରସ୍ଥିତ ରାଜ୍ୟ ମୁଖ୍ୟାଳୟରେ ଏକ ସ୍ୱେଚ୍ଛାମୂଳକ ରକ୍ତଦାନ ଶିବିର ଆୟୋଜିତ ହୋଇଥିଲା। ଡ଼ଃ ଶେଷଗିରି ଏନ୍ଆଇସିର ସ୍ଥାପକ ଏବଂ ପ୍ରଥମ ମହାନିର୍ଦ୍ଦେଶକ ଥିଲେ। ଏହି ଶିବିର ଭୁବନେଶ୍ୱରସ୍ଥିତ ରେଡକ୍ରସ ଆଞ୍ଚଳିକ ରକ୍ତ କେନ୍ଦ୍ରର ମେଡିକାଲ ଟିମ୍ ଏବଂ ବରିଷ୍ଠ ଚିକିତ୍ସା ଅଧିକାରୀ ଡଃ ଦେବୀ ପ୍ରସାଦ ରଥଙ୍କ ତତ୍ତ୍ୱାବଧାନରେ ପରିଚାଳିତ ହୋଇଥିଲା।
କାର୍ଯ୍ୟକ୍ରମର ପ୍ରାରମ୍ଭରେ ଭାରତରେ ସୂଚନା ପ୍ରଯୁକ୍ତିବିଦ୍ୟା ଏବଂ ଇ-ଗଭର୍ଣ୍ଣାନ୍ସର ଅଭିବୃଦ୍ଧି କ୍ଷେତ୍ରରେ ଡଃ ଶେଷଗିରିଙ୍କ ଦୂରଦୃଷ୍ଟିସମ୍ପନ୍ନ ଅବଦାନକୁ ସ୍ମରଣ କରି ତାଙ୍କ ପ୍ରତି ଶ୍ରଦ୍ଧାଞ୍ଜଳି ଅର୍ପଣ କରାଯାଇଥିଲା। ଏନ୍ଆଇସି ଓଡ଼ିଶାର ଅଧିକାରୀ ଓ କର୍ମଚାରୀମାନେ ଉତ୍ସାହର ସହିତ ଏହି ମାନବିକ କାର୍ଯ୍ୟରେ ଅଂଶଗ୍ରହଣ କରିଥିଲେ ଏବଂ ମୋଟ ୫୭ ୟୁନିଟ୍ ରକ୍ତ ସଂଗ୍ରହ କରାଯାଇଥିଲା। ଡ଼ଃ ଅଶୋକ କୁମାର ହୋତା, ଉପ ମହାନିର୍ଦ୍ଦେଶକ ଏବଂ ରାଜ୍ୟ ସୂଚନା ବିଜ୍ଞାନ ଅଧିକାରୀ, ରକ୍ତଦାତାମାନଙ୍କୁ ପ୍ରମାଣପତ୍ର ଓ ସ୍ମୃତିଚିହ୍ନ ପ୍ରଦାନ କରିଥିଲେ ଏବଂ ଏହି ମହତ୍ କାର୍ଯ୍ୟରେ ସେମାନଙ୍କ ସକ୍ରିୟ ସହଭାଗିତା ପାଇଁ କୃତଜ୍ଞତା ଜଣାଇଥିଲେ।
ଏହି ପାଳନର ଅଂଶସ୍ୱରୂପ, ଗତ ମଇ ୮ ତାରିଖରେ ଡଃ ଶେଷଗିରି ମେମୋରିଆଲ ହଲ୍ରେ ସ୍ୱେଚ୍ଛାକୃତ ରକ୍ତଦାନ ଉପରେ ଏକ ସଚେତନତା ଶିବିର ଆୟୋଜନ କରାଯାଇଥିଲା। ଓଡ଼ିଶା ରାଜ୍ୟ ଏଡସ୍ ନିୟନ୍ତ୍ରଣ ସମିତିର ପୂର୍ବତନ ପରାମର୍ଶଦାତା ତଥା ଫେଡେରେସନ୍ ଅଫ୍ ବ୍ଲଡ୍ ଡୋନର୍ସ ଅର୍ଗାନାଇଜେସନ୍ ଅଫ୍ ଇଣ୍ଡିଆର ଉପସଭାପତି ଶ୍ରୀ ପ୍ରଦୀପ୍ତ କୁମାର ତ୍ରିପାଠୀ ଯୋଗଦେଇ ନିୟମିତ ସ୍ୱେଚ୍ଛାକୃତ ରକ୍ତଦାନର ଗୁରୁତ୍ୱ ଏବଂ ଜୀବନ ରକ୍ଷାରେ ଏହାର ଗୁରୁତ୍ୱପୂର୍ଣ୍ଣ ଭୂମିକା ସମ୍ପର୍କରେ ଆଲୋକପାତ କରିଥିଲେ।
ଏହି କାର୍ଯ୍ୟକ୍ରମ ଡଃ ଏନ୍. ଶେଷଗିରିଙ୍କ ସ୍ମୃତି ପ୍ରତି ଗଭୀର ସମ୍ମାନ ଜଣାଇବା ସହ ସାମାଜିକ ଦାୟିତ୍ୱବୋଧ ଏବଂ ମାନବିକ ସେବା ପ୍ରତି ଏନଆଇସି ଓଡ଼ିଶାର ପ୍ରତିବଦ୍ଧତାକୁ ପ୍ରତିଫଳିତ କରିଥିଲା।