ଜଗତସିଂହପୁର, ୨୦/୦୬: ଜଗତସିଂହପୁର ଜିଇଡି (GED) କାର୍ଯ୍ୟାଳୟର ଜୁନିୟର ଇଞ୍ଜିନିୟର ସୋମା ଦାସଙ୍କୁ ୧୫ ହଜାର ଟଙ୍କା ଲାଞ୍ଚ ନେଉଥିବା ସମୟରେ ଭିଜିଲାନ୍ସ ଅଧିକାରୀମାନେ ଗିରଫ କରିଛନ୍ତି। ଏକ ଗ୍ରାମ ପଞ୍ଚାୟତରେ ଷ୍ଟ୍ରିଟ୍ ଲାଇଟ୍ ସ୍ଥାପନ କାର୍ଯ୍ୟ ପାଇଁ ଏଷ୍ଟିମେଟ୍ ପ୍ରସ୍ତୁତ କରିବା ବଦଳରେ ସେ ଲାଞ୍ଚ ଟଙ୍କା ଦାବି କରିଥିବା ଅଭିଯୋଗ ରହିଛି।
ଭିଜିଲାନ୍ସ ସୂତ୍ରରୁ ପ୍ରକାଶ ଯେ, ଜଣେ ନିର୍ବାହକ ଗତ ୮ ମେ ୨୦୨୬ ତାରିଖରେ ସମ୍ପୃକ୍ତ ଗ୍ରାମ ପଞ୍ଚାୟତ କର୍ତ୍ତୃପକ୍ଷଙ୍କ ଚିଠି ନେଇ ଜୁନିୟର ଇଞ୍ଜିନିୟର ସୋମା ଦାସଙ୍କୁ ଏଷ୍ଟିମେଟ୍ ପ୍ରସ୍ତୁତି ପାଇଁ ଅନୁରୋଧ କରିଥିଲେ। ଉକ୍ତ କାମର ଆନୁମାନିକ ମୂଲ୍ୟ ପ୍ରାୟ ୧୫ ଲକ୍ଷ ଟଙ୍କା ଥିବାବେଳେ କାର୍ଯ୍ୟାଦେଶ ପାଇବା ପାଇଁ ଏଷ୍ଟିମେଟ୍ ପ୍ରସ୍ତୁତି ଆବଶ୍ୟକ ଥିଲା। ତେବେ ଅଭିଯୋଗ ଅନୁଯାୟୀ, ନିର୍ବାହକଙ୍କ ବାରମ୍ବାର ଅନୁରୋଧ ସତ୍ତ୍ୱେ ସୋମା ଦାସ କୌଣସି ଯୁକ୍ତିସଙ୍ଗତ କାରଣ ନ ଦେଖାଇ ଏଷ୍ଟିମେଟ୍ ପ୍ରସ୍ତୁତିକୁ ଲମ୍ବା ସମୟ ଧରି ପକାଇ ରଖିଥିଲେ।
ପରେ ସେ ଏଷ୍ଟିମେଟ୍ ମୂଲ୍ୟର ପ୍ରାୟ ଏକ ପ୍ରତିଶତ ହିସାବରେ ୧୫ ହଜାର ଟଙ୍କା ଲାଞ୍ଚ ଦାବି କରିଥିଲେ। ଏଥିରେ ଅତିଷ୍ଠ ହୋଇ ନିର୍ବାହକ ଓଡ଼ିଶା ଭିଜିଲାନ୍ସର ଦ୍ୱାରସ୍ଥ ହୋଇ ଲିଖିତ ଅଭିଯୋଗ କରିଥିଲେ।
ଅଭିଯୋଗର ସତ୍ୟତା ଯାଞ୍ଚ ପରେ ଭିଜିଲାନ୍ସ ପକ୍ଷରୁ ତାଙ୍କୁ ରେଡ୍ ହ୍ୟାଣ୍ଡ ଧରିବା ପାଇଁ ଯୋଜନା ପ୍ରସ୍ତୁତ କରାଯାଇଥିଲା। ଗତ ୧୯ ଜୁନରେ ଭିଜିଲାନ୍ସ ଟିମ୍ ଜଗତସିଂହପୁରସ୍ଥିତ ତାଙ୍କ କାର୍ଯ୍ୟାଳୟରେ ଲାଞ୍ଚ ନେଲା ବେଳେ ଧରିଥିଲା।
ତାଙ୍କଠାରୁ ସମ୍ପୂର୍ଣ୍ଣ ୧୫ ହଜାର ଲାଞ୍ଚ ଟଙ୍କା ଜବତ କରାଯାଇଥିଲା। ଗିରଫଦାରୀ ପରେ ଭିଜିଲାନ୍ସ ଅଧିକାରୀମାନେ ସୋମା ଦାସଙ୍କ କଟକ ସିଡିଏ ସେକ୍ଟର–୨, ଅଶ୍ୱିନୀ ହସ୍ପିଟାଲ ନିକଟସ୍ଥ ଭଡ଼ାଘର ଏବଂ ତାଙ୍କ କାର୍ଯ୍ୟାଳୟ କକ୍ଷରେ ଏକକାଳୀନ ତଲାସି ଆରମ୍ଭ କରିଥିଲେ।