ଦୀପାବଳି ପରେ ସାରା ଦେଶରେ ପାଳନ ହେବ ‘ଧିକ୍କାର ଦିବସ’

ନୂଆଦିଲ୍ଲୀ, ୦୫/୧୧: ଦେଶର ପ୍ରମୁଖ ବ୍ୟବସାୟୀ ସଂଗଠନ କନଫେଡେରେସନ୍ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ (ସିଏଆଇଟି) କଂଗ୍ରେସ ଏବଂ ଏହାର ବରିଷ୍ଠ ନେତା ରାହୁଲ ଗାନ୍ଧୀଙ୍କ ବିରୋଧରେ ଏକ ବଡ଼ ଧରଣର ଅଭିଯାନ ଆରମ୍ଭ କରିଛି। ଦିଲ୍ଲୀ ସମେତ ଦେଶର ବିଭିନ୍ନ ସ୍ଥାନରେ କଂଗ୍ରେସର କ୍ରମାଗତ ରାଲି, ଧାରଣା ଓ ପ୍ରଦର୍ଶନ ଯୋଗୁଁ ବ୍ୟବସାୟୀମାନେ ଅସମ୍ଭବ ଆର୍ଥିକ କ୍ଷତିର ସମ୍ମୁଖୀନ ହେଉଥିବା ସିଏଆଇଟି ଅଭିଯୋଗ କରିଛି।

ସିଏଆଇଟି ନେତୃବୃନ୍ଦ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଉପରେ ବର୍ଷିବା ସହ କହିଛନ୍ତି ଯେ, ନିଜର ରାଜନୈତିକ ସ୍ୱାର୍ଥ ଓ ଲଢ଼େଇ ପାଇଁ ସାଧାରଣ ବ୍ୟବସାୟୀ କିମ୍ବା ଦୋକାନୀମାନଙ୍କୁ ‘ପଞ୍ଚିଂ ବ୍ୟାଗ୍’ ଭାବେ ବ୍ୟବହାର କରାଯାଇପାରିବ ନାହିଁ। ରାଜନୈତିକ ପ୍ରଦର୍ଶନ ନାଁରେ ବଜାର ଗୁଡ଼ିକୁ ବାରମ୍ବାର ବନ୍ଦ ରଖାଯିବା କାରଣରୁ କ୍ଷୁଦ୍ର ଓ ମାଧ୍ୟମ ବ୍ୟବସାୟୀଙ୍କ ଜୀବିକା ଗୁରୁତର ଭାବେ ପ୍ରଭାବିତ ହେଉଛି।

ବିଶେଷ କରି ଦିଲ୍ଲୀ ଏବଂ ପ୍ରମୁଖ ସହରଗୁଡ଼ିକରେ କ୍ରମାଗତ ରାଲି, ରାସ୍ତାରୋକ ଓ ଧାରଣା ଯୋଗୁଁ ଗ୍ରାହକମାନେ ବଜାରକୁ ଆସିପାରୁନାହାନ୍ତି। ଯାତାୟାତ ବାଧାପ୍ରାପ୍ତ ହେବା ଯୋଗୁଁ ଦୋକାନଗୁଡ଼ିକ ବାଧ୍ୟତାବଶତଃ ବନ୍ଦ କରିବାକୁ ପଡ଼ୁଛି। ପାର୍ବଣ ଋତୁରେ ସାଧାରଣ ବ୍ୟବସାୟୀ ଓ ଦିନମଜୁରିଆ ଦୋକାନୀମାନେ ଭୀଷଣ କ୍ଷତି ସହିବାକୁ ବାଧ୍ୟ ହେଉଛନ୍ତି।

ତେଣୁ ଏହି ବିରୋଧକୁ ଆହୁରି ତୀବ୍ର କରିବା ପାଇଁ ସିଏଆଇଟି ସାରା ଦେଶରେ ‘ଧିକ୍କାର ଦିବସ’ ପାଳନ କରିବାକୁ ଘୋଷଣା କରିଛି। ଦୀପାବଳି ଶେଷ ହେବା ପରେ ସଂଘର ଏକ କାର୍ଯ୍ୟକାରୀ ବୈଠକ ବସିବ। ଏହି ବୈଠକରେ ସାରା ଦେଶରେ କେଉଁ ଦିନ ଏହି ‘ଧିକ୍କାର ଦିବସ’ ପାଳନ କରାଯିବ, ସେହି ନିର୍ଦ୍ଦିଷ୍ଟ ତାରିଖ ନିର୍ଦ୍ଧାରଣ କରାଯିବ। ଏହି ଦିବସ ଜରିଆରେ ସାରା ଦେଶର ଲକ୍ଷ ଲକ୍ଷ ବ୍ୟବସାୟୀ କଂଗ୍ରେସର ଏହିଭଳି ନୀତି ବିରୋଧରେ ନିଜର ଅସନ୍ତୋଷ ବ୍ୟକ୍ତ କରିବେ।