ଭୁବନେଶ୍ୱର, ୧୮/୦୯: ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ପକ୍ଷରୁ ‘ଏକାମ୍ର ରେସିଡେନ୍ସି’ ଗୃହ ନିର୍ମାଣ ଯୋଜନା ପାଇଁ ଆବେଦନ ପ୍ରକ୍ରିୟା ଆରମ୍ଭ ହୋଇଯାଇଛି। ଏହି ଯୋଜନାରେ ଆପାର୍ଟମେଣ୍ଟ କିଣିବାକୁ ଆଗ୍ରହୀ ଥିବା ବ୍ୟକ୍ତିମାନେ ଆସନ୍ତା ଅକ୍ଟୋବର ୩୧ ତାରିଖ ପର୍ଯ୍ୟନ୍ତ ଆବେଦନ କରିପାରିବେ।
ଏହି ବୁକିଂ ପ୍ରକ୍ରିୟାକୁ ସମ୍ପୂର୍ଣ୍ଣ ସ୍ୱଚ୍ଛ, ପାରଦର୍ଶୀ ଓ ଜାଲିଆତିମୁକ୍ତ କରିବା ପାଇଁ ବିଡିଏ ପକ୍ଷରୁ ‘ୟୁନିକ ଆକାଉଣ୍ଟ ନମ୍ବର’ ବ୍ୟବସ୍ଥା ଲାଗୁ କରାଯାଇଛି।
ପଞ୍ଜୀକରଣ ଓ ଆବେଦନ ପ୍ରକ୍ରିୟା:
ଆବେଦନକାରୀ ପ୍ରଥମେ BDAର ଅଫିସିଆଲ୍ ୱେବସାଇଟ୍କୁ ଯାଇ ଏକ ‘ୟୁନିକ ଆକାଉଣ୍ଟ ନମ୍ବର’ ପାଇଁ ଆବେଦନ କରିବେ। ୟୁନିକ ଆକାଉଣ୍ଟ ନମ୍ବର ମିଳିବା ପରେ ସେହି ଆକାଉଣ୍ଟ ଜରିଆରେ ଏକାମ୍ର ରେସିଡେନ୍ସିର ଆପାର୍ଟମେଣ୍ଟ ବୁକିଂ ପାଇଁ ଆବେଦନ ଫର୍ମ ପୂରଣ କରିପାରିବେ।
ମୁଖ୍ୟ ନିୟମ ଓ ସର୍ତ୍ତାବଳୀ:
ଯୋଜନାର ନିୟମାନୁସାରେ, ଗୋଟିଏ ପରିବାରରୁ କେବଳ ଜଣେ ହିଁ ସଦସ୍ୟ ଏହି ଆପାର୍ଟମେଣ୍ଟ ପାଇଁ ଆବେଦନ କରିବାକୁ ଯୋଗ୍ୟ ବିବେଚିତ ହେବେ। ସମସ୍ତ ଯୋଗ୍ୟ ଆବେଦନକାରୀଙ୍କ ମଧ୍ୟରୁ ଆପାର୍ଟମେଣ୍ଟଗୁଡ଼ିକର ଆବଣ୍ଟନ ସମ୍ପୂର୍ଣ୍ଣ ସ୍ୱଚ୍ଛ ଓ ନିରପେକ୍ଷ ଲଟେରି ବ୍ୟବସ୍ଥା ଦ୍ୱାରା କରାଯିବ।