ସୁରକ୍ଷାକର୍ମୀ ଏବଂ ନକ୍ସଲଙ୍କ ମଧ୍ୟରେ ଗୁଳି ବିନିମୟ ହୋଇଛି । ଫଳରେ ଏଥିରେ ୫ ସିଆର୍ପିଏଫ୍ ଯବାନ ଗୁଳି ବାଜି ଆହତ ହୋଇଛନ୍ତି । ସୀମାନ୍ତ ଝାଡ଼ଖଣ୍ଡ ପଶ୍ଚିମ ସିଂହଭୂମି ଜିଲ୍ଲା ଗୋଏଲକେରା ସର୍ଜନ ବୁରୁ ଜଙ୍ଗଲରେ ଏହି ଗୁଳି ବିନିମୟ ହୋଇଥିବା ଜଣାପଡ଼ିଛି । ଆସନ୍ତାକାଲି ଠାରୁ ୮ ତାରିଖ ପଯ୍ୟନ୍ତ ନକ୍ସଲଙ୍କ PLGA ସପ୍ତାହ ।
ଏହି PLGA ସପ୍ତାହ ପାଇଁ ଟପ ନକ୍ସଲ ନେତା ଅନମୋଲ ଓରଫ ସମରଜୀ, କେନ୍ଦ୍ରୀୟ କମିଟି ସଦସ୍ୟ ମିଶିର ବେଶ୍ରା ବୈଠକ କରିଥିଲେ । ଖବର ପାଇ CRPF, ଝାଡ଼ଖଣ୍ଡ ଆର୍ମସ ଫୋର୍ସ, ଝାଡ଼ଖଣ୍ଡ ଜାଗୁଆର ଫୋର୍ସ ସର୍ଚ୍ଚ ଅପରେସନ କରିଥିଲେ । ପ୍ରଥମେ ନକ୍ସଲ ସୁରକ୍ଷା କର୍ମୀଙ୍କ ଉପରକୁ ଗୁଳିମାଡ଼ କରିଥିଲେ । ଯାହାକୁ ନେଇ ପାଲଟା ଗୁଳିମାଡ଼ କରିଥିଲେ ସୁରକ୍ଷା କର୍ମୀ ।
ତେବେ ଆହତ ଯବାନ ସୁଶୀଲ ଲାକ୍ରାଙ୍କ ବାମ ଗୋଡ଼ରେ ଗୁଳି ବାଜିଥିବା ବେଳେ ତାଙ୍କ ଘର ସୁନ୍ଦରଗଡ଼ ବୋଲି ଜଣାପଡ଼ିଛି । ସେହିପରି ଯବାନ ସୁରଜ କୁମାରଙ୍କ ଡାହାଣ ଗୋଡ଼ରେ ଗୁଳି ବାଜିଥିବା ବେଳେ ତାଙ୍କ ଘର ଉତ୍ତର ପ୍ରଦେଶ, ଓଡ଼ିଶାର ଯବାନ ବୁଦ୍ଧଦେବ କିଶନଙ୍କ ହାତରେ ମାଡ଼ ହୋଇଛି ଗୁଳି, କର୍ଣ୍ଣାଟକର କ୍ରିଷ୍ଣ। ବୋକାରେଙ୍କ ଛାତିରେ ଗୁଳିମାଡ଼ ହୋଇଥିବା ବେଳେ ଅନ୍ୟଜଣେ ଯବାନଙ୍କ ପରିଚୟ ମିଳିପାରିନାହିଁ । ସମସ୍ତ ଆହତଙ୍କୁ ରାଞ୍ଚିର ରିମ୍ସ ହସ୍ପିଟାଲ୍ରେ ଭର୍ତ୍ତି କରାଯାଇଛି । ଅନ୍ୟପଟେ କେତେଜଣ ନକ୍ସଲ ଆହତ କି ମୃତ ତାହା ଜଣାପଡିନାହିଁ ।