ମୁମ୍ବାଇ, ୧୦/୧୧: ବଲିଉଡ୍ ଷ୍ଟାର୍ଙ୍କ ସୁରକ୍ଷାକୁ ନେଇ ବଢ଼ିଲା ଚିନ୍ତା। ଅଭିନେତା ଟାଇଗର ଶ୍ରଫ୍ଙ୍କ ଗାଡ଼ି ଉପରେ ଗୁଳିମାଡ଼ ଘଟଣା ପରେ ଏବେ ସତର୍କ ହୋଇଛି ମୁମ୍ବାଇ ପୋଲିସ। ବଲିଉଡ୍ର ପ୍ରମୁଖ ଅଭିନେତା ଓ ସେଲିବ୍ରିଟିଙ୍କୁ ସୁରକ୍ଷା ଦୃଷ୍ଟିରୁ କିଛି ପରାମର୍ଶ ଦେଇଛି ପୋଲିସ। ସର୍ବସାଧାରଣ ସ୍ଥାନକୁ ଯିବା ଏବଂ ଭିଡ଼ ଭିତରେ ପ୍ରଶଂସକଙ୍କ ସହ ମିଶିବାଠାରୁ ଦୂରେଇ ରହିବାକୁ ସେମାନଙ୍କୁ କୁହାଯାଇଛି।
ସୂଚନା ଅନୁସାରେ, ପୋଲିସ ପକ୍ଷରୁ ବଲିଉଡ୍ର ପ୍ରମୁଖ କଳାକାରଙ୍କୁ ଏହି ସତର୍କତାମୂଳକ ପରାମର୍ଶ ଦିଆଯାଇଛି। ବିଶେଷକରି ସର୍ବସାଧାରଣ ସ୍ଥାନରେ ଅଧିକ ସମୟ ରହିବା, ପ୍ରଶଂସକଙ୍କ ଗହଣରେ ମିଶିବା ଏବଂ ଭିଡ଼ ସ୍ଥାନରେ ସେଲ୍ଫି ନେବାଠାରୁ ଦୂରେଇ ରହିବାକୁ କୁହାଯାଇଛି।
ସୂଚନାଯୋଗ୍ୟ, ଗତ ଅକ୍ଟୋବର ୧୮ ତାରିଖରେ ମୁମ୍ବାଇର ଜୁହୁ ଅଞ୍ଚଳରେ ଟାଇଗର ଶ୍ରଫ୍ଙ୍କ ଗାଡ଼ିକୁ ଲକ୍ଷ୍ୟ କରି ଗୁଳିମାଡ଼ ହୋଇଥିଲା। ତିନି ଜଣ ଦୁର୍ବୃତ୍ତ ବାଇକ୍ରେ ଆସି ତାଙ୍କ ଗାଡ଼ି ଉପରକୁ ଗୁଳି ଚଳାଇଥିଲେ। ଏହି ଘଟଣା ପରେ ଟାଇଗରଙ୍କ ସୁରକ୍ଷା ବଢ଼ାଇ ଦିଆଯାଇଥିଲା। ଘଟଣାରେ ସମ୍ପୃକ୍ତ ଥିବା ଅଭିଯୋଗରେ ତିନି ଜଣଙ୍କୁ ରାଜସ୍ଥାନର କୋଟାରୁ ଗିରଫ କରାଯାଇଥିଲା।
ଏହି ଘଟଣାର ତଦନ୍ତ ବେଳେ ଆଉ ଏକ ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିଥିଲା। ଟାଇଗରଙ୍କୁ ଆକ୍ରମଣ କରିବା ପୂର୍ବରୁ ଅଭିଯୁକ୍ତମାନେ ଅନ୍ୟ କିଛି ବଲିଉଡ୍ କଳାକାରଙ୍କ ଘର ଉପରେ ନଜର ରଖିଥିବା ଜଣାପଡ଼ିଥିଲା। ଅମିତାଭ ବଚ୍ଚନ, ସଲମାନ ଖାନ୍, ଆମିର ଖାନ୍ ଓ ଅକ୍ଷୟ କୁମାରଙ୍କ ଭଳି ଅଭିନେତାଙ୍କ ବାସଭବନ ଉପରେ ମଧ୍ୟ ଅଭିଯୁକ୍ତମାନେ ନଜର ରଖିଥିବା ନେଇ ଖବର ପ୍ରକାଶ ପାଇଥିଲା।
ଅନ୍ୟପଟେ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ ପକ୍ଷରୁ ବଲିଉଡ୍ର କିଛି କଳାକାରଙ୍କୁ ଧମକ ମିଳିଥିବା ଖବର ମଧ୍ୟ ସାମ୍ନାକୁ ଆସିଛି। ଏଭଳି ପରିସ୍ଥିତିରେ କୌଣସି ପ୍ରକାରର ବିପଦକୁ ଏଡ଼ାଇବା ପାଇଁ ମୁମ୍ବାଇ ପୋଲିସ ଆଗୁଆ ସତର୍କତା ଅବଲମ୍ବନ କରୁଛି। ସେଲିବ୍ରିଟିମାନଙ୍କ ସୁରକ୍ଷା ବ୍ୟବସ୍ଥାର ମଧ୍ୟ ସମୀକ୍ଷା କରାଯାଉଛି।
ଟାଇଗର ଶ୍ରଫ୍ଙ୍କ ଘଟଣା ପରେ କେବଳ ତାଙ୍କ ସୁରକ୍ଷା ନୁହେଁ, ସଲମାନ ଖାନ୍, ଆମିର ଖାନ୍ ଏବଂ ଫିଲ୍ମ ନିର୍ଦ୍ଦେଶକ ରୋହିତ ଶେଟ୍ଟୀଙ୍କ ଭଳି ବ୍ୟକ୍ତିତ୍ୱଙ୍କ ବାସଭବନ ନିକଟରେ ମଧ୍ୟ ସୁରକ୍ଷା ବଢ଼ାଯାଇଛି। ଏବେ ବଲିଉଡ୍ର ଅନ୍ୟ କଳାକାରମାନଙ୍କୁ ମଧ୍ୟ ସତର୍କ ରହିବାକୁ ପୋଲିସ ପରାମର୍ଶ ଦେଇଛି। ତେବେ ଏହି ପରାମର୍ଶ କୌଣସି ନିର୍ଦ୍ଦିଷ୍ଟ ଆକ୍ରମଣ ଆଶଙ୍କା ନୁହେଁ, ବରଂ ସୁରକ୍ଷା ଦୃଷ୍ଟିରୁ ଏକ ଆଗୁଆ ପଦକ୍ଷେପ ବୋଲି ପୋଲିସ କହିଛି।