ସହିଦନଗରସ୍ଥିତ ବାରରେ ଅଗ୍ନିକାଣ୍ଡ

ଭୁବନେଶ୍ବର : ସୋମବାର ସକାଳେ ରାଜଧାନୀର ସହିଦ ନଗର ଅଞ୍ଚଳର ଭବାନୀ ମଲ୍ ନିକଟରେ ଥିବା ଏକ ଚାରି ମହଲା କୋଠାରେ ଅଗ୍ନିକାଣ୍ଡ ଘଟିଛି। ବିଲଡିଂର ବେସମେଣ୍ଟରେ ଚାଲୁଥିବା ଏକ ବାର୍ ଓ ରେଷ୍ଟୁରାଣ୍ଟରେ ସର୍ଟ ସର୍କିଟ ଯୋଗୁଁ ନିଆଁ ଲାଗିଥିବା ସନ୍ଦେହ କରାଯାଉଛି।

ମିଳିଥିବା ସୂଚନା ଅନୁଯାୟୀ, କିଛି ଲୋକ କୋଠାରୁ ଧୂଆଁ ବାହାରୁଥିବା ଦେଖି ଅଗ୍ନିଶମ ବିଭାଗକୁ ଖବର ଦେଇଥିଲେ। ଅଗ୍ନିଶମ ବାହିନୀ ପହଞ୍ଚିବା ପରେ ନିଆଁ ଲିଭାଇବା ସହ କୋଠା ଭିତରେ ଫସି ରହିଥିବା ଲୋକଙ୍କୁ ଉଦ୍ଧାର କରିବାକୁ ପ୍ରାଥମିକତା ଦେଇଥିଲେ। ବିଲ୍ଡିଂର ଚତୁର୍ଥ ମହଲାରୁ ଫସି ରହିଥିବା ୪ ଜଣଙ୍କୁ ସିଡି ସାହାଯ୍ୟରେ ନିକଟସ୍ଥ କୋଠାକୁ ସ୍ଥାନାନ୍ତର କରି ଉଦ୍ଧାର କରିବାରେ ସଫଳ ହୋଇଥିଲେ। ଏଥିରେ କେହି ଆହତ ହୋଇନାହାନ୍ତି। ନିଆଁକୁ ଆୟତ୍ତ କରି ଫସି ରହିଥିବା ଲୋକଙ୍କୁ ଉଦ୍ଧାର କରିବା ପରେ ଏବେ ଅଗ୍ନିଶମ ବିଭାଗ ଅଗ୍ନିକାଣ୍ଡର ଉତ୍ସ ଖୋଜିବା ପାଇଁ ତଦନ୍ତ ଆରମ୍ଭ କରିଛି।