ପ୍ରଧାନ ବିଚାରପତିଙ୍କୁ ଇସି ଚୟନ ପ୍ରକ୍ରିୟାରୁ ବାଦ ଦେବାକୁ ବିଲ୍ ଆଗତ କଲେ କେନ୍ଦ୍ର ସରକାର

ନୂଆଦିଲ୍ଲୀ: ନିର୍ବାଚନ କମିଶନର ନିଯୁକ୍ତି ପାଇଁ ଚୟନ ସମିତିର ସଦସ୍ୟ ପଦରୁ ପ୍ରଧାନ ବିଚାରପତିଙ୍କୁ ହଟାଇବା ପାଇଁ ସଂସଦରେ ଏକ ବିଲ୍ ଆଗତ କରିଛନ୍ତି କେନ୍ଦ୍ର ସରକାର । ନୂଆ ବିଲ୍ ଅନୁଯାୟୀ, ପ୍ରଧାନମନ୍ତ୍ରୀ, ବିରୋଧୀ ଦଳ ନେତା ଏବଂ କେନ୍ଦ୍ର ସରକାରଙ୍କ ଦ୍ୱାରା ଗଠିତ ଏକ ପ୍ୟାନେଲ୍ ନିର୍ବାଚନ କମିଶନର ଚୟନ କରିବେ । ମୁଖ୍ୟ ନିର୍ବାଚନ କମିଶନର ଏବଂ ନିର୍ବାଚନ କମିଶନର (ନିଯୁକ୍ତି ସର୍ତାବଳୀ ଏବଂ କାର୍ଯ୍ୟକାଳ) ବିଲ୍, ୨୦୨୩ ରାଜ୍ୟସଭାରେ ଆଗତ କରିବା ପାଇଁ ତାଲିକାଭୁକ୍ତ ହୋଇଛି । ମୁଖ୍ୟ ନିର୍ବାଚନ କମିଶନରଙ୍କୁ ସୁପାରିସ କରିବା ପାଇଁ ଚୟନ କମିଟିର ସଦସ୍ୟ ଭାବେ ପ୍ରଧାନ ବିଚାରପତିଙ୍କ ସ୍ଥାନରେ ଜଣେ କେନ୍ଦ୍ର କ୍ୟାବିନେଟ ମନ୍ତ୍ରୀଙ୍କୁ ନିଯୁକ୍ତ କରିବେ ପ୍ରଧାନମନ୍ତ୍ରୀ । ବିରୋଧୀ ଦଳ ନେତା ସଦସ୍ୟ ରହିବେ କିନ୍ତୁ କେନ୍ଦ୍ରମନ୍ତ୍ରୀଙ୍କ ସଂଖ୍ୟା ଗରିଷ୍ଠତା ଅଧିକ ରହିବ । ଅନ୍ୟପକ୍ଷରେ କଂଗ୍ରେସ ଏହି ବିଲକୁ ସମାଲୋଚନା କରିବା ସହ ଗୁରୁତ୍ୱପୂର୍ଣ୍ଣ ଅନୁଷ୍ଠାନକୁ ନିଜ ନିୟନ୍ତ୍ରଣ ଅଧିନକୁ ନେବା ପାଇଁ ଏହା ଶାସକ ଦଳର ଆଉ ଏକ ପ୍ରୟାସ ବୋଲି କହିଛି ।