ଜେଏସଡବ୍ଲ୍ୟୁ ଓ ରାଜ୍ୟ ସରକାରଙ୍କ ମଧ୍ୟରେ ବୁଝାମଣା ପତ୍ର ସ୍ୱାକ୍ଷର

ଭୁବନେଶ୍ଵର, ୧୦/୦୨/୨୦୨୪: ଇଲେକ୍ଟ୍ରିକ୍ ଯାନ (ଇଭି) କ୍ଷେତ୍ରରେ ଓଡ଼ିଶାର ସ୍ଥିତିକୁ ସୁଦୃଢ଼ କରିବା ପାଇଁ ଜେଏସଡବ୍ଲ୍ୟୁ ଗ୍ରୁପ୍ କଟକ ଓ ପାରାଦୀପରେ ଏକ ସମନ୍ବିତ ଇଲେକ୍ଟ୍ରିକ୍ ଯାନ (ଇଭି) ଏବଂ ଇଭି ବ୍ୟାଟେରୀ ଉତ୍ପାଦନ ପ୍ରକଳ୍ପ ପ୍ରତିଷ୍ଠା ପାଇଁ ଓଡ଼ିଶା ସରକାରଙ୍କ ସହ ବୁଝାମଣାପତ୍ର ସ୍ୱାକ୍ଷର କରିଛି।

କଟକରେ ଇଭି ଯାନ ଓ କମ୍ପୋନେଣ୍ଟ ମ୍ୟାନୁଫାକଚରିଂ ପ୍ଲାଣ୍ଟ ଓ ପାରାଦୀପରେ କପର ସ୍ମେଲଟର ଏବଂ ଲିଥିୟମ୍ ରିଫାଇନାରୀ ସ୍ଥାପନ କରାଯିବ। ୪୦,୦୦୦ କୋଟି ଟଙ୍କା ବିନିଯୋଗରେ ନିର୍ମିତ ଏହି ମହତ୍ତ୍ୱାକାଂକ୍ଷୀ ପ୍ରକଳ୍ପ ଯୁବବର୍ଗଙ୍କ ପାଇଁ ୧୦,୦୦୦ରୁ ଅଧିକ ନିଯୁକ୍ତି ସୃଷ୍ଟି କରିବାରେ ସହାୟକ ହେବ। ଏହାବ୍ୟତୀତ ସ୍ଥାନୀୟ କର୍ମଚାରୀଙ୍କୁ ଦକ୍ଷ କରିବା ସହ ରାଜ୍ୟର ଯୁବଗୋଷ୍ଠୀଙ୍କ ନିଯୁକ୍ତି କ୍ଷମତା ବୃଦ୍ଧି କରିବ। ଏହି ପଦକ୍ଷେପ କେବଳ ଓଡ଼ିଶାର ଶିଳ୍ପ କ୍ଷେତ୍ରରେ ଉନ୍ନତି ଆଣିବ ନାହିଁ ବରଂ ଭାରତର ଇଭି ଉତ୍ପାଦନ କ୍ଷମତାରେ ମଧ୍ୟ ଗୁରୁତ୍ୱପୂର୍ଣ୍ଣ ଯୋଗଦାନ ଦେବ ବୋଲି ଆଶା କରାଯାଉଛି।

ଏହି ପ୍ରକଳ୍ପରେ ୫୦ଟି ଜିଡବ୍ଲ୍ୟୁଏଚ୍ ଇଭି ବ୍ୟାଟେରୀ ପ୍ଲାଣ୍ଟ, ଇଭି, ଲିଥିୟମ୍ ବିଶୋଧନାଗାର, କପର ସ୍ମେଲଟର ଏବଂ ଆନୁଷଙ୍ଗିକ ଉପାଦାନ ଉତ୍ପାଦନ ୟୁନିଟ୍ ରହିଛି।

ଏହି ଅବସରରେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ କହିଥିଲେ ଯେ “ଏହି ଦିନ ଶିଳ୍ପ ଉତ୍କର୍ଷତା ଏବଂ ନିରନ୍ତର ବିକାଶ ଦିଗରେ ଆମର ଯାତ୍ରାରେ ଏକ ବଡ଼ ଅଗ୍ରଗତି। ୫-ଟି ଅଭିଯାନ ଦ୍ୱାରା ଓଡ଼ିଶା ପରିବର୍ତ୍ତନର ନିରନ୍ତର ମାର୍ଗରେ ଗତି କରୁଛି। ଜେଏସଡବ୍ଲ୍ୟୁ ଗ୍ରୁପର ଇଲେକ୍ଟ୍ରିକ୍ ଯାନ ଉତ୍ପାଦନ ୟୁନିଟ୍ ପ୍ରତିଷ୍ଠା ଆମ ରାଜ୍ୟର ବିକଶିତ ଶିଳ୍ପର ଏକ ପ୍ରମାଣ। ଏହି ରଣନୈତିକ ପଦକ୍ଷେପ ନିରନ୍ତର ବିକାଶ ପାଇଁ ଆମର ପ୍ରତିବଦ୍ଧତାକୁ ଦର୍ଶାଉଛି। ଏହି ପ୍ରକଳ୍ପ ହଜାର ହଜାର ପରିବାରର ଜୀବିକା ବୃଦ୍ଧି କରିବା ସହ ଆମ ଅଞ୍ଚଳର ସାମାଜିକ-ଅର୍ଥନୈତିକ ଉନ୍ନତିରେ ସହାୟକ ହେବ। ଏହା ଏମଏସଏମଇର ଅଭିବୃଦ୍ଧିକୁ ପ୍ରୋତ୍ସାହିତ କରିବ ଏବଂ ଆନୁଷଙ୍ଗିକ ଶିଳ୍ପର ଏକ ଜୀବନ୍ତ ଇକୋସିଷ୍ଟମର ବିକାଶକୁ ପ୍ରୋତ୍ସାହିତ କରିବ।”

ମୁଖ୍ୟମନ୍ତ୍ରୀ ଆହୁରି ମଧ୍ୟ କହିଥିଲେ ଯେ, “ସବୁଜ ଜ୍ଞାନକୌଶଳକୁ ଗ୍ରହଣ କରିବା, କାର୍ବନ ନିର୍ଗମନ ହ୍ରାସ କରିବା ଏବଂ ପରିବେଶ ଅନୁକୂଳ ଗତିଶୀଳତା ସମାଧାନକୁ ପ୍ରୋତ୍ସାହିତ କରିବାରେ ଅଗ୍ରଣୀ ହେବା ପାଇଁ ଏହି ପ୍ରକଳ୍ପ ଆମର ଲକ୍ଷ୍ୟ ସହିତ ସମ୍ପୂର୍ଣ୍ଣ ରୂପେ ସମନ୍ୱିତ। ଜେଏସ୍ଡବ୍ଲ୍ୟୁ ଗ୍ରୁପ୍ ସହ ଆମର ସହଯୋଗ ମାଧ୍ୟମରେ ଆମେ ଏକ ଭବିଷ୍ୟତ ପାଇଁ ମଞ୍ଚ ପ୍ରସ୍ତୁତ କରୁଛୁ ଯେଉଁଠାରେ ଅଭିନବତା ଆମର ଶିଳ୍ପ ଅଭିବୃଦ୍ଧିକୁ ପ୍ରୋତ୍ସାହିତ କରିବ, ଓଡ଼ିଶାର ଯୁବକମାନଙ୍କୁ ସେହି ଦକ୍ଷତା ଏବଂ ନିଯୁକ୍ତିରେ ପ୍ରବେଶ ସୁନିଶ୍ଚିତ କରୁଛୁ ଯାହା ପରବର୍ତ୍ତୀ ପିଢ଼ିର ଅର୍ଥନୈତିକ ବିକାଶକୁ ନିର୍ଦ୍ଧାରଣ କରିବ।”

ଜେଏସ୍ ଡବ୍ଲ୍ୟୁ ଗ୍ରୁପର ଅଧ୍ୟକ୍ଷ ସଜ୍ଜନ ଜିନ୍ଦଲ ଓଡ଼ିଶା ପ୍ରତି ଜେଏସଡବ୍ଲ୍ୟୁ ଗ୍ରୁପର ପ୍ରତିବଦ୍ଧତା ଉପରେ କହିଥିଲେ ଯେ “ଜେଏସଡବ୍ଲ୍ୟୁ ଏହାର ସ୍ଥିର ନେତୃତ୍ୱ, ଶିଳ୍ପଗୁଡ଼ିକୁ ରାଜ୍ୟ ସରକାରଙ୍କ ଅତୁଳନୀୟ ସମର୍ଥନ ଏବଂ ଏହାର ସମ୍ବଳ ଏବଂ ଦକ୍ଷତା ଇକୋସିଷ୍ଟମ୍ ପାଇଁ ଓଡ଼ିଶାକୁ ଏହାର ପ୍ରଥମ ଇଭି ୟୁନିଟ୍ ପାଇଁ ବାଛିଛି। ଓଡ଼ିଶା ଏକ ଟ୍ରିଲିୟନ ଡଲାର ଅର୍ଥନୀତିରେ ପରିଣତ ହେବାର ସମସ୍ତ ସମ୍ଭାବନା ରହିଛି। ଏହି ପ୍ରକଳ୍ପ ରାଜ୍ୟର ବିକାଶ ଓ ସମୃଦ୍ଧି ପ୍ରତି ଆମର ପ୍ରତିବଦ୍ଧତାକୁ ପ୍ରତିଫଳିତ କରୁଛି।”

ଶିଳ୍ପମନ୍ତ୍ରୀ ଶ୍ରୀ ପ୍ରତାପ ଦେବ କହିଛନ୍ତି ଯେ ମୁଖ୍ୟମନ୍ତ୍ରୀଙ୍କ ଦୃଷ୍ଟିକୋଣ ସଠିକ୍ ଗତିରେ ଚାଲିଛି। ଆଶ୍ଚର୍ଯ୍ୟଜନକ ଗତିରେ ରାଜ୍ୟ ଶିଳ୍ପ ଅଭିବୃଦ୍ଧିର ନୂତନ କ୍ଷେତ୍ରରେ ପରିଣତ ହେଉଛି ବୋଲି ସେ କହିଛନ୍ତି।

ଏହି ଅବସରରେ ୫-ଟି ଓ ନବୀନ ଓଡ଼ିଶା କାର୍ତ୍ତିକ ପାଣ୍ଡିଆନ, ମୁଖ୍ୟ ଶାସନ ସଚିବ ଶ୍ରୀ ପିକେ ଜେନା ଓ ଓଡ଼ିଶା ସରକାରଙ୍କ ବରିଷ୍ଠ ଅଧିକାରୀମାନେ; ରାଜ୍ୟର ଅଗ୍ରଣୀ ଶିଳ୍ପ ସଂଘ, ଅଗ୍ରଣୀ ବୈଷୟିକ ଓ ବୃତ୍ତିଗତ ଅନୁଷ୍ଠାନର ପ୍ରତିନିଧି ପ୍ରମୁଖ ଉପସ୍ଥିତ ଥିଲେ।