ଲିଭର ସିରୋସିସରେ ପୀଡ଼ିତ ଭେଟେରାନ ଅଭିନେତା ଉତ୍ତମ ମହାନ୍ତି

ଭୁବନେଶ୍ୱର, ୦୮/୦୨: ଓଲିଉଡ ଜଗତର ଭେଟେରାନ ଅଭିନେତା ଉତ୍ତମ ମହାନ୍ତି ଗୁରୁତର ଅସୁସ୍ଥ। ଲିଭର ସିରୋସିସରେ ପୀଡ଼ିତ ହୋଇ ଗୁରୁତର ଅବସ୍ଥାରେ ଭୁବନେଶ୍ୱରର କିମ୍ସ ହସ୍ପିଟାଲରେ ଭର୍ତ୍ତି ହୋଇଛନ୍ତି। ହସ୍ପିଟାଲରେ ଭେଣ୍ଟିଲେଟରରେ ରହି ଚିକିତ୍ସିତ ହେଉଛନ୍ତି। ବର୍ତ୍ତମାନ ସ୍ୱାସ୍ଥ୍ୟବସ୍ଥା ସ୍ଥିର ଅଛି ବୋଲି ସୂଚନା ଦେଇଛନ୍ତି କିମ୍ସ କ୍ୟାନସର ହସ୍ପିଟାଲ ନିର୍ଦ୍ଦେଶକ ପ୍ରଫେସର ଡାକ୍ତର ମନୋଜ ସାହୁ।

ଅନ୍ୟପଟେ ଉତ୍ତମ ମହାନ୍ତିଙ୍କୁ ଭେଟିବା ପାଇଁ ହସ୍ପିଟାଲରେ ପହଞ୍ଚିଛନ୍ତି ଓଲିଉଡ କଳାକାର। ବବି ମିଶ୍ର, ଶ୍ରୀତମ ଦାସ, କେ.କେ, ଟୁଟୁ ନାୟକ ଓ ରବି ମିଶ୍ର ପ୍ରମୁଖ ହସ୍ପିଟାଲରେ ପହଞ୍ଚି ଉତ୍ତମଙ୍କ ସ୍ୱାସ୍ଥ୍ୟବସ୍ଥା କଥା ପଚାରି ବୁଝିଛନ୍ତି। ହସ୍ପିଟାଲରେ ବାବୁସାନ୍ ଓ ଅପରାଜିତା ଉପସ୍ଥିତ ଅଛନ୍ତି। ଖୁବଶୀଘ୍ର ଗୁରଗାଓଁର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରିବା ପାଇଁ ପ୍ରକ୍ରିୟା ଚାଲିଛି।

ସୂଚନାଯୋଗ୍ୟ, ଓଡ଼ିଶା ବାହାରେ ଓଡ଼ିଆ ଚଳଚ୍ଚିତ୍ର ‘ବୋଉ ବୁଟୁ ଭୂତ’ ର ସୁଟିଂ ଚାଲୁଥିବା ବେଳେ ହଠାତ୍ ଉତ୍ତମ ମହାନ୍ତିଙ୍କ ସ୍ୱାସ୍ଥ୍ୟବସ୍ଥା ବିଗିଡି ଯାଇଥିଲା। ଏହା ପରେ ତାଙ୍କୁ ସେଠାରେ ଚିକିତ୍ସା କରାଯାଇଥିଲା। ସ୍ୱାସ୍ଥ୍ୟ ଭଲ ହେବା ପରେ ଓଡ଼ିଶା ଆସିଥିଲେ। ହେଲେ ଗତ କାଲି ପୁଣି ଶରୀର ଅସୁସ୍ଥ ହେବାରୁ ତାଙ୍କୁ କିମ୍ସ ସୁପର ସ୍ପେସିଆଲିଟି ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ଚିକିତ୍ସା ଚାଲିଛି।