ଇସ୍ତଫା ଦେଲେ ମଣିପୁର ମୁଖ୍ୟମନ୍ତ୍ରୀ ବିରେନ ସିଂ

ମଣିପୁର, ୦୯/୦୨: ଉତ୍ତର-ପୂର୍ବ ରାଜ୍ୟ ମଣିପୁରରେ ହିଂସା ଥମୁନଥିବା ବେଳେ ମଣିପୁରର ମୁଖ୍ୟମନ୍ତ୍ରୀ ଏନ୍ ବିରେନ୍ ସିଂ ପଦରୁ ଇସ୍ତଫା ଦେଇଛନ୍ତି। ରାଜଭବନରେ ରାଜ୍ୟପାଳ ଅଜୟ କୁମାର ଭଲ୍ଲାଙ୍କୁ ତାଙ୍କ ଇସ୍ତଫା ପତ୍ର ପ୍ରଦାନ କରିଛନ୍ତି ବିରେନ ସିଂ। ବର୍ତ୍ତମାନ ଯାଏଁ ମଣିପୁରବାସୀଙ୍କ ସେବା କରିବା ଏକ ଗର୍ବର ବିଷୟ ବୋଲି ତାଙ୍କ ଇସ୍ତଫା ପତ୍ରରେ ସେ କହିଛନ୍ତି। ରାଜ୍ୟ ବିଜେପି ସଭାପତି ଏ ଶାରଦା, ବିଜେପିର ଉତ୍ତର ପୂର୍ବ ମଣିପୁର ପ୍ରଭାରୀ ସମ୍ବିତ ପାତ୍ରଙ୍କ ସମେତ କିଛି ବିଧାୟକଙ୍କ ଉପସ୍ଥିତିରେ ସେ ଇସ୍ତଫା ଦେଇଛନ୍ତି।

ଆଜି ଦିଲ୍ଲୀରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଏବଂ ବିଜେପି ଅଧ୍ୟକ୍ଷ ଜେପି ନଡ୍ଡାଙ୍କ ସହ ଦୁଇ ଘଣ୍ଟାରୁ ଅଧିକ ସମୟ ଧରି ଆଲୋଚନା କରିବା ପରେ ସେ ରାଜ୍ୟପାଳଙ୍କୁ ଇସ୍ତଫା ପତ୍ର ପ୍ରଦାନ କରିଛନ୍ତି। ସୂଚନାଯୋଗ୍ୟ, ୨୦୨୩ ଜୁଲାଇରେ ଶ୍ରୀ ସିଂ ଇସ୍ତଫା ଦେଇଥିଲେ, କିନ୍ତୁ ସମର୍ଥକଙ୍କ ବିରୋଧ ପରେ ସେ ଏହାକୁ ପ୍ରତ୍ୟାହାର କରିନେଇଥିଲେ।

ମେ ୨୦୨୩ରୁ ମଣିପୁରରେ ଜାତିଗତ ହିଂସା ଆରମ୍ଭ ହେବା ପରେ ୨୫୦ରୁ ଅଧିକ ଲୋକ ପ୍ରାଣ ହରାଇଲେଣି ଏବଂ ହଜାର ହଜାର ଲୋକ ବାସହୀନ ହେଲେଣି। ଶାନ୍ତି ଫେରାଇ ଆଣିବା ପାଇଁ ସରକାର ବହୁ ପଦକ୍ଷେପ ମଧ୍ୟ ନେଇଛନ୍ତି।