ପାତ୍ରପୁର, ୩୦/୦୩: ରାଜ୍ୟରେ ନୂତନ ସରକାରଙ୍କ ପକ୍ଷରୁ ଅନ୍ତ୍ୟୋଦୟ ଗୃହ ଯୋଜନା ରବିବାର ଶୁଭାରମ୍ଭ କରାଯାଇଥିବା ବେଳେ ଗଞ୍ଜାମ ଜିଲ୍ଲା ସୀମାନ୍ତ ପାତ୍ରପୁର ବ୍ଲକରେ ମଧ୍ୟ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ମୁଖ୍ୟ ଅତିଥି ଭାବେ ଚିକିଟି ବିଧାୟକ ମନୋରଞ୍ଜନ ଦ୍ୟାନ ସାମନ୍ତରାୟ ଯୋଗଦେଇଥିଲେ। ସେହିଭଳି ପାତ୍ରପୁର ବ୍ଲକ୍ ଅଧ୍ୟକ୍ଷା ୱାଇ.ସଂଯୁକ୍ତା, ଉପାଧ୍ୟକ୍ଷ ଅନାଦୀ ପଣ୍ଡିତ, ପାତ୍ରପୁର ଗୋଷ୍ଠି ଉନ୍ନୟନ ଅଧିକାରୀ ଲକ୍ଷ୍ମଣ ଚରଣ ସୋରେନ ପ୍ରମୁଖ ଉପସ୍ଥିତ ରହି ୨୩ ପଞ୍ଚାୟତ ୬୩ ଜଣ ହିତାଧିକାରୀଙ୍କୁ କାର୍ଯ୍ୟାଦେଶ ପ୍ରଦାନ କରିଥିଲେ। ରାଜ୍ୟ ସରକାରଙ୍କ ଏହି ମୁଖ୍ୟମନ୍ତ୍ରୀ କଳାହାଣ୍ଡିରେ ଉଦ୍ଘାଟନ କରିଥିବା ବେଳେ ଭିଡିଓ କନଫରେନ୍ସ ମାଧ୍ୟମରେ ପାତ୍ରପୁରରେ ହିତାଧିକାରୀମାନେ ଦେଖିଥିଲେ। ହେଲେ ଅବ୍ୟବସ୍ଥା ମଧ୍ୟରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିବା ବେଳେ ସାଧାରଣ ଲୋକେ ହିନସ୍ତା ହୋଇଥିଲେ। ପିଆରଆଇ ମେମ୍ବର ଓ ବ୍ଲକ୍ କର୍ମଚାରୀମାନେ ଚେୟାର ମାଡି ବସିଥିବା ବେଳେ ସାଧାରଣ ଜନତାଙ୍କ ଚେୟାର ନଥିଲା। ଦିନ ୧୦ଟା ପର୍ଯ୍ୟନ୍ତ ଲୋକେ ବସିବା ପାଇଁ ଚେୟାର ପଡିନଥିବା ବେଳେ ତରବରିଆ ଭାବେ ଲୋକଙ୍କୁ ଦେଖି ଚେୟାର ପକାଯାଇଥିଲା। ମିଶନ ଶକ୍ତି କର୍ମଚାରୀ ସହ ହିତାଧିକାରୀଙ୍କୁ ସକାଳ ୯ଟାରେ କାର୍ଯ୍ୟକ୍ରମ ହେବ ବୋଲି କୁହାଯାଇଥିବା ବେଳେ ଦିନ ୧୧ଟାରେ କାର୍ଯ୍ୟକ୍ରମ ଆରମ୍ଭ ହୋଇଥିଲା। ଅନ୍ୟପକ୍ଷେ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ବିଭିନ୍ନ ଯୋଜନା ମାଧ୍ୟମରେ ବିକାଶ ପାଇଁ ରାଜକୋଷରୁ ପାଣି ଭଳି ଟଙ୍କା ଖର୍ଚ୍ଚ କରୁଥିବା ବେଳେ ପ୍ରଶାସନ ପକ୍ଷରୁ ସଠିକ୍ ଭାବେ ସଚେତନତା ମୂଳକ କାର୍ଯ୍ୟକ୍ରମ ହେଉ ନାହିଁ କି ଯୋଜନା ବିଷୟରେ ସଠିକ୍ ଭାବେ ପ୍ରଚାର ପ୍ରସାର ହେଉ ନାହିଁ। ଯାହା ଫଳରେ ବହୁ ଯୋଗ୍ୟ ହିତାଧିକାରୀମାନେ ଅନେକ ଯୋଜନାରୁ ବଞ୍ଚିତ ହେବା ସହ ସରକାରୀ କାର୍ଯ୍ୟାଳୟକୁ ବାରମ୍ବାର ଦୌଡିବାର ଅନେକ ନଜିର ରହିଛି। ଉକ୍ତ ଯୋଜନାର ଶୁଭାରମ୍ଭ ପାଇଁ ସରକାରଙ୍କ ପକ୍ଷରୁ ପୂର୍ବରୁ ସୂଚନା ହୋଇଥିବା ସତ୍ତ୍ଵେ କାହିଁକି ଲୋକଙ୍କୁ କାର୍ଯ୍ୟକ୍ରମ ସୂଚନା ଦିଆଗଲା ନାହିଁ ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି। ପ୍ରବଳ ଗ୍ରୀଷ୍ମ ପ୍ରଭାବ ଜାରି ଥିବା ବେଳେ କାର୍ଯ୍ୟକ୍ରମ ସ୍ଥଳରେ ପାନୀୟ ଜଳ ଓ ଆବଶ୍ୟକ ସଂଖ୍ୟାକ ଫ୍ୟାନ୍ର ବ୍ୟବସ୍ଥା ହୋଇନଥିଲା। ଯାହା ଫଳରେ ଲୋକେ ଗ୍ରୀଷ୍ମ ପ୍ରବାହରେ ସିଝିଥିଲେ। ସଭାସ୍ଥଳ ନିକଟରେ ସ୍ୱଚ୍ଛତା ନଥିବା ଦେଖିବାକୁ ମିଳିଥିଲା। ସ୍ୱଚ୍ଛ ଭାରତ ମିଶନ ରିକ୍ସା ରହିଥିବା ବେଳେ ସଭାସ୍ଥଳ ପାଇଁ ପର୍ଯ୍ୟାପ୍ତ ଜାଗା ନଥିବା ଅନୁମେୟ ହେଉଥିଲା।
