ଆଜିର ତାରିଖ ୨୫ ଏପ୍ରିଲ୍ ୨୦୨୫
ବିଶ୍ୱ ମ୍ୟାଲେରିଆ ଦିବସ: ମ୍ୟାଲେରିଆ ସମ୍ପର୍କରେ ଜନସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ଏହି ଦିବସ ପାଳନ କରାଯାଉଛି। ୨୦୦୭ ବିଶ୍ୱ ସ୍ୱାସ୍ଥ୍ୟ ସଭାରେ ଡବ୍ଲୁଏଚଓ ସଦସ୍ୟ ରାଷ୍ଟ୍ରମାନେ ଏହି ପଦକ୍ଷେପ ଆରମ୍ଭ କରିଥିଲେ। ୨୦୦୭ ମସିହାରୁ ଏପ୍ରିଲ ୨୫ ତାରିଖରେ ବିଶ୍ୱ ମ୍ୟାଲେରିଆ ଦିବସ ପାଳନ କରାଯାଉଛି। ବିଭିନ୍ନ ଅଞ୍ଚଳରେ ମ୍ୟାଲେରିଆ ନିରାକରଣ ଓ ଚିକିତ୍ସା ନିମନ୍ତେ ଗୋଷ୍ଠୀ ଭିତ୍ତିକ କାର୍ଯ୍ୟକଳାପ ସମେତ ମ୍ୟାଲେରିଆ ନିୟନ୍ତ୍ରଣ ପାଇଁ ରଣନୀତି ସମ୍ପର୍କରେ ସୂଚନା ପ୍ରଦାନ କରିବା ଉଦ୍ଦେଶ୍ୟରେ ଏହି ଦିବସ ପାଳନ ପାଇଁ ନିଷ୍ପତ୍ତି ନିଆ ଯାଇଥିଲା। ସମଗ୍ର ବିଶ୍ୱକୁ ମ୍ୟାଲେରିଆ ମୁକ୍ତ କରିବା ଏହି ଦିବସର ଲକ୍ଷ୍ୟ। ବିଶ୍ୱ ସ୍ୱାସ୍ଥ୍ୟ ସଂଗଠନଦ୍ୱାରା ବିଶ୍ୱ ସାର୍ବଜନିକ ସ୍ୱାସ୍ଥ୍ୟ ରକ୍ଷା ଅଭିଯାନ ଅନ୍ତର୍ଗତ ଯେଉଁ ଆଠୋଟି କାର୍ଯ୍ୟକ୍ରମ ପାଳିତ ହେଉଅଛି, ତନ୍ମଧ୍ୟରୁ ବିଶ୍ୱ ମ୍ୟାଲେରିଆ ଦିବସ ଅନ୍ୟତମ। ଅନ୍ୟ ସାତୋଟି ହେଲା, ବିଶ୍ୱ ରକ୍ତଦାତା ଦିବସ, ବିଶ୍ୱ ଟୀକାକରଣ ସପ୍ତାହ, ବିଶ୍ୱ କ୍ଷୟରୋଗ ଦିବସ, ବିଶ୍ୱ ତମାଖୁ ଦିବସ, ବିଶ୍ୱ ହେପାଟାଇଟିସ ଦିବସ, ବିଶ୍ୱ ସ୍ୱାସ୍ଥ୍ୟ ଦିବସ ଓ ବିଶ୍ୱ ଏଡସ୍ ଦିବସ।
ବିଶିଷ୍ଟ ବ୍ୟକ୍ତିଙ୍କ ଜନ୍ମ ଦିବସ:-
୧. ହେମବତୀ ନନ୍ଦନ ବହୁଗୁଣା (୨୫ ଅପ୍ରେଲ ୧୯୧୯ – ୧୭ ମାର୍ଚ୍ଚ ୧୯୮୯) ଜଣେ ଭାରତୀୟ ଜାତୀୟ କଂଗ୍ରେସ ନେତ୍ରୀ ଥିଲେ ଏବଂ ୧୯୭୩ ମସିହାରେ ଅଳ୍ପ ସମୟ ପାଇଁ ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ମଧ୍ୟ ହୋଇଥିଲେ। ୧୯୪୨ରୁ ୧୯୪୬ ପର୍ଯ୍ୟନ୍ତ ଭାରତ ଛାଡ଼ ଆନ୍ଦୋଳନରେ ଭାଗ ନେଇ ସେ ଜେଲ ଯାଇଥିଲେ।
୨. ଅଲ୍ ପାସିନୋ ଜଣେ ଆମେରିକୀୟ ଅଭିନେତା ଏବଂ ଚଳଚ୍ଚିତ୍ର ନିର୍ମାତା। ପାସିନୋ ୧୯୬୯ରେ ‘ମି, ନାଟାଲି’ ଚଳଚ୍ଚିତ୍ରରେ ଅଭିନୟ କରି ଚଳଚ୍ଚିତ୍ର ଜଗତରେ ଡେବ୍ୟୁ କରିଥିଲେ। ସେ ୯ଟି ଓସ୍କାର ଆୱାର୍ଡ଼ ପାଇଁ ମନୋନୀତ ହୋଇଥିବା ବେଳେ ଗୋଟିଏ ଜିତିଛନ୍ତି। ସେ ଟେଲିଭିଜନରେ ତାଙ୍କ କାର୍ଯ୍ୟ ପାଇଁ ଚାରିଟି ଗୋଲ୍ଡେନ୍ ଗ୍ଲୋବ୍ ପୁରସ୍କାର, ଗୋଟିଏ ବାଫ୍ଟା ପୁରସ୍କାର, ଦୁଇଟି ପ୍ରାଇମଟାଇମ୍ ଏମି ଆୱାର୍ଡ ଏବଂ ମଞ୍ଚ କାର୍ଯ୍ୟ ପାଇଁ ଦୁଇଟି ଟୋନି ପୁରସ୍କାର ଜିତିଛନ୍ତି।
୩. ହାଇଦର ଅଲ-ଆବାଦି ଜଣେ ଇରାକୀ ରାଜନେତା ଯିଏ ସେପ୍ଟେମ୍ବର ୨୦୧୪ରୁ ଅକ୍ଟୋବର ୨୦୧୮ ପର୍ଯ୍ୟନ୍ତ ଇରାକର ପ୍ରଧାନମନ୍ତ୍ରୀ ହୋଇଥିଲେ। ୨୦୧୮ରେ ଟାଇମ୍ ମାଗାଜିନ୍ ର ୧୦୦ ପ୍ରଭାବଶାଳୀ ବ୍ୟକ୍ତିଙ୍କ ମଧ୍ୟରେ ଅଲ୍-ଆବାଦିଙ୍କୁ ସାମିଲ କରାଯାଇଥିଲା। ୧୯୯୮ମସିହାରେ ଅଲ୍-ଆବାଦିଙ୍କୁ ବ୍ରିଟେନର ବାଣିଜ୍ୟ ଓ ଶିଳ୍ପ ବିଭାଗ ପକ୍ଷରୁ ଅନୁଦାନ ମିଳିଥିଲା।
ବିଶିଷ୍ଟ ବ୍ୟକ୍ତିଙ୍କ ତିରୋଧାନ ଦିବସ:-
୧. ଆଣ୍ଡର୍ସ ସେଲସିୟସ୍ (୨୭ ନଭେମ୍ବର ୧୭୦୧ – ୨୫ ଅପ୍ରେଲ ୧୭୪୪) ଜଣେ ସ୍ୱିଡେନ୍ ଜ୍ୟୋତିର୍ବିଜ୍ଞାନୀ, ପଦାର୍ଥ ବିଜ୍ଞାନୀ ଓ ଗଣିତଜ୍ଞ ଥିଲେ ସେଲ୍ସିୟସ ସ୍ୱିଡେନର ଜ୍ୟୋତିର୍ବିଜ୍ଞାନୀ ସେଣ୍ଟିଗ୍ରେଡ ତାପମାତ୍ରା ସ୍କେଲର ପ୍ରସ୍ତାବ ଦେଇଥିଲେ ଯାହାକୁ ପରେ ତାଙ୍କ ସମ୍ମାନାର୍ଥେ ସେଲ୍ସିୟସ ନାମରେ ନାମିତ କରାଯାଇଥିଲା।
୨. ମୀର ସୁଲତାନ ଖାନ (୧୯୦୩ – ୨୫ ଅପ୍ରେଲ ୧୯୬୬), ଏସିଆର ଚେସ୍ ମାଷ୍ଟର। ସେ ବ୍ରିଟିଶ ଚେସ୍ ଚାମ୍ପିୟନଶିପ୍ (୧୯୩୨)ର ଟ୍ରଫି ଜିତିଥିଲେ। ସୁଲତାନ ଖାନ୍ ବିଶ୍ୱର ଶ୍ରେଷ୍ଠ ଖେଳାଳିଙ୍କ ସହ ମଧ୍ୟ ଖେଳି ଚେସ୍ ଦୁନିଆର ଶୀର୍ଷରେ ପହଞ୍ଚିଥିଲେ।
୩. ସ୍ୱାମୀ ରଙ୍ଗନାଥାନନ୍ଦ (୧୫ ଡିସେମ୍ବର ୧୯୦୮ – ୨୫ ଅପ୍ରେଲ ୨୦୦୫) ଜଣେ ବିଶିଷ୍ଟ ଶିକ୍ଷକ ଓ ଭାରତୀୟ ଆଧ୍ୟାତ୍ମିକ ସଂସ୍କୃତିର ଅଧ୍ୟାପକ ଥିଲେ। ସେ ୫୦ରୁ ଅଧିକ ପୁସ୍ତକ ରଚନା କରିଛନ୍ତି।
୪. ବ୍ରଜଭୂଷଣ ତିୱାରୀ (୧୩ ଅକ୍ଟୋବର ୧୯୪୧ – ୨୫ ଅପ୍ରେଲ ୨୦୧୨) ଜଣେ ରାଜନେତା ଏବଂ ସମାଜବାଦୀ ପାର୍ଟିର ରାଷ୍ଟ୍ରୀୟ ଉପାଧ୍ୟକ୍ଷ ଥିଲେ। ସେ ଉତ୍ତରପ୍ରଦେଶରୁ ରାଜ୍ୟସଭାର ସାଂସଦ ମଧ୍ୟ ଥିଲେ।
ନଜର ପକାନ୍ତୁ ଆଜିର ଦିନରେ ଘଟିଥିବା ଗୁରୁତ୍ୱପୂର୍ଣ୍ଣ ଘଟଣାକ୍ରମ ଉପରେ:-
୧୭୧୯ – ଡାନିଏଲ ଡେଫୋଙ୍କ ଦ୍ୱାରା ପ୍ରଥମ ଇଂରାଜୀ ଉପନ୍ୟାସ ଭାବରେ ବିବେଚିତ “ରବିନ୍ସନ କ୍ରୁସୋ” ପ୍ରକାଶିତ ହୋଇଥିଲା।
୧୯୫୩ – ଫ୍ରାନ୍ସିସ୍ କ୍ରିକ୍ ଏବଂ ଜେମ୍ସ ୱାଟସନଙ୍କ ଡିଏନଏର ଡବଲ-ହେଲିକ୍ସ ଢାଞ୍ଚାର ଆବିଷ୍କାର “ପ୍ରକୃତି” ପତ୍ରିକାରେ ପ୍ରକାଶିତ ହୋଇଥିଲା।
୧୯୫୪ – ପ୍ରଥମ ସୌର ବ୍ୟାଟେରୀ ସିଲିକନରୁ ତିଆରି ହୋଇଥିଲା, ଯାହା ୬% କାର୍ଯ୍ୟକ୍ଷମ ଥିଲା।
୧୯୭୫ – ୟୁଏସଏସଆର ଭୂତଳ ପରମାଣୁ ପରୀକ୍ଷଣ କରିଥିଲା।
୧୯୮୨ – ପ୍ରଥମ ଥର ପାଇଁ ଦିଲ୍ଲୀରେ ଟେଲିଭିଜନରେ ରଙ୍ଗୀନ ପ୍ରସାରଣ ଆରମ୍ଭ ହୋଇଥିଲା।